فوتو: اشىق دەرەككوز
ۆەندورلار تۋرالى
اتوم ەنەرگياسى اگەنتتىگى مەن «قازاقستاندىق اتوم ەلەكتر ستانتسيالارى» جشس فرانتسۋزدىق «Assystem» ينجينيرينگتىك كومپانياسىمەن بىرلەسىپ ازىرلەگەن ادىستەمە نەگىزىندە اتالعان كومپانيالاردىڭ رەاكتورلىق تەحنولوگيالارى مەن ۇسىنىستارى كەشەندى تۇردە باعالاندى. باعالاۋ كەلەسى نەگىزگى ولشەمشارتتار بويىنشا جۇرگىزىلدى: قاۋىپسىزدىك, تەحنولوگيالىق جانە قارجىلىق اسپەكتىلەر, حالىقارالىق تاجىريبە, كادرلاردى دايارلاۋ دەڭگەيى, جەرگىلىكتى قامتۋ ۇلەسى مەن باسقا دا فاكتورلار.
تالداۋ ناتيجەسى ءارتۇرلى ۆەدومستۆوارالىق پلاتفورمالاردا قارالدى. ناتيجەسىندە «روساتوم» ەلىمىزدە ءبىرىنشى اتوم ەلەكتر ستانساسىن سالۋ جوباسى بويىنشا حالىقارالىق كونسورتسيۋمنىڭ كوشباسشىسى بولىپ تانىلدى. قىتاي ۇلتتىق يادرولىق كورپوراتسياسىنىڭ ۇسىنىسى ەكىنشى ورىندا, ودان كەيىن Électricité de France جانە ءۇشىنشى ورىندا Korea Hydro & Nuclear Power.
سونىمەن قاتار, ەلىمىزدە سالىناتىن ەكىنشى اەس جوباسى بويىنشا باسىم سەرىكتەس رەتىندە قىتايدىڭ «China National Nuclear Corporation» كومپانياسى قاراستىرىلىپ وتىر. قازىرگى ۋاقىتتا وسى باعىتتا مەملەكەتتىك ورگاندار مەن كومپانيالار دەڭگەيىندە كەلىسسوزدەر جۇرگىزىلىپ جاتىر.
ءۇشىنشى اەس قۇرىلىسى بويىنشا دا ىقتيمال ۆەندورلارمەن, ونىڭ ىشىندە «China National Nuclear Corporation» كومپانياسىمەن كەلىسسوزدەر جۇرگىزىلۋدە. كەلىسسوزدەر جوعارى قۋاتتى رەاكتورلارمەن قاتار شاعىن جانە ورتا قۋاتتى رەاكتورلار بويىنشا دا جۇرگىزىلىپ جاتىر.
ورنالاساتىن جەرى جونىندە
ەل ۇكىمەتىنىڭ 2024 جىلعى 30 جەلتوقسانداعى № 1137 «اتوم ەلەكتر ستانساسى» اتومدىق قوندىرعىسىن سالۋعا ارنالعان اۋماق تۋرالى» قاۋلىسىمەن الماتى وبلىسىنىڭ جامبىل اۋدانى اەس قۇرىلىسىن سالۋعا ارنالعان اۋماق تۋرالى شەشىم قابىلدانىپ, اتوم ەلەكتر ستانساسىنىڭ قۇرىلىس الاڭىن انىقتاۋ ءۇشىن وسى اۋداندا ينجەنەرلىك-ىزدەستىرۋ جۇمىستارىن باستاۋ جوسپارلانىپ وتىر.
ءبىرىنشى اەس-كە بەلگىلەنگەن اۋداننان بولەك, ەلىمىزدىڭ باسقا وڭىرلەرى دە ەكىنشى اەس سالۋعا قاراستىرىلۋدا. قازىر بۇل جۇمىستار الدىن الا كەزەڭدە تۇر. بولۋى ىقتيمال الاڭدارعا باعا بەرۋگە كونسۋلتاتسيا جۇرگىزىلۋدە. قورىتىندى شەشىم ەنەرگەتيكالىق تەڭگەرىم مەن وڭىرلەردىڭ ينفراقۇرىلىمدىق دايىندىعىن ەسكەرە وتىرىپ, قولدانىستاعى زاڭناماعا سايكەس قابىلدانادى.
