«Dayar 20» – سۋبليماتسيالىق نەمەسە ليوفيليزاتسيالىق كەپتىرۋ ادىسىنە نەگىزدەلگەن شاعىن قوندىرعى. عالىمدار ونى تاسىمالداۋعا ىڭعايلى ەتىپ جاساعان. ياعني فەرمەرلەر بۇل قوندىرعىنى وزىمەن بىرگە الا ءجۇرىپ, تىكەلەي ەگىس القابىندا نەمەسە فەرمانىڭ وزىندە-اق ونىمدەردى كەپتىرىپ, ساقتاي الادى. سوندىقتان جاڭا قۇرىلعىنىڭ ارقاسىندا ءونىمدى قالاعا جەتكىزىپ, وڭدەۋ ورتالىعىن ىزدەپ اۋرە بولۋدىڭ قاجەتى جوق.
وسى ورايدا «ليوفيليزاتسيا دەگەنىمىز نە؟» دەگەن سۇراق تۋىنداۋى مۇمكىن. بۇل – ءونىمدى الدىمەن مۇزداتىپ, سوسىن تومەن قىسىمدا ىشىندەگى سۋدى بۋلاندىرىپ كەپتىرۋ ءادىسى. كادىمگى كەپتىرۋدەن ايىرماشىلىعى – ليوفيليزاتسيا ءونىمنىڭ ءتۇسىن, ءدامىن, ءيىسىن, ءپىشىنىن, ەڭ باستىسى, دارۋمەندەر مەن پايدالى زاتتاردىڭ كۇشىن سول كۇيىندە ساقتاپ قالادى. ياعني ءونىم تابيعي قالپىنان اجىرامايدى, تەك قۇرامىنداعى ىلعال الىنىپ تاستالادى. بۇل ونى ۇزاق ساقتاۋعا مۇمكىندىك بەرەدى.
قوندىرعى وتە امبەباپ. جوبا جەتەكشىسى ەربول يحسانوۆتىڭ ايتۋىنشا, «Dayar 20» جەمىس-جيدەك, كوكونىس, ەت, ءسۇت, بالىق, ءتىپتى دايىن تاعامداردى دا ساپالى تۇردە كەپتىرە الادى. مۇنداي ونىمدەردى توڭازىتقىشسىز, قاراپايىم بولمە تەمپەراتۋراسىندا 1 جىلدان 3 جىلعا دەيىن, ال ارنايى قاپتامامەن 50 جىلعا دەيىن ساقتاۋعا بولادى. بۇل – اسىرەسە ەكسپورتقا شىعارۋ ءۇشىن تاپتىرماس مۇمكىندىك.
«Dayar 20» قوندىرعىسى ەڭ الدىمەن فەرمەرلەر ءۇشىن ءتيىمدى, سەبەبى ول ءونىمدى ۇزاق ۋاقىت ساقتاۋعا مۇمكىندىك بەرىپ, شىعىندى ازايتىپ, پايدانى ارتتىرادى, سونداي-اق شالعاي اۋىلدار مەن تاۋلى ايماقتارداعى ينفراقۇرىلىمى ءالسىز شارۋاشىلىقتار ءۇشىن دە تاپتىرماس شەشىم بولا الادى. يننوۆاتسيالىق جوبانى جۇزەگە اسىرۋ ارقىلى قازۇۋ عالىمدارى اۋىلشارۋاشىلىق ونىمدەرىنىڭ ەكسپورتتىق الەۋەتىن ارتتىرىپ, ازىق-ت ۇلىك قاۋىپسىزدىگىن قامتاماسىز ەتۋگە ناقتى ۇلەس قوسپاق.
