اق حالاتتىلارعا اراشا

ەندى دارىگەرگە قول كوتەرگەندەر سوتتالادى

كەيىنگى 5 جىلدا قازاقستاندا 170-گە جۋىق دارىگەر سوققىعا جىعىلعان. بىلتىردىڭ وزىندە  پاۆلوداردا جەدەل جاردەم قىزمەتكەرىنە قول كوتەرۋ وقيعاسى, اتىراۋدا  20 جاستاعى ازاماتتىڭ فەلدشەردى سوققىعا جىعۋى سىندى جاعدايلاردى جالعاي بەرۋگە بولادى. سوندا قوعام تارتىپسىزدىككە تۇساۋ سالۋ قاجەت ەكەنىن ايتقان. جەلىگە جاريالانباي, ەلگە ەستىلمەي جاتقان وقيعالارمەن قوسا, قوستانايدا حيرۋرگتىڭ زارداپ شەگۋى قوردالانعان ماسەلەگە قوزعاۋ سالدى. بۇل جولى اق حالاتتىلارعا پرەزيدەنتتىڭ ءوزى اراشا ءتۇستى. مەملەكەت باسشىسى مەديتسينا قىزمەتكەرلەرىنە شابۋىل جاساپ, كۇش قولدانىپ جانە قاتىگەزدىك تانىتقان ارەكەتتەرگە قاتىستى جازانى قاتاڭداتۋ ماقساتىندا ۇلتتىق زاڭناماعا وزگەرىستەر ەنگىزۋ تۋرالى ۇكىمەتكە تاپسىرما بەردى. ەندى  وزگەنىڭ ءومىرى ءۇشىن ارپالىساتىن ازاماتتاردىڭ الاڭسىز جۇمىس اتقارۋى ءۇشىن قۇقىق بۇزۋشىلاردى 2 جىلدان 15 جىلعا دەيىن باس بوستاندىعىنان ايىرۋ كوزدەلىپ وتىر. تارتقاتساق, اق حالاتتىلارعا شابۋىل جاساعاندار 2-دەن 7 جىلعا دەيىن باس بوستاندىعىنان ايىرىلادى. توتەنشە جاعدايدا جاسالعان ارەكەتى ءۇشىن 10 جىلعا دەيىن, وسى ارەكەت بىرنەشە رەت قايتالانسا  15 جىلعا سوتتالادى.

«زاڭناماداعى وزگەرىستى قۋانىشپەن قابىلدادىق» 

اتىراۋ وبلىستىق فتيزيوپۋلمانولوگيالىق ورتالىعى ديرەكتورىنىڭ ورىنباسارى مىندەتىن ۋاقىتشا اتقارۋشى مارات شۋاقباەۆ بۇل جاڭالىقتى كاسىبي قاۋىم قۋانىشپەن قارسى العانىن ايتتى.

«پاتسيەنتتەردىڭ نارازىلىعى كەيدە مەديتسينا قىزمەتكەرلەرىنە قول كوتەرۋگە دەيىن بارادى. مۇنداي جاعدايدا مەديتسينا قىزمەتكەرلەرى كىنالى دەپ بىرجاقتى شەشىم شىعارۋعا بولمايدى. مەديتسينا سالاسىنداعى ۇيىمداستىرۋ مەن بۇعان دەيىنگى زاڭ تالاپتارىنىڭ وسالدىعى كوپتەگەن ينتسيدەنتتەرگە سوقتىردى. ال الەۋمەتتىك جەلىدە حيرۋرگ دارىگەرىنە قول جۇمساعانى وتە ورەسكەلدىك دەپ ويلايمىن», دەگەن فتيزيوپەدياتر 37 جىلدىق ەڭبەك وتىلىندە ءوزى دە وسىنداي ومىرىنە قاۋىپ توندىرگەن جاعدايمەن بەتپە-بەت كەلگەن. «اۋىلدا جۇمىس ىستەپ جۇرگەندە پسيحيكالىق اۋىتقۋى بار پاتسيەنتتىڭ بالتا الا جۇگىرگەن كەزى دە بولدى. پاتسيەنتتەرمەن, ولاردىڭ جاناشىرلارىمەن ارادا ءتۇرلى كيكىلجىڭدەر تۋعاندا زاڭ اياسىندا ءتۇسىندىرۋ جۇمىستارىن جۇرگىزەمىن. پرەزيدەنت تاپسىرماسى وسى وزەكتى ماسەلەگە باعىتتالعانىن تولىق قۇپتايمىن», دەدى مارات شۋاقباەۆ.

ال الماتىلىق ينفەكتسيونيست-دارىگەر, پەدياتر امانگۇل جولمىرزاقىزى ناۋقاستىڭ ءومىرىن ساقتاۋ ءۇشىن تاۋلىك بويى ەڭبەك ەتىپ جۇرگەندە دارىگەردىڭ اگرەسسياعا, قىسىمعا, ءتىپتى فيزيكالىق قاۋىپكە ۇشىراۋى ەشبىر اقتاۋ مەن اقىلعا سىيمايتىنىن العا تارتادى.  15 جىلدان بەرى مەديتسينا سالاسىندا ماڭداي تەرىن توگىپ جۇرگەن ينفەكتسيونيست-دارىگەردىڭ دە  دەنساۋلىعىنا قاۋىپ تونگەن ساتتەر از بولماپتى.

«بۇعان دەيىن ستاتسيونارلاردا قىزمەت ەتىپ جۇرگەندە قابىلداۋ بولىمشەسىندە مۇنداي كەلەڭسىزدىكتەر ءجيى كەزدەسەتىن. تۇنگى ۋاقىتتا بالالاردىڭ قىزۋى كوتەرىلىپ, جەدەل جاردەممەن كەلگەن اتا-انالار قاتتى كۇيزەلىستە بولادى. كوبى مەديتسينالىق كومەككە كەزەك كۇتۋگە سابىرسىزدىق تانىتىپ, داۋىس كوتەرىپ, ءتىپتى مەديتسينا قىزمەتكەرلەرىنە ءتىل تيگىزەدى. بۇدان بولەك, ىشىمدىك ءىشىپ العان ادامداردىڭ مەكەمەگە كىرىپ, ەسىكتەردى سىندىرۋى, ايقايلاپ ب ۇلىك شىعارىپ, مەديتسينا قىزمەتكەرلەرىنىڭ قورقىنىش پەن كۇيزەلىسكە تۇسۋىنە سەبەپ بولاتىن جاعدايلار دا كەزدەستى. ءتىپتى ءبىر-ەكى رەت پىشاقپەن كەلگەن ادامداردىڭ بولعانى مەديتسينا سالاسىنىڭ ماماندارىنا قانداي قاتەر تونەتىنىن دالەلدەيدى» دەگەن پىكىرىن ورتاعان سالعان ينفەكتسيونيست-دارىگەر مەديتسينا قىزمەتكەرلەرىنە جاسالاتىن شابۋىلدىڭ الدىن الۋدا قولدانىلعان بارلىق شارا الدىمەن ازاماتتاردىڭ اماندىعىنىڭ كەپىلى ەكەنىن اتاپ ءوتتى.

«دارىگەردىڭ  دە قادىرى مەن قاۋىپسىزدىگى قورعالۋ قاجەت»

شىمكەنتتىك بالالار نەۆروپاتولوگى بالحاديشا مۇحيدينقىزى دارىگەر مەن ناۋقاستىڭ اراسىندا كيكىلجىڭ ورناعاندا قالاي شەشەتىنىمەن ءبولىستى.

«بۇل جاعداي دارىگەردىڭ كاسىبي مىندەتىن ادال اتقارۋىنا, ءتىپتى ناۋقاستى ەمدەۋ پروتسەسىنە كەدەرگى كەلتىرەدى. ءوز تاجىريبەمدە كيكىلجىڭ ساتتەرى بولعانىمەن, ولاردىڭ بارلىعىن سابىرمەن, ءتۇسىندىرۋ ارقىلى شەشۋگە بارىمدى سالامىن. ناۋقاس نەمەسە تۋىستارى اگرەسسيا تانىتسا, الدىمەن ولاردىڭ الاڭداۋشىلىعىن تۇسىنۋگە تىرىسامىن, سوسىن ناقتى, دالەلدى اقپاراتپەن تىنىشتاندىرامىن. ءاربىر سوزىمىزدە ەتيكا مەن مەيىرىمدىلىك بولۋعا ءتيىس, بىراق دارىگەردىڭ دە قادىرى مەن قاۋىپسىزدىگى قورعالۋى قاجەت», دەگەن دارىگەر پرەزيدەنت تاپسىرماسىنان كەيىن قوعامنىڭ دارىگەرلەرگە دەگەن كوزقاراسى وڭ ارناعا بۇرىلاتىنىنا سەنىم ءبىلدىردى.

وسى ءوڭىردىڭ تاعى ءبىر بىلىكتى ماممولوگ دارىگەرى ايجان نۇرىموۆا «بەس ساۋساق بىردەي ەمەس» ەكەنىن ەسكەرىپ,  دارىگەرلەردىڭ دە حالىققا قىزمەت ەتىپ وتىرعان تۇلعا رەتىندە قۇقىعىنىڭ تاپتالماعانىن قۇپ كورەدى. سوندىقتان, ايجان ساكەنقىزى دارىگەر-ناۋقاس داۋىن شەشۋ ءۇشىن ەكى تاراپ تا مۇددەلى بولۋ كەرەك دەپ ەسەپتەيدى.

ء«ار ناۋقاستىڭ قابىلداۋى ءار دەڭگەيدە. سوندىقتان دارىگەر مەديتسينالىق ارەكەتپەن عانا ەمەس سوزبەن دە ادام جانىن ەمدەي ءبىلۋ كەرەك دەپ ەسەپتەيمىن. ال دارىگەر قىزمەتىنە كوڭىلى تولماسا بۇل كەلىسپەۋشىلىگىن زاڭ شەڭبەرىندە شەشۋگە كەڭەس بەرەمىن. ءوزىم 2008 جىلدان بەرى وسى سالادا قىزمەت ەتە ءجۇرىپ, مۇنداي كەلەڭسىزدىكتەرگە كەزىكپەدىم», دەپ وي ءتۇيدى ماممولوگ دارىگەر.

اسىلىندا دا ادام جانى, قوعام ساۋلىعى ءۇشىن قالتقىسىز قىزمەت ەتىپ جۇرگەندەردىڭ دە باس اماندىعى, جۇمىستان كەيىن ۇيىنە امان-ساۋ ورالۋى ماڭىزدى ماسەلە. ال كۇشەيتىلگەن زاڭ تالاپتارى -  سالاداعى سان ساۋالعا سانالى شەشىم بولعانى ءسوزسىز.