تاياۋدا عانا شۆەيتساريانىڭ گشتااد قالاسىندا اياقتالعان ATP 250 تۋرنيرىندە توپ جارعان الەكساندر بۋبليك ءوز جانكۇيەرلەرىن تاعى دا قۋانتتى. بۇل جولى ول اۋستريانىڭ كيتسبيۋەلىندە جۇلدە قورى 596 035 ەۋرونى قۇراعان جارىستا باس جۇلدەنى ولجالادى. تۇساۋكەسەر كەزدەسۋىندە تياگو-اگۋستين تيرانتەنى (ارگەنتينا) تىزە بۇكتىرگەن بۋبليك كەلەسى كەزەڭدە ءوزىنىڭ كوماندالىق ارىپتەسى الەكساندر شەۆچەنكوعا شاڭ قاپتىردى. جارتىلاي فينالدا نيدەرلاندىق بوتيك ۆان دە زاندسحۋلدى (نيدەرلاند) جەڭگەن جەرلەسىمىز فينالدا ارتۋر كازانى قاپى قالدىردى. 1 ساعات 26 مينۋتقا سوزىلعان سايىس 6:4, 6:3 ەسەبىمەن اياقتالدى. بۇل – ا.بۋبليكتىڭ اتر دودالارىنداعى جەتىنشى تيتۋلى.
اقش استاناسى – ۆاشينگتوندا جۇلدە قورى 1 282 951 دوللاردى قۇراعان WTA ءتۋرنيرى مارەگە جەتتى. اتالعان جارىستا ەلىمىزدىڭ ەكى تەننيسشىسى ونەر كورسەتتى. يۋليا پۋتينتسەۆا العاشقى اينالىمدا «ۇلكەن دۋلىعا» دودالارىنىڭ ءتورت دۇركىن جەڭىمپازى, الەمنىڭ بۇرىنعى ءبىرىنشى راكەتكاسى ناومي وساكادان (جاپونيا) ۇتىلسا, ەلەنا رىباكينا جارتىلاي فينالدىق مەجەگە دەيىن جەتتى. ەلىمىزدىڭ ەڭ ۇزدىك ويىنشىسى ۆيكتوريا مبوكو (كانادا) مەن ماگدالەنا فرەنحتى (پولشا) ۇتقانىمەن, ودان كەيىن ويدا-جوقتا الەمدىك رەيتينگتە وزىنەن الدەقايدا تومەن تۇرعان لەيلا فەرناندەسكە (كانادا) ەسە جىبەردى. بۇل باسەكەدەگى بارلىق سەت تاي-برەيككە ۇلاستى – 7:6, 6:7, 6:7. ءدال وسى ءتۋرنيردىڭ ەرلەر اراسىنداعى سايىسىندا بەيبىت جۇقاەۆ باق سىنادى. ول ىرىكتەۋ سىنىنان ىركىلمەي وتكەنىمەن, باستى جارىستىڭ باستاپقى باسەكەسىندە الەكساندر ميۋللەردىڭ (فرانتسيا) وسال تۇسىن تابا المادى.
بيىل عانا جاراقاتىنان ايىعىپ, ەندى-ەندى بابىنا كەلە باستاعان زارينا دياس ماۋسىم ايىنىڭ اياعىندا يسپانياداعى جارىستىڭ جەڭىمپازى اتانسا, كۇنى كەشە عانا پورتۋگاليانىڭ فيگەيرا-دا-فوش قالاسىندا شىمىلدىعى تۇرىلگەن ITF تۋرنيرىنە قاتىستى. پيرەنەي تۇبەگىندە بىرقاتار قارسىلاسىنان باسىم تۇسكەن ول جارتىلاي فينالدا ماريا تيموفەەۆاعا (رەسەي) 2:6, 2:6 ەسەبىمەن جول بەردى.
فينليانديانىڭ تامپەرەسىندە دميتري پوپكو مەن تيموفەي سكاتوۆ ءساتسىز ونەر كورسەتتى. العاشقى اينالىمدا پوپكو بەلگيالىق جيلەم-ارنو بايدەن, سكاتوۆ فرانتسيالىق توماس فارۋەلدەن ۇتىلدى.
سەنبى كۇنى استانادا ەلىمىزدىڭ جازعى چەمپيوناتى اياقتالدى. ەرلەر اراسىندا باس جۇلدەنى 17 جاستاعى جاس دارىن ءامىر ومارحانوۆ پەن 27 جاستاعى تاجىريبەلى گەورگي لوماكين ءوزارا ساراپقا سالدى. ءبىرىنشى سەت 6:1 ەسەبىمەن 17 جاستاعى ومارحانوۆتىڭ پايداسىنا شەشىلدى. ەكىنشى سەتتە جاراقات الۋىنا بايلانىستى لوماكين باسەكەنى جالعاستىرۋدان باس تارتتى. قولا جۇلدەنى يسلام ورىنباسار جەڭىپ الدى. ايەلدەر اراسىندا جىبەك قۇلامباەۆاعا تەڭ كەلەر ەشكىم تابىلمادى. فينالدا ول ارۋجان ساعىندىقوۆاعا سان سوقتىردى. ءۇشىنشى ورىندى ىڭكار دۇيسەباي يەلەندى.
