ەكى اي بۇرىن IBA-نىڭ ءدال وسىنداي جارىس شري-لانكا استاناسى – كولومبودا ۇيىمداستىرىلعان ەدى. سول كەزدە جاڭادان تاعايىندالعان اعا جاتتىقتىرۋشى باقىت سارسەكباەۆ ۇلكەن تاۋەكەلگە باردى. بەيجىڭ وليمپياداسىنىڭ جەڭىمپازى بۇرىن-سوڭدى كوزگە تۇسپەگەن ەسىمدەرى كوپشىلىككە بەيمالىم بوكسشىلاردىڭ باسىن قوسىپ, سولارعا سەنىم ارتتى. وزدەرىنە بەرىلگەن مۇمكىندىكتى جالىندى جاستار تاماشا پايدالاندى. جارىس جولىنا شىققان 12 جىگىتتىڭ 10-ى التىن السا, بىرەۋى قولا مەدالدى يەلەندى. تەك ءبىر عانا سپورتشى وسى ساپاردان جۇلدەسىز ورالدى. ناتيجەسىندە, ەلىمىزدىڭ قۇراماسى جالپى كوماندالىق ەسەپتە جەكە-دارا كوش باستادى. وسىلايشا, باقىت ءابدىراحمان ۇلى ءوزىنىڭ مىقتى بوكسشى عانا ەمەس, بىلىكتى باپكەر ەكەنىن دە مويىنداتتى.
الداعى كۇندەرى تاي ەلىندە وتەتىن جارىستىڭ ءجونى مۇلدەم بولەك. ويتكەنى World Boxing – حالىقارالىق وليمپيادا كوميتەتى (حوك) تاراپىنان مويىندالعان ۇيىم. سول سەبەپتى دە قازاقستان بوكس فەدەراتسياسىنىڭ (قبف) قولداۋىنا يە بولعان باقىت سارسەكباەۆ اتالعان دوداعا كىل مىقتىلاردى اپارۋ مۇمكىندىگىنە يە بولدى.
بانگكوكتا قازاق ەلى نامىسىن مىنا بوكسشىلار قورعايدى: 50 كگ – نۇرزات وڭعاروۆ (ەل بىرىنشىلىگىنىڭ ءفيناليسى, يسپانياداعى جارىستىڭ جەڭىمپازى, تايلاندتاعى ءتۋرنيردىڭ قولا جۇلدەگەرى), 55 كگ – بەكسۇلتان بورانبەك (جاستار اراسىنداعى الەم چەمپيونى), 60 كگ – نۇريسلام قالدىباەۆ (ازيا چەمپيونى – U22), 65 كگ – يليا كالينين (ەل بىرىنشىلىگىنىڭ قولا جۇلدەگەرى), 70 كگ – نۇربەك مۇرسال (جاستار اراسىنداعى الەم چەمپيوناتىنىڭ كۇمىس جۇلدەگەرى, حالىقارالىق تۋرنيرلەردىڭ جەڭىمپازى), 75 كگ – امان قونىسبەكوۆ (ازيا چەمپيونى – U22), 80 كگ – ءسانجارالى بەگاليەۆ (جاستار اراسىنداعى الەم چەمپيونى), 85 كگ – ازاتبەك جولداسحان (ازيا چەمپيونى – U22), 90 كگ – تەمىرلان مۇقاتاەۆ (ەلىمىزدىڭ چەمپيونى), +90 كگ – نۇراسىل اسىلحان (ەل بىرىنشىلىگىنىڭ قولا جۇلدەگەرى).
– ازيا چەمپيوناتى قارساڭىندا ىستىقكولدە وقۋ-جاتتىعۋ جيىنىن وتكىزدىك. سول كەزدە ءار سالماقتىڭ مىقتىلارىن جۇدىرىقتاستىرىپ, قازىرگى كەزدە كىمدەر ناعىز بابىندا ەكەنىن انىقتادىق. سولاردىڭ اراسىنان ىرىكتەلىنىپ الىنعان ۇزدىكتەر بانگكوكتا باق سىنايدى. شارشى الاڭعا شىعاتىن جىگىتتەردىڭ بارلىعى دا جەڭىس تۇعىرىنىڭ ەڭ بيىك ساتىسىنا كوتەرىلۋگە بارىن سالادى, – دەيدى باقىت ءابدىراحمان ۇلى.
ەلدوس سايدالين باستاعان قىزدار كومانداسى ساپىندا گۇلناز بورىباەۆا (48 كگ), توميريس مىرزاقۇل (51 كگ), ەلينا بازاروۆا (54 كگ), ۆيكتوريا بايدۋكوۆا (57 كگ), اسەم تاڭاتار (60 كگ), ارۋجان جاڭاباەۆا (65 كگ), باقىت سەيدىش (70 كگ), شۇعىلا ءنالىباي (75 كگ), اسەل توقتاسىن (+80 كگ) سىندى بوكسشىلار ونەر كورسەتەدى.
