سۋرەت: gov.kz
- 14-16 تامىز ارالىعىندا استانادا تاەكۆوندودان كادەتتەر, جاستار, ەرەسەكتەر اراسىندا اسا ءىرى حالىقارالىق ءتۋرنيردىڭ جالاۋى جەلبىرەيدى. قازىردىڭ وزىندە 22 مەملەكەتتىڭ 750-دەن اسا سپورتشىسى وسى جارىسقا قاتىساتىندارىن راستادى. ولار – تۇركيا, ءباا, ءۇندىستان, قىتاي, اۋعانستان, ارمەنيا, كانادا, اقش, فرانتسيا, يران, كۋۆەيت, قىرعىزستان, ومان, ليۋكسەمبۋرگ, ماروككو, نەپال, پاكىستان, پالەستينا, ساۋد ارابيا, تۋنيس, رەسەي. ءتۋرنيردىڭ جۇلدە قورى – 15 808 000 تەڭگە.
- ەلىمىزدىڭ ەڭ ۇزدىك تەننيسشىسى ەلەنا رىباكينا كانادانىڭ مونرەال قالاسىندا تۇساۋى كەسىلگەن WTA 1000 ءتۋرنيرىن ءساتتى باستادى. جۇلدە قورى 5 152 199 دوللاردى قۇرايتىن جارىستىڭ العاشقى اينالىمىندا بوس بولعان ول ەكىنشى كەزەڭدە الەمنىڭ 50-راكەتكاسى امەريكالىق حەيلي باپتيستتەن 6:4, 6:3 ەسەبىمەن باسىم ءتۇستى. ءۇشىنشى كەزەڭدە رۋمىنيالىق جاكلين كريستياندى جەڭدى, ەسەپ – 6:0, 7:6. ءتورتىنشى كەزدەسۋىن ەلەنا ۋكراينالىق دايانا ياسترەمسكاياعا قارسى وتكىزەدى. يۋليا پۋتينتسەۆا دودانىڭ تۇساۋكەسەر باسەكەسىندە قىتايلىق حانيۋي گوعا جول بەردى – 3:6, 3:6.
- UFC-دە اسا جەڭىل سالماق دارەجەسىندە كۇش سىناسىپ جۇرگەن ازات ماقسۇم (15-2) كەلەسى جەكپە-جەگىن 25 تامىزدا ءابۋ-دابيدە ء(باا) وتكىزەدى. قازاق فايتەرى اقش وكىلى ميتچ راپوسومەن (9-3) ايقاسادى. قوس سپورتشى دا سوڭعى باسەكەلەرىندە جەڭىلىستىڭ كەرمەك ءدامىن تاتتى. ازات چارلز دجونسون (اقش) پەن تاگير ۋلانبەكوۆتەن (رەسەي) ۇپاي سانىمەن ۇتىلسا, ميتچ اندرە ليما (برازيليا) مەن سۋ مۋداەردجيگە (قىتاي) ەسە جىبەردى.
- قۇرلىقتىق حوككەي ليگاسىندا (قحل) كۇش سىناسىپ جۇرگەن استانانىڭ «بارىس» كلۋبىنىڭ ساپى تاعى 12 ويىنشىمەن تولىقتى. ولار – دجوحار دۋداركيەۆ (قاقپاشى), ءمادي ديحانبەك, بەيبارىس ورازوۆ, كيريلل نيكيتين (قورعاۋشىلار), رۋسلان وسپانوۆ, سەميون سيمونوۆ, كيريلل لياپۋنوۆ, كيريلل كانكين, نيكولاي شۋلگا, ءادىل بەيسەمباەۆ, ءاسانالى رۋسلان ۇلى, ۆلاديمير كورچاگين (شابۋىلشىلار).
