تامىز ايىندا وتكىزىلەتىن سپورت سايىستارىنا 2 ملن. ادام قاتىسادى

استانا. 5 تامىز. «قازاقستان رەسپۋبليكاسىنداعى كاسىپتىك جانە وزگە دە مەرەكەلەر تۋرالى» قازاقستان رەسپۋبليكاسى پرەزيدەنتىنىڭ 2003 جىلعى 15 قاراشاداعى №1226 جارلىعىمەن تامىز ايىنىڭ ءۇشىنشى جەكسەنبىسى, «سپورت كۇنى» كاسىبي مەرەكە بولىپ بەكىتىلدى. سوعان بايلانىستى وسى تامىز ايىندا رەسپۋبليكانىڭ بارلىق وڭىرىندە سپورتتىق ءىس-شارالار وتكىزىلەدى. بۇل تۋرالى مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ ءباسپاسوز قىزمەتى حبارلادى. اتالعان شارا شەڭبەرىندە وبلىس جانە اۋدان ورتالىقتارىندا 400-دەن استام ءىرى سپورت سايىستارى ۇيىمداستىرىلادى. سالاۋاتتى ءومىر سالتىن ناسيحاتتاۋعا باعىتتالعان بۇل شارالارعا 2 ملن.-عا جۋىق ادام قاتىسادى دەپ جوسپارلانۋدا. سونداي-اق, بۇقارالىق سپورتتىڭ دامۋىنا قاتىستى جۇمىستار دا قولعا الىنادى. سپورت ايلىعىندا وسى ماقساتتا وتكىزىلەتىن جارىستارعا بارلىق بۋىن وكىلدەرىن, ياعني, بالالار, جاسوسپىرىمدەر, جاستار جانە ەرەسەكتەردى بارىنشا تارتۋ كوزدەلىپ وتىر. ايلىق بارىسىندا ۇلتتىق سپورت تۇرلەرىنەن دە جارىستار ۇيىمداستىرىلادى. ودان بولەك, مۇمكىندىگى شەكتەۋلى جاندار سايىسى, اۋىل سپارتاكيادالارى, زياتكەرلىك ويىن تۇرلەرى جانە تاعى باسقالارى نازاردان تىس قالمايدى. سونىمەن قاتار, 16 تامىزدا ورتالىق مەملەكەتتىك ورگان قىزمەتكەرلەرى سپورت ايلىعى شەڭبەرىندە پرەزيدەنتتىك تەست تاپسىرادى. ەلامان قوڭىر. دەرەك, سۋرەت: مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ ءباسپاسوز قىزمەتى.