فوتو: اشىق دەرەككوز
اتاپ ايتقاندا, ول وڭتۇستىك كورەيا, تايلاند, كامبودجا جانە پاكىستانمەن ارىپتەستىك ورناتقانىن مالىمدەگەن. سونىمەن قاتار, ترامپ ءۇندىستان مەن برازيليادان يمپورتتالاتىن تاۋارلارعا باج سالىعىن ەنگىزەتىنىن جاريالادى.
وڭتۇستىك كورەيامەن كەلىسىم
سەۋل اقش ەكونوميكاسىنا 350 ميلليارد دوللار كولەمىندە ينۆەستيتسيا قۇيۋعا جانە امەريكالىق ەنەرگيا رەسۋرستارىن 100 ميلليارد دوللارعا ساتىپ الۋعا كەلىسكەن. ەكى ەل اراسىنداعى كەلىسىمدە اقش-قا كەدەندىك باج سالىنبايتىنى, ال وڭتۇستىك كورەيا امەريكالىق كولىك, اۋىلشارۋاشىلىق تەحنيكاسى جانە باسقا دا ونىمدەردى قابىلدايتىنى ايتىلعان.
تايلاند پەن كامبودجامەن ساۋدا
ۆاشينگتون تايلاند جانە كامبودجامەن دە جاڭا ساۋدا كەلىسىمدەرگە قول جەتكىزدى. بۇل كەلىسىمدەر تۋرالى تولىق اقپارات ءالى جاريالانعان جوق. دەگەنمەن ترامپ ءوز دەلدالدىعى ناتيجەسىندە ەكى ەل اراسىندا بەيبىت كەلىسىم ورناپ, قاقتىعىستىڭ الدىن العانىن مالىمدەدى.
پاكىستانمەن ىنتىماقتاستىق
پاكىستانمەن جاسالعان كەلىسىمگە سايكەس, اقش اتالعان ەلدەگى ءىرى مۇناي قورلارىن بىرلەسىپ يگەرۋگە قاتىسادى. قازىر بۇل جوبانى جۇزەگە اسىراتىن امەريكالىق مۇناي كومپانياسى تاڭدالىپ جاتىر.
ءۇندىستان مەن برازيلياعا قارسى تاريفتەر
ترامپ ۇندىستانعا 1 تامىزدان باستاپ 25% كەدەندىك باج سالىعى ەنگىزىلەتىنىن حابارلادى. ول ءۇندىستاننىڭ جوعارى تاريفتەرى مەن ساۋدا كەدەرگىلەرىن سىنعا الىپ, ۆاشينگتون مەن دەلي اراسىنداعى ساۋدانىڭ شەكتەۋلى ەكەنىن ايتتى.
سول سياقتى, برازيليادان كەلەتىن يمپورتقا سالىناتىن باج سالىعى 10%-دان 50%-عا دەيىن كوتەرىلدى. بۇل شەشىم ەلدىڭ بۇرىنعى پرەزيدەنتى جاير بولسونارۋعا قاتىستى ءىس-شارالارعا بايلانىستى قابىلدانعان. اقش بيلىگى بۇل پروتسەستىڭ ساياسي استارى بارىن مەڭزەدى.
