ساباقتىڭ پراكتيكالىق بولىگى ءۇش وقۋ نۇكتەسىندە جۇرگىزىلدى. اسكەري كومەندانت, پودپولكوۆنيك اسحات اسقار ۇلىنىڭ باسشىلىعىمەن جەكە قۇرامعا تەحنيكانى كۇزەتۋگە تاعايىندالعان قاراۋىلدىڭ مىندەتتەرى, ءارتۇرلى جاعدايدا ارەكەت ەتۋ ءتارتىبى, سونداي-اق اسكەري جۇكتەردى تاسىمالداۋ كەزىندە ولاردى كۇزەتۋدىڭ ەرەكشەلىكتەرى ءتۇسىندىرىلىپ, كورسەتىلدى. سونداي-اق كومەنداتۋرا وفيتسەرلەرى قاتىسۋشىلارعا جول ءجۇرۋ قۇجاتتارىن رەسىمدەۋ ءتارتىبىن جانە تەمىرجول ستانسالارىندا ايالداۋ ەرەجەلەرىن ءتۇسىندىردى.
«ساباق بارىسىندا باستى نازار تەحنيكانى پلاتفورمالارعا تيەۋ كەزىندەگى قاۋىپسىزدىك تالاپتارىنا, ونى دۇرىس بەكىتۋ مەن جاسىرۋ ەرەجەلەرىنە اۋدارىلدى. مۇنداي ساباقتار اسكەردىڭ جاۋىنگەرلىك دايارلىعىن ارتتىرۋعا جانە بولىمشەلەردى قايتا ورنالاستىرۋ مەن تەحنيكانى تاسىمالداۋ بارىسىندا بولاتىن كىدىرىستەردى بولدىرماۋعا ىقپال ەتەدى. اسكەري قىزمەتشىلەر قاجەتتى تاجىريبە جيناقتاپ, بارلىق قىزىقتىرعان سۇراقتارىنا جاۋاپتار الدى. قويىلعان مىندەتتەر تولىق ورىندالدى», دەدى پودپولكوۆنيك اسحات اسقار ۇلى.
ساباق بارىسىندا اۆتوكولىكتەردى تەمىرجول پلاتفورمالارى مەن ۆاگوندارعا تيەۋ مەن ءتۇسىرۋ, تەحنيكانى بەكىتۋ جانە ونى بۇركەمەلەۋ جۇمىستارى كورسەتىلدى. ەرەكشە نازار اۋدارارلىق جايت – كوشپەلى قاراۋىل ۇياشىقتارىنىڭ زاماناۋي جابدىقتالۋى بولدى. ەندى ول كۇن پانەلدەرىمەن قامتاماسىز ەتىلەدى. بۇل ءوز كەزەگىندە ۇزدىكسىز ەلەكتر قۋاتىمەن قامتاماسىز ەتۋگە مۇمكىندىك بەرەدى.
مامانداردىڭ ايتۋىنشا, اسكەري نىسانداردىڭ جاڭاشا جابدىقتاۋعا كوشۋى – بۇگىنگى زامان تالابى. الەمدە اسكەري مودەرنيزاتسيا ءورىس الىپ جاتىر. قازىرگى تەحنولوگيا دامىعان قوعامدا بۇل سالا دا كوشتەن قالماۋ كەرەك. سەبەبى جاڭا داۋىرمەن قاباتتاسىپ وركەندەۋ قورعانىس سالاسىنا جاڭا مۇمكىندىكتەر سىيلايدى. عالام ۇلكەن وزگەرىس الدىندا تۇر. بۇگىندە تسيفرلىق تەحنولوگيا, روبوتتەحنيكا, جاساندى ينتەللەكەت ادام ءومىرىنىڭ اجىراماس بولىگىنە اينالىپ ۇلگەردى. ەندىگى جەردە كەلەشەكتى بۇل تەحنولوگيالارسىز ەلەستەتۋ مۇمكىن ەمەس. ءوز كەزەگىندە اسكەر سالاسىنا دا روبوتتاندىرىلعان تەحنيكالار مەن جاساندى ينتەللەكتىنى جاپپاي ەنگىزۋ ءۇردىسى باستالدى. الەمدە بۇگىندە بولىپ جاتقان ءتۇرلى قاقتىعىس زاماناۋي تەحنيكاعا سۇيەنگەن اسكەردىڭ قانداي مۇمكىندىگى جوعارى ەكەنىن كورسەتەدى. سوندىقتان ماماندار ەلىمىزدىڭ اسكەري كۇش-قۋاتى جاڭا تەحنولوگيالارمەن جابدىقتالۋعا ءتيىس ەكەنىن ايتادى. ال ولاردى مەڭگەرگەن ساربازدى تاربيەلەۋدىڭ دە ماڭىزدىلىعى وتە جوعارى. قازىرگى زامانعى قازاق جاساعىنىڭ اسكەري دايىندىعى فيزيكالىق دەنە تاربيەسىمەن بىرگە ەڭ سوڭعى ۇلگىدەگى تەحنيكالاردى يگەرگەن اقىل-وي پاراساتىمەن دە ولشەنۋگە ءتيىس. وسى تالاپ ۇدەسىنەن شىقپاي, مىقتى اسكەر جاساقتاۋ مۇمكىن ەمەس. مىنە, وسى ماقساتقا وراي مەگاپوليستەگى اسكەري بولىمدەردىڭ جاۋىنگەرلەرىن تەحنيكالاردى مەڭگەرۋگە, ولاردى تاسىمالداپ كۇتىپ ۇستاۋعا ۇيرەتىپ جاتىر. سونىمەن بىرگە التايدان اتىراۋعا دەيىنگى اتىراپتى الىپ جاتقان كەڭ دالانىڭ ءبىر قيىرىنان ەكىنشى شەتىنە اسكەردى جەتكىزۋ ءۇشىن دە الەۋەتتى لوگيستيكا قاجەت. ال تەحنيكا تاسىمالداۋدىڭ مۇمكىندىگىن ىسكە اسىراتىن, ارينە, تەمىرجول قىزمەتى. سول سەبەپتى, تەحنيكانى جىلدام ءارى تياناقتى تۇردە ۆاگوندار مەن پلاتفورمالارعا تيەۋ ارنايى دايىندىقتان وتكەن جاساقتىڭ باستى مىندەتى بولىپ سانالادى. تەحنيكا تيەيتىن جاۋىنگەرلەردى وسى ءبىر كۇردەلى ىسكە باۋلىپ, شەبەرلىگىن شىڭداۋ – اسكەري قىزمەت ماماندارىنىڭ نەگىزگى جۇمىسى. ولاردىڭ ايتۋىنشا, ءاربىر تەحنيكا باعالى. سوندىقتان ونى كۇتىپ ۇستاۋ, تاسىمالداۋ كەزىندە ساقتىق شارالارىنا كوڭىل ءبولىپ, بارلىق قاۋىپسىزدىك ەرەجەلەرىن بۇلجىتپاي ورىنداۋ – ءاربىر جاۋىنگەر مەن قورعانىس سالاسى قىزمەتكەرلەرىنىڭ اينىماس پارىزى. وسى ورايدا ءتيىستى اسكەري ءبولىم بۇگىنگى تاڭدا الەمنىڭ ءار تۇكپىرىندە بولىپ جاتقان قارۋلى قاقتىعىستاردى ەسكەرە كەلە, اسكەري جاتتىعۋلاردىڭ بارىنشا شىنايى جاعدايعا جاقىن بولۋىنا نازار اۋدارىپ وتىر.
اسكەري ساراپشىلاردىڭ پىكىرىنشە, بۇگىندە مايدان دالاسىندا ۇرىس جۇرگىزۋدىڭ ءادىس-ءتاسىلى تولىقتاي وزگەرگەن. بۇرىنعىداي ادام سانىمەن جاۋدى جەڭۋ ستراتەگياسى قازىر ەسكىرگەن. وسى كۇندە زاماناۋي اسكەري تەحنيكا مەن بەلگىلەنگەن نۇكتەگە جىلدام ءارى ءدال تۇسەتىن اتىس قارۋلارى جەڭىسكە باستايدى. مۇنىمەن قوسا, جوعارىدا ايتىلىپ وتكەندەي, شايقاس الاڭىنا ۇزدىكسىز قارۋ قۇرالدارى مەن تەحنيكالارىن جەتكىزىپ تۇرۋ ءۇشىن لوگيستيكا وتە ماڭىزدى ءرول وينايدى. جاۋ شەبىن جالاڭاش قالدىرماۋ وسى اسكەري تاسىمال سالاسىنىڭ مۇلتىكسىز قىزمەتىنە بايلانىستى. وسى سەبەپتى گارنيزون باسشىلىعى ساربازداردىڭ ءوز مىندەتىن ساپالى اتقارۋعا بارىنشا كوڭىل بولەدى. سول ءۇشىن جىل سايىن كوپتەگەن اسكەري جاتتىعۋ تۇراقتى وتكىزىلىپ تۇرادى. بۇل شىنايى جانجال تۋىنداي قالعان جاعدايدا جاۋىنگەرلەردىڭ اسپاي-ساسپاي, ءوز جۇمىسىن ءمىنسىز ءارى كاسىبي تۇرعىدا اتقارۋى ءۇشىن قاجەت.
ساراپشىلاردىڭ پىكىرىنشە, مەملەكەتتىڭ قورعانىس سالاسىن كۇشەيتىپ جاتقانى قۋانتادى. وسى تۇستا جاڭا قارۋ مەن تەحنيكالار ساتىپ الۋدان بولەك, ولاردى وزىمىزدە جاساۋعا دەن قويا باستاعانىمىز كوڭىلگە مەدەت سىيلايدى. قاي ەلدىڭ اسكەري ونەركاسىپتىك كەشەنى وركەندەسە, سونىڭ اسكەرى مىقتى دەگەن ءسوز. ياعني شىنايى سوعىس جاعدايىندا سىرتتان اكەلگەن قارۋعا سۇيەنىپ وتىرۋ مۇمكىن ەمەس. وتاندىق اسكەري تەحنولوگيا مەن ونەركاسىپ سالاسى دامىماسا, جەڭىس تۋىن جەلبىرەتۋ قاي ەلگە بولسا دا قيىن.
ال ماقالانىڭ باسىندا ايتىپ وتكەنىمىزدەي, قاراۋىل ۇياشىقتارىنىڭ كۇن پانەلدەرىمەن جابدىقتالىپ, تۇراقتى ەلەكتر ەنەرگياسىمەن قامتاماسىز ەتىلۋى قازاقستان اسكەرىنىڭ زاماناۋي دامۋ جولىنا قاراي باعىت العانىن ايعاقتايدى.
