وپەراتسياعا بىرنەشە مەملەكەتتىك ورگان قاتىسىپ جاتىر
قورعانىس مينيسترلىگىنىڭ ماماندارىنان بولەك, ىزدەۋگە:
- توتەنشە جاعدايلار مينيسترلىگى
- ىشكى ىستەر مينيسترلىگى
- جانە باسقا دا مەملەكەتتىك قۇرىلىمداردىڭ قىزمەتكەرلەرى قاتىسىپ جاتىر.
قورعانىس ءمينيسترى, اۆياتسيا گەنەرال-لەيتەنانتى داۋرەن قوسانوۆتىڭ تاپسىرماسىمەن ارنايى كوميسسيا قۇرىلدى. ونىڭ قۇرامىنا مەملەكەتتىك اۆياتسيانىڭ ۇشۋ قاۋىپسىزدىگى دەپارتامەنتىنىڭ جوعارى بىلىكتى ماماندارى كىردى.
كوميسسيانىڭ ءبىر بولىگى – ىزدەستىرۋ شارالارىنا, ەكىنشى بولىگى — اۆياتسيالىق وقيعانى تەرگەۋ جۇمىستارىنا جۇمىلدىرىلعان.
ىزدەستىرۋ جۇمىستارى:
- كول تۇبىندەگى تەرەڭ شوگۋ,
- سۋ استىنداعى كورىنۋدىڭ مۇلدە بولماۋى,
- اۋا رايىنىڭ قۇبىلمالىلىعى سياقتى كۇردەلى جاعدايلارعا قاراماستان, تاۋلىك بويى جالعاسۋدا.
اۋە ارقىلى قيىن وتەتىن اۋماقتارعا شولۋ جاسالىپ, جاعالاۋ مەن كول اكۆاتورياسى تۇگەل تەكسەرىلۋدە.
عىلىمي جانە تەحنيكالىق ۇيىمدار ارنايى جابدىقتارمەن سۋ استى جانە جەر ۇستىندەگى ىزدەۋ جۇمىستارىنا تارتىلعان.
كوميسسيا مىناداي فاكتورلاردى زەردەلەپ جاتىر:
- اۋە كەمەسىن دايىنداۋ جانە پايدالانۋ قۇجاتتاماسى
- قۇقىق قورعاۋ ورگاندارى مەن اۆياتسيالىق قىزمەتتەردىڭ ماتەريالدارى
- تىكۇشاق باعىتى بويىنشا مەتەورولوگيالىق جانە ورنيتولوگيالىق جاعداي جانە وزگە دە ىقتيمال سەبەپتەر
«ىزدەستىرۋ جۇمىسى تىكۇشاق ەكيپاجىنىڭ تاعدىرى انىقتالىپ, قايعىلى جاعدايعا نە سەبەپ بولعانى تولىق زەرتتەلگەنگە دەيىن جالعاسادى», – دەدى اسكەري-اۋە كۇشتەرىنىڭ قولباسشىسى, اۆياتسيا گەنەرال-مايورى اسقار ءىزباسوۆ.
