كورمەدە اباي قۇنانباي ۇلىنىڭ شىعارماشىلىق مۇراسى – ولەڭدەرى مەن قارا سوزدەرى, اۋدارمالارى مەن فيلوسوفيالىق وي-تولعاۋلارى كەڭىنەن ناسيحاتتالعان. كەلەلى كورمەگە 184 كىتاپ, 4 دايەكتى ءسوز (تسيتاتا) جانە 8 سۋرەت قويىلىپ, ەكسپوزيتسيا بىرنەشە تاقىرىپتا قاراستىرىلعان.
اتاپ ايتساق, «قالىڭ ەلىم, قازاعىم» بولىمىندە ابايدىڭ ءار جىلدارى جارىق كورگەن ولەڭدەر جيناقتارى مەن 1909 جىلى سانكت-پەتەربۋرگتە شىققان العاشقى باسىلىمنان باستاپ, كەيىنگى تولىق جيناقتار قامتىلعان. ال «اباي جانە مۋزىكا» بولىمىندە – ابايدىڭ ءان مۇراسى, مۋزىكالىق ىقپالى, سونداي-اق اندەرىنىڭ كەيىنگى وپەرالىق, سيمفونيالىق شىعارمالارعا ارقاۋ بولعانى كورىنىس تاپتى. سونىمەن قاتار «اباي – الەم تىلدەرىندە», «ابايدىڭ دۇنيەتانىمى», «اباي مۇراگەرلەرىنىڭ ەڭبەكتەرى» اتتى بولىمدەر حاكىم الەمىن جان-جاقتى اشۋعا باعىت-
تالعان.
كەلەلى ءىس-شارادا بەلگىلى جازۋشى, ابايتانۋشى-مۇحتارتانۋشى, مايدانگەر, ۇستاز كامەن ءورازاليننىڭ (1920–2008) «ابايدان سوڭعى ارىستار» اتتى ءۇش تومدىق كىتابىنىڭ تانىستىرىلىمى ءوتتى.
«ابايدان سوڭعى ارىستار» رومان-تريلوگياسى – بيىل تۋعانىنا 105 جىل تولىپ وتىرعان جازۋشى كامەن ءورازاليننىڭ قازاق حالقىنىڭ داڭقتى پەرزەنتتەرىنىڭ ەل تاۋەلسىزدىگى ءۇشىن كۇرەسكەن كۇردەلى كەزەڭىن سۋرەتتەگەن شىعارماسى.
روماندا «الاش» كوسەمدەرى ءاليحان, احمەت, جۇسىپبەك, حالەل, ءالىمحانداردىڭ حالىققا جاساعان ەڭبەكتەرى جان-جاقتى بەينەلەنىپ, شاكارىم, اباي بالاسى مەكايىل, مۇحتار اۋەزوۆ بولمىسى ءارتۇرلى وبرازدارمەن جاڭاشا سومدالعان.
ءىس-شاراعا فيلولوگيا عىلىمدارىنىڭ دوكتورى, ابايتانۋشى تۇرسىن جۇرتباي, فيلولوگيا عىلىمدارىنىڭ دوكتورى, پروفەسسور سەرىك نەگيموۆ, تاريح عىلىمدارىنىڭ دوكتورى, پروفەسسور, ەۋرازيا ۋنيۆەرسيتەتىنىڭ رەكتورى ەرلان سىدىقوۆ سىندى زيالى قاۋىم وكىلدەرى قاتىسىپ, ەلەۋلى شىعارمانى جان-جاقتى تالداپ, لەبىزدەرىن ءبىلدىردى.
