بۇل روبوتتىڭ قولىنان نە كەلەدى, مۇمكىندىگى قانداي دەگەن ساۋالعا توقتالاتىن بولساق, ول وزدىگىنەن پرەپاراتتاردىڭ دوزاسىن ءدال ەسەپتەيدى. وعان قوسا, 360 گرادۋستىق كامەرا مەن كەسكىن بازاسى ارقىلى ءدارى-دارمەكتەردى انىقتاي الادى. شتريحكودتاردى تەكسەرىپ, كومپونەنتتەردى ارالاستىرۋعا دەيىنگى جانە كەيىنگى مولشەرىن ولشەيدى. ادام ارالاسپاسا دا, دوزالاۋ مەن دارىلىك پرەپاراتتاردىڭ قۇرامىن تاڭداۋدا قاتەلىك جىبەرمەيدى. پايدالانىلعان ماتەريالداردى وزدىگىنەن جويا وتىرىپ, ادامنىڭ قاۋىپتى زاتتارمەن جۇمىس ىستەۋىن بارىنشا ازايتادى. بۇل تەحنولوگيا بۇرىن ءدارى-دارمەكتەردى قولمەن دايىنداۋ بارىسىندا تسيتوتوكسيكالىق زاتتارمەن بايلانىسقا تۇسۋگە ءماجبۇر بولعان مەديتسينالىق قىزمەتكەرلەر ءۇشىن قاۋىپ-قاتەردى ايتارلىقتاي تومەندەتەدى.
«KiroOncology» روبوتى ەكى مەحانيكالىق مانيپۋلياتورمەن جابدىقتالعان, ولار پرەپاراتتاردى فلاكوندارعا قۇيۋ, ارالاستىرۋ ۇدەرىسىن تولىق اتقارادى. ۇدەرىس اياقتالعاننان كەيىن قۇرىلعى پايدالانىلعان بوتەلكەلەر مەن شپريتستەردى حيميوتەراپيا قالدىقتارىن قولعا ۇستاماي-اق, اۆتوماتتى تۇردە تىعىزدالاتىن گەرمەتيكالىق كونتەينەردە جويادى.
