سۋرەت: senate.parlam.kz
حالىقارالىق پارلامەنتتىك وداقتىڭ, UN-OHRLLS جانە تۇرىكمەنستان پارلامەنتىنىڭ قولداۋىمەن وتكەن فورۋم بارىسىندا تۇراقتى دامۋدىڭ نەگىزگى ماسەلەلەرى, اۆازا ءىس-قيمىل باعدارلاماسىن ىسكە اسىرۋداعى پارلامەنتتەردىڭ ءرولى, سونداي-اق وڭىرلىك جانە حالىقارالىق ارىپتەستىكتى نىعايتۋ جولدارى تالقىلاندى.
فورۋم قاتىسۋشىلارى LLDC ەلدەرى پارلامەنتتەرى اراسىنداعى كۇش-جىگەردى ۇيلەستىرۋدىڭ ماڭىزدىلىعىن اتاپ ءوتتى. بۇل ەڭ الدىمەن, كولىك جانە ساۋدا ينفراقۇرىلىمىن دامىتۋعا, ەسەپتىلىكتى قامتاماسىز ەتۋگە جانە ينستيتۋتسيونالدىق تۇراقتىلىقتى ارتتىرۋعا باعىتتالعان زاڭنامالىق باستامالاردى ىلگەرىلەتۋ ءۇشىن قاجەت. سونىمەن قاتار تەڭىزگە شىعا المايتىن ەلدەردىڭ مۇددەلەرىن كوزدەيتىن كوپجاقتى ساۋدا جۇيەسىن قالىپتاستىرۋ, بەيبىتشىلىك پەن سەنىمدى نىعايتۋ جانە تۇراقتى دامۋ ماقساتىندا پارلامەنتتىك ىنتىماقتاستىقتى كۇشەيتۋ ماسەلەلەرىنە دە ەرەكشە نازار اۋدارىلدى.
فورۋم قورىتىندىسى بويىنشا اۆازا ءىس-قيمىل باعدارلاماسىنىڭ ماقساتتارىن جۇزەگە اسىرۋعا ۇلتتىق پارلامەنتتەردىڭ بەلسەندى قاتىسۋىن جانە ىنتىماقتاستىقتىڭ نەگىزگى باسىمدىقتارىن بەكىتەتىن پارلامەنتتىك دەكلاراتسيا قابىلداندى.
قازاقستان دەلەگاتسياسىنىڭ مۇنداي حالىقارالىق ءىس-شارالارعا قاتىسۋى ەلىمىزدىڭ پارلامەنتتىك ديپلوماتيا سالاسىنداعى ۇستانىمدارىن ودان ءارى نىعايتۋعا, سونداي-اق تۇراقتى دامۋ مەن وڭىرلىك ىنتىماقتاستىق سالالارىنداعى ۇلتتىق مۇددەلەردى ىلگەرىلەتۋگە ىقپال ەتەدى.
اۋىل تۇرعىندارىمەن كەزدەستى
سەنات دەپۋتاتتارىنىڭ وڭىرلەرگە ساپارى دا جالعاسىپ جاتىر. ناۋرىزباي بايقاداموۆ پەن رۋسلان رۇستەموۆ قىزىلوردا وبلىسىنىڭ جالاعاش اۋدانىنا بارىپ, بالامالى ەنەرگەتيكا سالاسىنداعى جوبانىڭ جۇزەگە اسىرىلۋ بارىسىمەن تانىسىپ, اۋىل تۇرعىندارىمەن كەزدەستى.
سەناتورلار «Nomad Solar» جشس-نىڭ كۇن ەلەكتر ستانساسىنا باردى. نىسان 164 گەكتار اۋماقتى الىپ جاتىر, ونىڭ 75 گەكتارىنا كۇن پانەلدەرى ورناتىلعان. ستانسا 2019 جىلى ىسكە قوسىلعان جانە ءوڭىردىڭ تۇراقتى دامۋىنا ۇلەس قوسىپ, ەكولوگيالىق تازا ەلەكتر ەنەرگياسىمەن قامتاماسىز ەتىپ كەلەدى.
پارلامەنت مۇشەلەرى مۇنداي جوبانىڭ ەلدىڭ ەنەرگەتيكالىق تاۋەلسىزدىگىن نىعايتىپ, ەكولوگيالىق كۇن ءتارتىبىن ىلگەرىلەتۋ ءۇشىن ماڭىزى زور ەكەنىن اتاپ ءوتتى. سونداي-اق «جاسىل» ەنەرگەتيكانى دامىتۋ مەملەكەتتىك ساياساتتىڭ باسىم باعىتتارىنىڭ ءبىرى بولىپ قالا بەرەتىنىن جەتكىزدى.
«بالامالى ەنەرگەتيكانى دامىتۋ – ەلىمىزدىڭ ەكولوگيالىق ماقساتتارىنا قول جەتكىزۋ جانە ەنەرگەتيكالىق قاۋىپسىزدىگىن نىعايتۋ جولىنداعى ماڭىزدى باعىت. مۇنداي جوبالار وڭىرلەردىڭ تۇراقتى دامۋىنا سەرپىن بەرىپ, ەكونوميكا ءۇشىن جاڭا مۇمكىندىكتەر اشادى», دەدى ر.رۇستەموۆ.
ءىسساپار بارىسىندا سەناتورلار اۋىل شارۋاشىلىعى سالاسىندا ەڭبەك ەتىپ جۇرگەن تاڭ اۋىلىنىڭ تۇرعىندارىمەن دە كەزدەستى. اشىق ديالوگ بارىسىندا سۋارمالى سۋدىڭ جەتىسپەۋشىلىگى جانە اۋىل شارۋاشىلىعى ونىمدەرىن وتكىزۋ ماسەلەلەرى كوتەرىلدى.
