فوتو: اشىق دەرەككوز
ۇلتتىق اۋىل شارۋاشىلىعى ساناعىنىڭ ءبىرىنشى كەزەڭى باستالادى
2025 جىلعى 1–31 تامىز ارالىعىندا قازاقستاندا ۇلتتىق اۋىل شارۋاشىلىعى ساناعىنىڭ ءبىرىنشى كەزەڭى وتەدى. ساۋالنامالار sanaq.gov.kz سايتىندا ونلاين رەجيمدە قولجەتىمدى بولادى. وندا اۋىل شارۋاشىلىعى وندىرۋشىلەرى مەن ءۇي شارۋاشىلىقتارىنا ارنالعان ەكى ءتۇرلى ساۋالناما نۇسقاسى ۇسىنىلادى. ساناق بارىسىندا شامامەن 300 مىڭ اۋىل شارۋاشىلىعى سۋبەكتىسى مەن 2 ميلليون ءۇي شارۋاشىلىعى قامتىلادى.
«قازاقتەلەكوم» ارحيۆتىك تاريف شارتتارىن جاڭارتادى
2025 جىلعى 1 تامىزدان باستاپ «موبايل تەلەكوم-سەرۆيس» ارقىلى ۇسىنىلاتىن كەيبىر ارحيۆتىك موبيلدىك تاريفتىك جوسپارلار جاڭارتىلادى. سونىمەن قاتار Beeline قازاقستان ءوز قوسىمشاسى ارقىلى باسقا وپەراتورلاردىڭ نومىرىنە تولەم جاساعان كەزدە 0,5% كوميسسيا ۇستاۋدى ەنگىزەدى. بۇل وزگەرىس Kcell, Activ, Tele2 جانە Altel نومىرلەرىنە جاسالاتىن اۋدارىمدارعا قاتىستى. مىسالى, ەگەر Tele2 نومىرىنە 1000 تەڭگە جىبەرىلسە, ونىڭ 5 تەڭگەسى كوميسسيا رەتىندە الىنادى.
اقش قازاقستاننان كەلەتىن يمپورتقا 25% باج سالىعىن ەنگىزەدى
1 تامىزدان باستاپ اقش قازاقستاننان كەلەتىن بارلىق يمپورتقا 25% كەدەندىك باج سالىعىن ەنگىزەدى. بۇل تۋرالى دونالد ترامپ ءوزىنىڭ Truth Social پاراقشاسىندا جازعان. حاتتا ول قازاقستانمەن ساۋدا قاتىناستارىن جوعارى باعالايتىنىن اتاپ ءوتتى جانە ەگەر قازاقستاندىق كومپانيالار ونىمدەرىن اقش-تا وندىرسە, وندا باج سالىعى قولدانىلمايدى دەپ مالىمدەگەن.
ChatGPT جازىلىمى قىمباتتايدى
OpenAI كومپانياسى 2025 جىلعى 1 تامىزدان باستاپ قازاقستان پايدالانۋشىلارى ءۇشىن ChatGPT Plus جازىلىمىنا قوسىلعان قۇن سالىعىن (ققس) ەنگىزەدى. سونىڭ ناتيجەسىندە اي سايىنعى تولەم $20-دان $22,40-قا كوتەرىلەدى (12% ققس ەسەبىمەن). ەگەر پايدالانۋشى زاڭدى تۇلعا نەمەسە دارا كاسىپكەر رەتىندە ققس تولەۋشى بولسا جانە بسن-ءىن تىركەۋ دەرەكتەرىندە كورسەتسە, ققس الىنبايدى.
تامىزداعى ۇبت كەزەڭى باستالادى
2025 جىلعى 10–14 تامىز ارالىعىندا نەگىزگى ۇبت-دا شەكتى بالل جيناي الماعان تالاپكەرلەر قايتا تەست تاپسىرا الادى. قاتىسۋشىلار تەستىلەۋدىڭ وتەتىن جەرىن, ۋاقىتىن جانە كۇنىن وزدەرى تاڭداي الادى. سونىمەن قاتار نەگىزگى ۇبت-عا قاتىسقان تۇلەكتەر پاندەر كومبيناتسياسىن وزگەرتە الادى. بۇل كەزەڭگە مەكتەپ پەن كوللەدج تۇلەكتەرى, قانداستار, شەتەلدە ورتا ءبىلىم العاندار جانە ماماندىقتاردان اۋىسقىسى كەلەتىن ستۋدەنتتەر قاتىسا الادى.
SCAT الماتى – مينسك جاڭا رەيسىن اشادى
2025 جىلعى 10 تامىزدان باستاپ SCAT اۋە كومپانياسى الماتى مەن مينسك اراسىندا تىكەلەي رەيس اشادى. ۇشۋلار ءار سارسەنبى جانە جەكسەنبى كۇندەرى ورىندالادى. اۆياكومپانيا بۇل باعىتتىڭ ىسكەرلىك, تۋريستىك جانە وتباسىلىق ساپارلار ءۇشىن ىڭعايلى بولاتىنىن ايتتى.
دجەننيفەر لوپەس استانا مەن الماتىدا كونتسەرت بەرەدى
2025 جىلعى 1 تامىزدا استاناداعى «استانا ارەنا» ستاديونىندا ايگىلى ءانشى دجەننيفەر لوپەس ءوزىنىڭ «Up All Night» تۋرى اياسىندا كونتسەرت وتكىزەدى. 10 تامىزدا الماتىنىڭ ورتالىق ستاديونىندا ونەر كورسەتەدى. الدىن الا ەسەپ بويىنشا, ەكى كونتسەرت مەملەكەتتىك بيۋدجەتكە 400 ميلليون تەڭگەگە دەيىن سالىق ءتۇسىمىن قامتاماسىز ەتۋى مۇمكىن.
كونستيتۋتسيا كۇنىنە وراي قوسىمشا دەمالىس
2025 جىلعى 30 تامىز — كونستيتۋتسيا كۇنى سەنبىگە سايكەس كەلەدى. وسىعان بايلانىستى دەمالىس كۇنى 1 قىركۇيەك, دۇيسەنبىگە اۋىستىرىلادى. وسىلايشا, بەس كۇندىك جۇمىس ىستەيتىندەر ءۇشىن 30, 31 تامىز جانە 1 قىركۇيەك — ءۇش كۇن قاتارىنان دەمالىس بولادى.
