قازىر ونىڭ اۋلاسىندا ءجۇزىمنىڭ بىرنەشە ءتۇرىن بەرەتىن 20 ءتۇپ ءوسىپ تۇر. ودان جىل سايىن شامامەن 2 مىڭ كوشەت الادى. جەمىس بەرەتىن كوشەتكە ەلىمىزدىڭ ءار وڭىرىنەن, 4 شەتەلدەن تاپسىرىس تۇسەدى.
«العاشىندا وزبەكستاندا وسەتىن ءجۇزىم تۇرلەرىن زەرتتەدىم. بۇل جەمىستى ءوسىرۋدىڭ وزىندىك قيىندىعى بار. ونىڭ قىر-سىرىنا قانىعىپ, ءبىراز تاجىريبە جينادىم. ءسويتىپ, 2012 جىلى ءجۇزىمنىڭ مول ءونىم بەرەتىن بىرنەشە كوشەتىن ەكتىم», دەيدى ب.حاسان ۇلى.
قازىر ونىڭ باقشاسىندا يۋبيلەي نوۆوچەركاسسكا, نينا, ريزامات, زارەۆو, پامياتي دجەنەەۆا, كراساۆا, الۆيكا, ۆەليكا, مانيكيۋر فينگەر, دنەپروۆسكي سۋۆەنير, ۆيكتور, ريزامات اتا, نادەجد ازوس, پامياتي نيگرۋليا, ۆودوگراي, كودريانكا, كراسوتكا, اۆاتار, ناحودكا كالۋگينا دەپ اتالاتىن ءجۇزىم تۇرلەرى ءونىم بەرەدى. ءجۇزىمنىڭ بۇل تۇرلەرىنەن جىل سايىن شامامەن 500 كيلو ءونىم جينايدى. كەيىن ودان كۇندەلىكتى داستارقانعا قويىلاتىن مەيىز, شىرىن, جەمىس قايناتپاسى مەن توساپ دايىندايدى.
ء«جۇزىمنىڭ ەرەكشە سورتتارىن شەتەلدەن ارنايى الدىرامىن. ءبىزدىڭ ءوڭىردىڭ تابيعاتىنا بەيىمدەيمىن. باستى ماقساتىم – ءجۇزىم شارۋاشىلىعىن قۇرىپ, ەل نارىعىن تولىقتاي وتاندىق جۇزىممەن قامتاماسىز ەتۋ. ەكسپورتقا ءونىم شىعارىپ, ەل ەكونوميكاسىنىڭ وركەندەۋىنە دە ۇلەسىمدى قوسسام دەيمىن. جاڭا سورتتار شىعارۋ ءۇشىن مەملەكەتپەن بىرلەسىپ ارنايى زەرتتەۋ ينستيتۋتىن قۇرۋ يدەياسىن كوتەرىپ ءجۇرمىن», دەيدى ءجۇزىم وسىرەتىن جىگىت.
ونىڭ باستاماسىن ىسكە اسىرۋ ءۇشىن اۋقىمدى جەر تەلىمى قاجەت. سونداي-اق عىلىمي زەرتتەۋ جۇمىسىن جۇرگىزەتىن ينستيتۋتتى جانداندىرۋعا كەمىندە 15–20 جىل كەتۋى مۇمكىن.
باعبان جىگىت «باۋىرجان جۇزىمدەرى» برەندىن قالىپتاستىردى. كەيىنگى ءۇش جىلدا وسى برەندپەن ءجۇزىم فەستيۆالىن وتكىزدى. اتالعان فەستيۆالعا مۇمكىندىگى شەكتەۋلى جانداردى شاقىرىپ, ولارعا قولداۋ كورسەتتى.
اتىراۋ وبلىسى
