ەلىمىزدە ورنىقتى دامۋ سالاسىنداعى ۇلتتىق ماقساتتار مەن مىندەتتەردى ىسكە اسىرۋدى مونيتورينگىلەۋ جونىندەگى پارلامەنتتىك كوميسسيا 2023 جىلدان بەرى جۇمىس ىستەپ كەلەدى. وسى ارالىقتا ورنىقتى دامۋ ماقساتتارىن ىلگەرىلەتۋگە ەلەۋلى ۇلەس قوسقان كوميسسيانىڭ قىزمەتى وسى سالاداعى پارلامەنتتىك باقىلاۋ, مەكەمەارالىق ءوزارا ءىس-قيمىل جانە زاڭنامالىق قامتاماسىز ەتۋدى كۇشەيتۋگە باعىتتالعان.
سەنات سپيكەرى ماۋلەن اشىمباەۆ توراعالىق ەتەتىن كوميسسيا سۋ مەن ەنەرگەتيكا قاۋىپسىزدىگى, كليمات وزگەرىستەرىن جانە ESG-قاعيداتتارىن ەنگىزۋمەن قوسا ودم-عا قول جەتكىزۋگە بايلانىستى نەگىزگى ماسەلەلەرگە دەن قويعان. مەملەكەتتىك ورگاندار, حالىقارالىق ۇيىمدار جانە ساراپتامالىق قوعامداستىق وكىلدەرىنىڭ قاتىسۋىمەن وتكەن وتىرىستاردا ورنىقتى دامۋ سالاسىنداعى مەملەكەتتىك ساياساتتى جەتىلدىرۋ جونىندە ناقتى ۇسىنىمدار ازىرلەندى.
ودم پارلامەنتتىك كوميسسياسىنىڭ حاتشىسى ولگا بۋلاۆكينا بۇۇ دب-مەن بىرلەسىپ, جەردى پايدالانۋدى باقىلاۋدى كۇشەيتۋگە جانە براكونەرلىكپەن كۇرەسۋگە باعىتتالعان بيوارتۇرلىلىكتى ساقتاۋ تۇجىرىمداماسى ناتيجەلى جۇمىستىڭ ءبىر كورىنىسى دەيدى. ونىڭ ايتۋىنشا, ورتالىق ازيانى ورنىقتى دامىتۋ جونىندەگى كەڭەيتىلگەن وتىرىستا پارلامەنتارالىق ىنتىماقتاستىق, ودم-دى ۇلتتىق زاڭناماعا كىرىكتىرۋ جانە ورنىقتى ماقساتتارعا قول جەتكىزۋدەگى جەرگىلىكتى بيلىك ورگاندارىنىڭ ءرولىن كۇشەيتۋ ماسەلەلەرىنە ەرەكشە نازار اۋدارىلعان.
«كوميسسيا سونداي-اق گەندەرلىك تەڭدىك قاعيداتتارىن قۇقىقتىق بازادا جانە ستراتەگيالىق قۇجاتتارعا ەنگىزۋگە اتسالىستى. بۇل تۇرمىستىق زورلىق-زومبىلىق ءۇشىن جازانى قاتاڭداتۋ, «ەرلەر» سالالارىنا جۇمىسقا ورنالاسۋداعى بۇرىنعى كەدەرگىلەردى الىپ تاستاۋ جانە ايەلدەردىڭ ساياساتتاعى ءرولىن ارتتىرۋ, حالىقارالىق مىندەتتەمەلەردى ورىنداۋ سياقتى الەۋمەتتىك كەپىلدىكتەرگە جول اشادى», دەدى و.بۋلاۆكينا.
سەنات 2030 جىلعا دەيىن ودم-عا قول جەتكىزۋ ءۇشىن بيلىكتىڭ بارلىق تارماعىمەن, ازاماتتىق قوعامنىڭ جانە حالىقارالىق سەرىكتەستەردىڭ ءوزارا ءتيىمدى بايلانىس ورناتۋىنا ءمان بەرىپ وتىر. بۇۇ ەكونوميكالىق جانە الەۋمەتتىك كەڭەسىنىڭ قولداۋىمەن ساياسي فورۋم الاڭىندا ودم بويىنشا ەلىمىزدىڭ ەرىكتى ۇلتتىق شولۋىن جوعارى باعالاۋ, سونداي-اق حالىقتىڭ پىكىرىن, جاھاندىق ماقساتتارعا قول جەتكىزۋدەگى ينكليۋزيۆتىلىك پەن ارىپتەستىك ءتاسىلدى ەسكەرە وتىرىپ, وڭىرلىك تۇرعىدا ورنىقتى دامۋ ماقساتتارىن وقشاۋلاۋ ۇدەرىسىنە ەلىمىزدىڭ ەرەكشە نازار اۋدارىپ وتىرعانىن كورسەتەدى.
