قوعامداعى داۋ-داماي مەن كەلىسپەۋشىلىكتى سوتقا جەتكىزبەي شەشۋگە مۇمكىندىك بەرەتىن بالاما تەتىك رەتىندە مەدياتسيا ينستيتۋتى جىلدان-جىلعا دامىپ كەلەدى.
ساراپشىلاردىڭ ايتۋىنشا, داۋلاسۋشىلار اراسىنداعى ءوزارا تۇسىنىستىك پەن كەلىسىمگە نەگىزدەلگەن بۇل ءتاسىل الەۋمەتتىك تۇراقتىلىق پەن ازاماتتىق تاتۋلىقتى نىعايتۋعا ايرىقشا ىقپال ەتىپ وتىر.
مەدياتسيا – تاراپتاردىڭ مۇددەسىن ەسكەرەتىن, بەيبىت كەلىسىم ارقىلى داۋ شەشۋدىڭ ءادىسى. بۇل ءراسىمنىڭ باستى ارتىقشىلىقتارىنىڭ ءبىرى – ۋاقىت ۇنەمدەيدى, شىعىن از بولادى جانە قۇپيالىلىق ساقتالادى. مەدياتورلار تەك كەلىسسوز جۇرگىزىپ قانا قويماي, ەكى جاقتىڭ ورتاق مۇددەسىن تابۋعا باعىتتالعان ادىستەمەلەردى قولدانادى.
ادىلەت مينيسترلىگىنىڭ مالىمەتىنشە, بيىلعى العاشقى جارتىجىلدىقتا رەسپۋبليكا بويىنشا 15 مىڭنان استام داۋلى ءىس مەدياتسيا ارقىلى شەشىلگەن. بۇل كورسەتكىشتىڭ جىل سايىن ارتىپ كەلە جاتقانى بايقالادى.
مەدياتسيا تەتىگى نەگىزىنەن وتباسىلىق, ەڭبەك, ازاماتتىق جانە كەي جاعدايدا قىلمىستىق ىستەردە قولدانىلادى. اسىرەسە, وتباسىلىق جانجالدار مەن كورشىلەر اراسىنداعى داۋ-داماي, ەڭبەك قاتىناستارى بويىنشا تۇسىنىسپەۋشىلىكتەردى سوتسىز رەتتەۋ تاجىريبەسى كەڭ ءورىس الىپ وتىر.
— قازىرگى قوعامدا مەدياتسيا مادەنيەتىن قالىپتاستىرۋ ماڭىزدى. بۇل – ءار ازاماتتىڭ قۇقىعى مەن جاۋاپكەرشىلىگىن سەزىنۋىنە, داۋ تۋىنداعان جاعدايدا ءبىر-ءبىرىن تىڭداپ, ورتاق شەشىمگە كەلۋىنە كومەكتەسەتىن قۇرال. قازىر ەلىمىزدە كاسىبي مەدياتورلار سانى 3 مىڭنان استى. بۇل كورسەتكىش مەدياتورلارعا دەگەن سۇرانىستىڭ ارتىپ كەلە جاتقانىن كورسەتەدى, — دەيدى كاسىبي مەدياتور, زاڭگەر سارا قاپانوۆا.
سوڭعى جىلدارى مەدياتسيا ينستيتۋتىن اۋىل-ايماقتاردا دامىتۋعا ەرەكشە كوڭىل بولىنۋدە. وبلىستىق سوتتار جانىنان تاتۋلاستىرۋ ورتالىقتارى اشىلىپ, جەرگىلىكتى تۇرعىندارعا قۇقىقتىق كومەك كورسەتىلۋدە. سونىمەن قاتار, ارداگەرلەر كەڭەسى مەن انالار القاسى سەكىلدى قوعامدىق ۇيىمدار دا تاتۋلاستىرۋ ۇردىسىنە بەلسەندى ارالاسا باستادى.
ماسەلەن, جامبىل وبلىسىنىڭ بايزاق اۋدانىندا 2024 جىلى 150-دەن استام ءىس مەدياتيۆتىك تارتىپپەن شەشىلسە, ونىڭ 70 پايىزدان استامى وتباسىلىق-تۇرمىستىق جانجالدار بولعان. بۇل – اۋىل تۇرعىندارى اراسىندا دا بالاما شەشىم ىزدەۋ مادەنيەتىنىڭ قالىپتاسىپ كەلە جاتقانىن بىلدىرەدى.
ەلىمىزدە مەدياتسيا ينستيتۋتىن دامىتۋ جونىندە ارنايى جول كارتاسى ازىرلەنگەن. جوعارعى سوت, ادىلەت مينيسترلىگى, كاسىبي قاۋىمداستىقتار مەن ۇكىمەتتىك ەمەس ۇيىمدار بىرلەسىپ, قۇقىقتىق مادەنيەتتى ارتتىرۋ, حالىققا قولجەتىمدى اقپارات بەرۋ باعىتىندا جۇمىس جۇرگىزۋدە.
— مەدياتسيا – تەك داۋدى شەشۋ عانا ەمەس, قوعامدا سەنىم مەن ءوزارا قۇرمەتكە نەگىزدەلگەن قارىم-قاتىناستى ورنىقتىرۋدىڭ ءتيىمدى جولى. مەملەكەتتىڭ باستى ماقساتى – سوت سالاسىنداعى جۇكتەمەنى ازايتا وتىرىپ, ازاماتتاردىڭ ءوزارا ىمىراعا كەلۋىنە جاعداي جاساۋ, — دەيدى جوعارعى سوت جانىنداعى سوتتاردىڭ قىزمەتىن قامتاماسىز ەتۋ دەپارتامەنتىنىڭ وكىلى نۇرلان ەسەن.
مەدياتسيا كۇنى – تەك كاسىبي مەرەكە ەمەس, ازاماتتىق قوعامدى دامىتۋدىڭ جانە قۇقىقتىق سانانى ارتتىرۋدىڭ ءبىر كورىنىسى. قوعامدىق كەلىسىم مەن تۇراقتىلىققا باستايتىن وسى جولدا مەدياتورلار ەڭبەگىنىڭ ماڭىزى زور. مەدياتسيا – بۇگىننىڭ دە, كەلەشەكتىڭ دە مادەنيەتى.
