شىلدە ايىندا ازىق-ت ۇلىك باعاسى تۇراقتاندى ما؟

ينفلياتسيالىق جاعداي تۋرالى ۇلتتىق ەكونوميكا ۆيتسە-ءمينيسترى ازامات ءامرين بايانداما جاسادى. ۆيتسە-ءمينيستردىڭ مالىمەتىنشە, 2025 جىلعى شىلدەدە قازاقستاندا جىلدىق ينفلياتسيا 11,8 پايىز دەڭگەيىندە ساقتالعان. جىلدىق ازىق-ت ۇلىك ينفلياتسياسى 11,2 پايىزدى قۇرادى. تاۋارلار مەن قىزمەتتەردىڭ ايلىق باعاسىنىڭ ءوسۋ قارقىنى 0,8 پايىزعا جەتىپ, ماۋسىم ايىمەن سالىستىرعاندا 0,1 پايىزعا تومەندەگەن. اقىلى قىزمەتتەر ءوسىمى 14,9 پايىزدى قۇراعانمەن, الدىڭعى ايمەن سالىستىرعاندا 1,2 پايىزدىق تارماققا تومەندەگەن.

جيىندا الەۋمەتتىك ماڭىزى بار ازىق-ت ۇلىك ونىمدەرى نارىعىنداعى جاعداي تۋرالى  ساۋدا جانە ينتەگراتسيا ءبىرىنشى ۆيتسە-ءمينيسترى ايجان بيجانوۆا باياندادى. ونىڭ دەرەگىنشە, شىلدە ايىندا وسى سەگمەنتتەگى اپتالىق ورتاشا باعا ديناميكاسى 0,1 پايىزدان تومەن دەڭگەيدە بولىپ, ونىمدەردىڭ باسىم بولىگىنىڭ باعاسى تۇراقتانعان. ءبىر اي ىشىندە: ءسابىز 9,1 پايىزعا, كارتوپ 7,9 پايىزعا, پياز 1,8 پايىزعا, كۇرىش 0,6 پايىزعا, جۇمىرتقا 0,1 پايىزعا ارزانداعان. ال نان, ماكارون جانە ءسۇت ونىمدەرىنىڭ باعاسى تۇراقتى بولعان.

كەي ونىمدەر قىمباتتاعان: قىرىققابات باعاسى ءبىر ايدا 12,3 پايىزعا وسكەنىمەن, شىلدەنىڭ سوڭعى اپتاسىندا باعا تومەندەگەن. تاۋىق ەتى 2,6 پايىزعا قىمباتتاعان. سيىر  ەتىنىڭ باعا ءوسىمى باسەڭدەپ, 1,4 پايىزدى قۇراعان. 

كۇنباعىس مايى نارىعىن رەتتەۋ ماقساتىندا مايلى داقىلدار وڭدەۋشىلەرىنىڭ ۇلتتىق  اسسوتسياتسياسىمەن كەلىسىم جاسالعان. اۋىل شارۋاشىلىعى مينيسترلىگى مەن ساۋدا جانە ينتەگراتسيا مينيسترلىگىنىڭ قاتىسۋىمەن وتكەن كەلىسسوزدەر قورىتىندىسىندا حالىققا قولجەتىمدى باعادا ءونىمدى ساتۋ جونىندەگى ۇشجاقتى مەموراندۋمعا قول قويىلدى.

«ارالتۇز» كومپانياسىمەن بىرلەسىپ, ءونىم باعالارىن كەزەڭ-كەزەڭمەن تومەندەتۋ تۋرالى الدىن الا كەلىسىمگە قول جەتكىزىلدى. قاجەتتى شارالاردى جىل سوڭىنا دەيىن جۇزەگە اسىرۋ جوسپارلانىپ وتىر.

ايماقتاعى جاعدايلارعا توقتالا كەلە ايجان بيجانوۆا استانا, الماتى, تۇركىستان جانە الماتى وبلىستارىندا باعانىڭ ءوسۋ قارقىنىنىڭ باسەڭدەگەنىن اتاپ ءوتتى. بۇل وڭىرلەر جالپى ۇلتتىق كورسەتكىشتىڭ تۇراقتالۋىنا ىقپال ەتكەن.

سيىر ەتىنىڭ باعاسىن ۇزاق مەرزىمدى تۇراقتاندىرۋ ماقساتىندا اۋىل شارۋاشىلىعى مينيسترلىگى كەشەندى شارالار قابىلداپ جاتقانىن حابارلادى. ءىرى قارا مال باسى مەن ۇساق مالدى كاسىبي جەمدەۋگە ماماندانعان كاسىپورىندارعا اينالىم قاراجاتىن تولىقتىرۋ باعدارلاماسى ىسكە قوسىلعان. اسىل تۇقىمدى انالىق مال باسىن ساتىپ الۋ ءۇشىن جىلدىق 5 پايىزدىق مولشەرلەمەدە جەڭىلدەتىلگەن نەسيە مەحانيزمى ازىرلەندى. سونىمەن قاتار, وڭدەۋشى كاسىپورىندارعا ساتىلعان ءار كيلوگرامم سيىر ەتى ءۇشىن 175 تەڭگە مولشەرىندە سۋبسيديا بەرىلەدى. بۇدان بولەك, كۇرىش پەن قاراقۇمىق باعالارىن تۇراقتاندىرۋ ءۇشىن «پرودكورپوراتسيا» وندىرۋشىلەر مەن وڭدەۋشىلەر اراسىندا وسى ونىمدەردىڭ قورىن قالىپتاستىرۋ تۋرالى ۇشجاقتى مەموراندۋمعا قول قويعان.

جيىندى قورىتىندىلاي كەلە سەرىك جۇمانگارين ەگىن جيناۋ ماۋسىمىندا كوكونىس ونىمدەرىنىڭ باعاسىن تۇراقتاندىرۋ ماقساتىندا وڭىرلەردە اۋىل شارۋاشىلىق جارمەڭكەلەرىن بەلسەندى وتكىزۋدى, ىشكى نارىقتاعى ۇسىنىستى ارتتىرىپ, باعانى تومەندەتۋ ءۇشىن قىرعىزستان, وزبەكستان جانە تۇرىكمەنستان شەكارالارىندا كوكونىس-جەمىس ونىمدەرىنە ارنالعان  «جاسىل ءدالىز» ۇيىمداستىرۋدى تاپسىردى.