زاۋىتتىڭ جاعدايىن اتىراۋ وبلىسى يندەر اۋدانىنا جۇمىس ساپارىمەن بارعان ءماجىلىس دەپۋتاتى ايداربەك قوجانازاروۆ كورىپ كەلدى. ونىڭ ايتۋىنشا «يسي گيپس يندەر» گيپسوكارتون ءوندىرۋ زاۋىتى قازىر شىعىنعا باتىپ وتىر.
اتالمىش زاۋىت وڭىردەگى ءىرى وندىرىستىك كاسىپورىننىڭ ءبىرى. مۇندا ءتۇرلى ۇلگىدەگى گيپسوكارتون - ىلعالعا, وتقا ءتوزىمدى جانە ستاندارتتى گيپسوكارتون وندىرىلەدى. سونداي-اق كاسىپورىن گيپس, قۇرىلىسقا ارنالعان گيپس بۇيىمدارىن, اكتاس جانە بور شىعارىپ, وڭدەيدى, جابدىقتاردى جوندەپ, تەحنيكالىق قىزمەت تە كورسەتەدى, بۇعان قوسا ەلەكتر ەنەرگياسىن وندىرەدى. قازىر زاۋىتتا 125 ادام ەڭبەك ەتەدى, جىل سايىن ءوندىرىس كولەمى 5,8 ميلليون شارشى مەتر گيپسوكارتوندى قۇراپ وتىر.
زاۋىت ديرەكتورى جولداس ومبەتياروۆتىڭ ايتۋىنشا, ەلەكترمەن تۇراقسىز قامتاماسىز ەتىلۋى باستى ماسەلە بولىپ وتىر. كاسىپورىن اپتا بويى جارىقسىز قالادى, بۇل ءوندىرىستىڭ توقتاۋىنا جانە جابدىقتىڭ ىستەن شىعۋىنا اكەلگەن.
«اكىمدىك وڭىردەگى ەلەكتر ەنەرگياسىنىڭ جەتىسپەۋشىلىگىن ايتىپ وتىر. ەلەكتر جارىعى سوندىرىلگەن سايىن ءبىز شىعىنعا ۇشىرايمىز. تەحنيكا ىستەن شىعىپ, ءوندىرىس قارقىنى باسەڭدەيدى, ال كەلتىرىلگەن زالالدى ەشكىم وتەمەيدى», دەيدى زاۋىت باسشىسى.
سونداي-اق لوگيستيكا ماسەلەسى دە قول بايلاۋ بولىپ تۇر. ءونىم تاسىمالىن قامتاماسىز ەتەتىن تەمىرجول جەلىسىن جوندەۋ قاجەت. الايدا قازىر بۇل جەلى جەكە مەنشىككە وتكەن, ال يەسى ينفراقۇرىلىمدى جاڭعىرتۋعا ق ۇلىقسىز.
ء«بىز ءوندىرىستى كەڭەيتۋگە دايىنبىز, شيكىزات قورى, ماماندار مەن تەحنولوگيا بار. الايدا لوگيستيكالىق شەكتەۋلەر جۇمىس ىستەۋگە مۇمكىندىك بەرمەي تۇر. تەمىرجول جەلىسىن «قازاقستان تەمىر جولى» ۇلتتىق كومپانياسىنىڭ بالانسىنا بەرۋ, ماسەلەنى ەداۋىر جاقسارتار ەدى», دەيدى ج.ومبەتياروۆ.
سونىمەن قاتار, وڭىردە قۇرىلىس قالدىقتارىن شىعاراتىن ارنايى پوليگون جوق. قازىرگى كەزدە كاسىپورىن قالدىقتاردى اتىراۋ قالاسىنا تاسۋعا ءماجبۇر, بۇل دا شىعىندى ارتتىرىپ, ەكونوميكالىق تيىمدىلىكتى تومەندەتىپ وتىر.
كاسىپورىن باسشىلىعى بۇعان دەيىن ءوندىرىستى اتىراۋ وبلىسىندا كەڭەيتۋ مۇمكىندىگىن قاراستىرعانىن, الايدا شەشىلمەگەن ينفراقۇرىلىمدىق ماسەلەلەرگە بايلانىستى ەكىنشى زاۋىتتى تاراز قالاسىندا سالۋعا ءماجبۇر بولعانىن ايتتى. وندا لوگيستيكا مەن ەنەرگەتيكا ماسەلەلەرى الدەقايدا جاقسى جولعا قويىلعان.
«جالپى يندەر اۋدانىنىڭ الەۋەتى زور, مۇنداي وندىرىستەر – ەكونوميكالىق ءوسۋدىڭ نەگىزى. الايدا ەنەرگەتيكا, كولىك ينفراقۇرىلىمى جانە قالدىقتاردى جويۋ سىندى بازالىق ماسەلەلەر شەشىلمەيىنشە, اۋدانداعى بۇل سالانىڭ دامۋى باياۋلايدى. وسى ماسەلەلەردى ءتيىستى مينيسترلىكتەرگە جەتكىزەمىز. بۇل تەك ءبىر زاۋىتتىڭ ءوتىنىشى ەمەس, بۇل وڭىرلىك ونەركاسىپتىك ساياساتقا دەگەن كوزقاراستى قايتا قاراۋ قاجەتتىگىنىڭ ناقتى بەلگىسى», دەدى ا.قوجانازاروۆ.
