جاڭا تەحنيكالار سۋارۋ كانالدارىن مەحانيكالىق تازالاۋ مەن گيدروتەحنيكالىق قۇرىلىستاردى جوندەۋگە پايدالانا باستادى. جالپى العاندا, «قازسۋشار» فيليالدارىنا بارلىعى 757 اۆتوكولىك پەن قۇرال-جابدىق بەرۋ جوسپارلانىپ وتىر.
مينيسترلىك ۇسىنعان تەحنيكالار قاتارىندا ەكسكاۆاتور, تيەگىش, شىنجىر تاباندى ەكسكاۆاتور, تراكتور, تىركەمە, ساموسۆال, تارتقىش كولىك, اۆتوكران, جانارماي تاسىمالداعىش, قوسالقى قۇرال-جابدىق پەن ديزەلدى گەنەراتورلار بار.
«جاڭا تەحنيكالار ۆەگەتاتسيا كەزەڭىنىڭ تۇراقتى وتۋىنە جاعداي جاساۋ ءۇشىن, سونىڭ قاتارىندا كانالداردىڭ وتكىزۋ مۇمكىندىگىن ارتتىرۋ ماقساتىندا ولاردى تازالاۋ جۇمىسىنا قولدانىلادى. قازىر «قازسۋشار» فيليالدارى جالپى ۇزىندىعى 2 011 شاقىرىم بولاتىن سۋارۋ كانالدارىندا مەحانيكالىق تازالاۋ جۇمىسىن جۇرگىزۋدە, ونىڭ 780 شاقىرىمىندا جۇمىس اياقتالدى», دەدى سۋ رەسۋرستارى جانە يرريگاتسيا ۆيتسە-ءمينيسترى ەربولات يبرايحانوۆ.
