فوتو: قر سىرتقى ىستەر مينيسترلىگى
جوبا شىمكەنت قالاسىنداعى «وڭتۇستىك» ارنايى ەكونوميكالىق ايماعىندا تىك تىگىستى بولات قۇبىرلار شىعاراتىن زاۋىت سالۋدى كوزدەيدى. ينۆەستيتسيا كولەمى 70 ملن اقش دوللارىنان اسادى. ەسەسىنە 283 جۇمىس ورنى قۇرىلادى. جوسپارلانعان وندىرىستىك قۋات – جىلىنا 200 مىڭ توننا.
زاۋىت مۇناي-گاز سەكتورى, قۇرىلىس, تۇرعىن ءۇي-كوممۋنالدىق شارۋاشىلىعى جانە ينفراقۇرىلىمدىق جوبالار ءۇشىن سۇرانىسقا يە قۇبىرلاردى شىعارادى. ءوندىرىس يمپورتتى الماستىرۋعا باعىتتالعان. ەسكە سالساق, بىلتىر ەلىمىز 487 ملن اقش دوللارىنا 428 مىڭ توننا قۇبىر يمپورتتاعان ەدى.
كەزدەسۋ بارىسىندا ع.وسپانقۇلوۆ ينۆەستورلارعا ەلىمىزدەگى مەملەكەتتىك قولداۋ شارالارى, ونىڭ ىشىندە ينۆەستيتسيالىق پرەفەرەنتسيالار, سالىقتىق جانە كەدەندىك جەڭىلدىكتەر, سونداي-اق ارنايى ەكونوميكالىق ايماقتارداعى جوبالاردى ورنالاستىرۋ مۇمكىندىكتەرى تۋرالى تولىق اقپارات بەردى.
«قازاقستان ءۇشىن وڭدەۋشى ونەركاسىپتى دامىتۋ مەن نەگىزگى وندىرىستەردى جەرگىلىكتەندىرۋ اسا ماڭىزدى. قۇبىر زاۋىتىنىڭ قۇرىلىسى ەكونوميكامىزدى ءارتاراپتاندىرۋ, ىشكى نارىقتى ساپالى ونىممەن قامتۋ جانە ەكسپورتتىق الەۋەتتى ارتتىرۋ باعىتتارىنداعى باسىمدىقتارىمىزعا تولىق ساي كەلەدى. ءبىز جوبانىڭ بارلىق كەزەڭىندە –اكىمشىلىك سۇيەمەلدەۋدەن باستاپ مەملەكەتتىك قولداۋ قۇرالدارىنا قوسىلۋعا دەيىن – جان-جاقتى قولداۋ كورسەتۋگە دايىنبىز», دەدى ءسىم ينۆەستيتسيالار كوميتەتىنىڭ توراعاسى.
ال لي سياندۋن كومپانيا قازاقستاندى وڭىردەگى نەگىزگى سەرىكتەسى رەتىندە قاراستىراتىنىن جەتكىزدى.
ء«بىز قازاقستاننىڭ ينۆەستيتسيالىق الەۋەتىن, تۇراقتى ىسكەرلىك ورتاسىن جانە شەتەلدىك ينۆەستورلارعا كورسەتىلەتىن جۇيەلى قولداۋدى جوعارى باعالايمىز. قۇبىر زاۋىتى جوباسى ۇزاق مەرزىمدى جانە ءوزارا ءتيىمدى ىنتىماقتاستىقتىڭ نەگىزى بولاتىنىنا سەنىمدىمىز», دەدى «Tianjin Youfa Group» كومپانياسى باس ديرەكتورىنىڭ ورىنباسارى.
شىمكەنتتەگى زاۋىت قۇرىلىسىنىڭ جوباسى ستراتەگيالىق ماڭىزدى سالادا جەرگىلىكتى ءوندىرىستى دامىتۋ مەن ونەركاسىپتىك كووپەراتسيانى نىعايتۋدىڭ ماڭىزدى ەلەمەنتى رەتىندە قاراستىرىلادى. تاراپتار باستامانى ىسكە اسىرۋ بويىنشا بىرلەسكەن جۇمىسقا دايىن ەكەندىگىن ءبىلدىردى.
ايتا كەتەيىك, Hong Kong Friend International Cooperation Co., Limited – قىتايداعى قۇبىر ءوندىرۋشى ەڭ ءىرى كومپانيالاردىڭ ءبىرى «Youfa Group»-تىڭ ەنشىلەس كاسىپورنى. كومپانيا دامىعان وندىرىستىك جانە لوگيستيكالىق ينفراقۇرىلىمعا يە, ءونىمىن 100-دەن استام ەلگە ەكسپورتتايدى جانە ازياداعى بولات قۇبىرلار نارىعىندا جەتەكشى ورىندا تۇر.
