فوتو: اشىق دەرەككوز
ەڭ الدىمەن, مادەنيەت جانە اقپارات ءمينيسترىنىڭ بۇيرىعىمەن ءجۋرناليستىڭ بەيبىت جيىنداردا جۇمىس ىستەۋ ءتارتىبى جانە ولاردى تانۋعا ارنالعان ارنايى ايىرىم بەلگىلەرىنىڭ ۇلگىسى بەكىتىلدى. بۇل شەشىم – جۋرناليستەردىڭ قوعامدىق ءىس-شارالاردا كاسىبي مىندەتىن قاۋىپسىز ءارى ەركىن اتقارۋىنا قۇقىقتىق نەگىز بەرەتىن ماڭىزدى قۇجات. ەندى كەز كەلگەن ميتينگ, شەرۋ نەمەسە جينالىس كەزىندە جۋرناليستەردىڭ ءرولى مەن جاۋاپكەرشىلىگى ناقتى بەلگىلەنىپ, ولاردىڭ قاۋىپسىزدىگىنە كەپىلدىك بەرىلەدى.
سونىمەن قاتار, قازاقستان رەسپۋبليكاسى پارلامەنتى جاڭا سالىق كودەكسىن قابىلداپ, وتاندىق مەرزىمدى باسپا باسىلىمدارى ءۇشىن قوسىلعان قۇن سالىعىنىڭ جەڭىلدەتىلگەن مولشەرلەمەسىن – 10% كولەمىندە قولدانۋ تۋرالى نورمالاردى ەنگىزدى. بۇل جەڭىلدىك ەلىمىزدەگى گازەت-جۋرنالداردىڭ قارجىلىق جاعدايىن جەڭىلدەتىپ, ساپالى باسىلىمداردىڭ ومىرشەڭ بولۋىنا ىقپال ەتەدى. باسپا ءونىمىنىڭ باعاسىن كوتەرمەي, ونى كەڭ اۋديتورياعا قولجەتىمدى ەتىپ ۇسىنۋعا مۇمكىندىك بەرەدى.
حالىقتىڭ مەدياساۋاتتىلىعىن ارتتىرۋ جانە مەديا ماماندارىنىڭ بىلىكتىلىگىن كوتەرۋ ماقساتىندا 2025 جىلعا دەيىنگى كەشەندى جوسپار بەكىتىلدى. مينيسترلىكتىڭ مالىمەتىنشە, جوسپار اياسىندا جىلدىڭ العاشقى جارتىسىندا بىرقاتار ناقتى ىستەر جۇزەگە استى. اتاپ ايتقاندا, سالالىق جۋرناليستيكانى دامىتۋ باعىتىندا 8 وقىتۋ ءىس-شاراسى ۇيىمداستىرىلىپ, ولارعا 600-دەن استام بۇقارالىق اقپارات قۇرالدارى وكىلدەرى مەن جۋرناليستيكا ماماندىعىندا وقيتىن ستۋدەنتتەر قاتىسقان. سونىمەن قاتار ورتالىق مەملەكەتتىك ورگانداردىڭ, جەرگىلىكتى اتقارۋشى بيلىكتىڭ جانە كۆازيمەملەكەتتىك قۇرىلىمداردىڭ 400-گە جۋىق ءباسپاسوز حاتشىسى وسى وقىتۋدان ءوتتى.
بۇدان بولەك, ەلىمىزدىڭ جەتەكشى جوعارى وقۋ ورىندارىمەن سالالىق جۋرناليستيكانى دامىتۋعا ارنالعان 10 مەموراندۋمعا قول قويىلدى. بۇل مەموراندۋمدار ءبىلىم جۇيەسى مەن پراكتيكالىق مەدياجۇمىستى بىرىكتىرىپ, بولاشاق جۋرناليستەردى ناقتى نارىق تالاپتارىنا ساي دايارلاۋعا مۇمكىندىك بەرەدى.
