2023 جىلى قازاقستان حالقى اسسامبلەياسىنىڭ جاستار قاناتى بەلسەندىلەرىنىڭ باستاماسىمەن قۇرىلعان جاس تەاتر شىعىس قازاقستاندا عانا ەمەس, ەلىمىزدىڭ بىرقاتار وڭىرىندە ايرىقشا شىعارماشىلىق باستاماسىمەن تانىلىپ كەلەدى.
«Qutqar meni» قويىلىمى – جاستار اراسىندا كەڭ تارالعان ناشاقورلىق پەن قۇمار ويىندارعا تاۋەلدىلىك (لۋدومانيا) سەكىلدى كۇيىپ تۇرعان ماسەلەلەردى ارقاۋ ەتكەن الەۋمەتتىك-درامالىق تۋىندى. ترۋپپانىڭ باسىم بولىگى ورىمدەي جاستار بولعانىمەن, كوتەرگەن ماسەلەسىنىڭ جۇگى اۋىر. جاس كۇنىندە اياعىن شالىس باسىپ, ناشاقورعا اينالىپ, ماڭدايىن تاۋ مەن تاسقا سوعىپ وكىنگەن كەيىپكەرلەر كورەرمەندەر كوزىنە ەرىكسىز جاس تولتىردى. سوندىقتان دا بولار, قايتا-قايتا ۇزاق قول شاپالاقتاپ, قوشەمەت كورسەتكەنى – جاس ترۋپپانىڭ شەبەر ەڭبەگىنىڭ باعاسى دەر ەدىك.
– جاستاردى ناشاقورلىقتان ساقتاپ, تاربيەلىك ءمانى زور دۇنيە بولسىن دەپ وسى سپەكتاكلدى دۇنيەگە اكەلدىك. اكتەرلىك قۇرام – جاسوسپىرىمدەر مەن جاستاردان جاساقتالعان. الەۋمەتتىك ورتادا نە بولىپ جاتقانىن كوپشىلىك بىلە بەرمەيدى. سول شىندىقتى كورەرمەنگە تەاتر ارقىلى جەتكىزگىمىز كەلدى,– دەيدى «اسسامبلەيا جاستارى» تەاترىنىڭ كوركەمدىك جەتەكشىسى ۇكىلاي تۇراربەك.
تەاتر ۇجىمى ونەگەلى قويىلىم ارقىلى قوعامداعى الەۋمەتتىك ماسەلەلەرگە نازار اۋدارتىپ, جاستاردىڭ جاۋاپكەرشىلىك سەزىمىن قالىپتاستىرۋدى, الەۋمەتتىك ورتادا مورالدىق-ەتيكالىق نورمالاردى ناسيحاتتاۋدى مۇرات تۇتقان. راسىندا, ەسىرتكىنىڭ كەسىرىنەن تالاي جاستىڭ ءومىرى وكسىپ, قۇردىمعا كەتىپ جۇرگەنى جالعان ەمەس. كەيبىرى ءومىرىن ەرتە اياقتاسا, كەيبىرى ومىرلىك كۇنتىزبەسىن ايقىنداي الماي كۇيزەلىسكە تۇسەدى.
ايتا كەتەيىك, تەاتر ۇجىمى الداعى ۋاقىتتا دا ەلەۋلى قويىلىمدارىمەن كوپشىلىك الدىنا شىعۋدى جوسپارلاپ وتىر.
