فوتولار: مادەنيەت جانە اقپارات مينيسترلىگى
فورۋمعا مادەنيەت جانە اقپارات مينيسترلىگىنىڭ جاستار جانە وتباسى ىستەرى كوميتەتىنىڭ توراعاسى قايرات قامباروۆ, شقو اكىمىنىڭ ورىنباسارى ەربول نۇرعاليەۆ جانە شىۇ حاتشىلىعىنىڭ اكىمشىلىك-قۇقىقتىق ماسەلەلەر دەپارتامەنتىنىڭ كەڭەسشىسى تسزياو حۋايسين مىرزا قاتىستى.
مادەنيەت جانە اقپارات مينيسترلىگىنىڭ ءباسپاسوز قىزمەتىنىڭ مالىمدەۋىنشە فورۋم باعدارلاماسى ەكى پانەلدىك وتىرىستان تۇردى.
ءبىرىنشى وتىرىس جاستار ساياساتىنا ارنالدى. وندا شىۇ-عا مۇشە ەلدەردىڭ وزىق تاجىريبەلەرى تالقىلاندى. قايرات قامباروۆ ءوز سوزىندە قازاقستاننىڭ شانحاي ىنتىماقتاستىق ۇيىمىنىڭ بەدەلدى حالىقارالىق ۇيىم رەتىندە قالىپتاسۋى مەن دامۋىنا قوسقان ۇلەسىن اتاپ ءوتىپ, شىۇ اياسىنداعى ىنتىماقتاستىق قازاقستاننىڭ سىرتقى ساياساتىنداعى باستى باسىمدىقتاردىڭ ءبىرى ەكەنىن ءسوز ەتتى.
ەكىنشى پانەلدىك وتىرىستىڭ باستى تاقىرىبى – ناشاقورلىقتىڭ الدىن الۋ, بۇل باعىتتاعى وتاندىق تاجىريبەنى بۇۇ ەقب ايماقتىق جاستار جەلىسىنىڭ ءبىر بولىگى سانالاتىن «Esbol Qory» قوعامدىق قورى تانىستىردى. قور ينتەرنەت كەڭىستىگىندەگى ەسىرتكىگە قاتىستى ۆيرۋستىق كونتەنتتى انىقتاپ, بۇعاتتايتىن «MERGEN» اتتى اقپاراتتىق جۇيە ۇسىندى. بۇل جۇيەنىڭ ارقاسىندا قازاقستان اۋماعىندا 4000-نان استام ينتەرنەت-رەسۋرس انىقتالىپ, بۇعاتتالعان.
ەسكە سالايىق, شىعىس قازاقستان وبلىسىندا شىۇ جاس دارىندارى مەن كوشباسشىلارىنىڭ العاشقى كەزدەسۋى ءوتىپ, وعان شىۇ-عا مۇشە مەملەكەتتەردىڭ دەلەگاتتارى قاتىسىپ جاتىر. بۇل باستاما قر مادەنيەت جانە اقپارات مينيسترلىگى تاراپىنان جۇزەگە اسىرىلىپ وتىر. اتالعان ءىس-شارا 2024 جىلى 4 شىلدەدە استانادا وتكەن شىۇ-عا مۇشە مەملەكەتتەر باسشىلارى كەڭەسىنىڭ وتىرىسىندا قابىلدانعان كەلىسىمدەردىڭ جالعاسى سانالادى, جيىندا قاسىم-جومارت توقاەۆ قازىرگى زامان جاعدايىندا بىرلىك پەن كۇشتى بىرىكتىرۋدىڭ ماڭىزىن اتاپ وتكەنى ءمالىم.
