فوتو: babok-school.ru
ءمينيستردىڭ ايتۋىنشا, جوبا – وندىرىستەن باستاپ تۇپكى تۇتىنۋشىعا دەيىنگى ارالىقتاعى بارلىق كەزەڭدى ەلەكتروندى فورماتتا باقىلاۋعا مۇمكىندىك بەرەتىن تولىققاندى ەكوجۇيە. ياعني, كەز كەلگەن تاۋاردىڭ قايدا وندىرىلگەنى, قالاي تاسىمالدانعانى, قاي جەردە ساتىلعانى تۋرالى اقپارات اشىق ءارى ناقتى تىركەلىپ وتىرادى. بۇل جۇيە كولەڭكەلى ەكونوميكامەن كۇرەستە جانە ءادىل باسەكەلەستىك ورناتۋدا ماڭىزدى قۇرالعا اينالماق.
تسيفرلىق باقىلاۋ جۇيەسىنىڭ نەگىزى – تاۋارلاردىڭ تولىق كلاسسيفيكاتسياسى مەن كاتالوگتالۋى. بۇگىندە 1,3 ميلليوننان استام ونىمگە جىكتەۋ جۇمىستارى جۇرگىزىلدى. سونىمەن قاتار, «ۇلتتىق تاۋارلار كاتالوگى» مەن «ەلەكتروندىق تاۋارلار كاتالوگىنا» سايكەس جۇمىستار اياقتالۋعا جاقىن.
جوبانىڭ تاعى ءبىر ماڭىزدى ەلەمەنتى – تاۋارلاردى سەرتيفيكاتتاۋ پروتسەسىن تسيفرلاندىرۋ. وسى ماقساتتا وتكەن جىلى «تەحنيكالىق رەتتەۋدىڭ اقپاراتتىق جۇيەسى» (E-كترم) ىسكە قوسىلعان بولاتىن. قازىر بۇل جۇيەدە 100 مىڭنان استام ءوتىنىش بەرۋشى, 1,5 مىڭ اككرەديتتەلگەن ۇيىم تىركەلگەن. ناتيجەسىندە, 3,5 ميلليوننان استام رۇقسات قۇجاتتارى تسيفرلىق تۇردە بەرىلىپ, سەرتيفيكاتتاۋ ۇدەرىسى ەداۋىر جەڭىلدەگەن ءارى اشىقتىق قامتاماسىز ەتىلگەن.
بۇل باستامالار ەل ىشىندە زاڭدى ساۋدا اينالىمىن كەڭەيتۋمەن قاتار, وتاندىق وندىرۋشىلەردىڭ ءونىمىن سىرتقى نارىققا سەنىمدى ۇسىنۋعا مۇمكىندىك بەرمەك. ساراپشىلاردىڭ پىكىرىنشە, تسيفرلىق باقىلاۋ تەتىكتەرى ينفلياتسيانى تەجەۋگە, دەلدالدىق تىزبەكتەردى قىسقارتۋعا جانە تۇتىنۋشىعا تاۋاردى ناقتى باعامەن جەتكىزۋگە جول اشادى.
وسىلايشا, «ساۋدانىڭ تسيفرلىق ايناسى» جوباسى ەل ەكونوميكاسىن تسيفرلىق فورماتقا كوشىرۋدەگى كەزەكتى ناقتى قادام بولىپ وتىر.
