تالدىقورعاندا سوعىس ارداگەرلەرىنە پاتەر بەرىلدى

تالدىقورعان. 19 ناۋرىز. بۇگىن الماتى وبلىسىنىڭ اكىمى اماندىق باتالوۆ ۇلى وتان سوعىسى جەڭىسىنىڭ 70 جىلدىعى قارساڭىندا تالدىقورعان قالاسىندا تۇراتىن ەرلىگىمەن ەلىنە شەكسىز باقىت سىيلاعان سوعىس ارداگەرلەرىنە 52 پاتەردىڭ كىلتىن تابىس ەتتى. بۇل تۋرالى egemen.kz ءتىلشىسى نۇربول الدىباەۆ حابارلادى. سالتاناتتى شارادا ءوڭىر باسشىسى ارداگەرلەر مەن تىل ەڭبەككەرلەرىن ناۋرىز مەيرامىمەن قۇتتىقتاپ, ءوزىنىڭ مەرەكەلىك تىلەگىن جەتكىزدى: «بۇگىنگى كۇنى الماتى وبلىسىندا تۇرىپ جاتقان ۇلى وتان سوعىسىنىڭ 355 ارداگەرلەرىنە جان-جاقتى قولداۋ جۇمىستارى كورسەتىلۋدە. ناۋرىز مەرەكەسىنە وراي, بۇگىن سىزدەرگە وبلىس ورتالىعى تالدىقورعان قالاسىنان 52 پاتەردىڭ كىلتىن تاپسىرعالى وتىرمىز. وسىنداي باسپانامەن وبلىسىمىزدىڭ بارلىق اۋداندارى مەن قالالارىنداعى سوعىس ارداگەرلەرى دە قامتىلاتىن بولادى. ءبىز سىزدەردى ارقاشان ماقتان تۇتامىز, قۇرمەتتەيمىز. سىزدەر تاريحتىڭ التىن قازىناسىسىزدار. ناۋرىز مەرەكەسى قارساڭىندا بارلىقتارىڭىزعا زور دەنساۋلىق, ۇزاق عۇمىر, باياندى باقىت, ال وتباسىلارىڭىز بەن تۋعان-تۋىستارىڭىزعا اماندىق پەن يگىلىك تىلەيمىن. جاڭا باسپانالارىڭىز جايلى بولىپ, شاڭىراقتارىڭىز شاتتىققا تولسىن قۇرمەتتى ارداگەرلەر», دەدى وبلىس اكىمى. مەرەكەلىك قۇتتىقتاۋدان سوڭ اماندىق باتالوۆ ارداگەرلەردىڭ بارلىعىنا جەكە-جەكە پاتەردىڭ كىلتىن تابىستادى. شاراعا جينالعان ارداگەرلەر قاۋىمى ەلباسى تاراپىنان جاسالىپ جاتقان وسىنداي يگى شارالارعا, جان-جاقتى قولداۋ جۇمىستارىنا ءوز ريزاشىلىقتارىن ءبىلدىرىپ, العىستارىن جەتكىزدى. نۇربول الدىباەۆ. دەرەك: egemen.kz. سۋرەت: zhetysu.gov.kz.