فوتو: stat.gov.kz
قازاقستان تمد وڭىرىندە العاش بولىپ, ەىدۇ-نىڭ ستاتيستيكا سالاسىنداعى قۇقىقتىق قۇجاتىن العان ەل اتانىپ وتىر.
اتالعان ۇسىنىم – رەسمي ستاتيستيكانىڭ تاۋەلسىزدىگىن, وبەكتيۆتىلىگىن, اشىقتىعى مەن ساپاسىن قامتاماسىز ەتۋگە باعىتتالعان 12 قاعيداتتى قامتيتىن حالىقارالىق ستاندارت. بۇل قۇجاتقا قوسىلۋ قازاقستاننىڭ ۇلتتىق ستاتيستيكالىق جۇيەسى ەىدۇ-نىڭ نەگىزگى تالاپتارىنا ساي كەلەتىنىن جانە ۇزدىك حالىقارالىق تاجىريبەگە سايكەس دامىپ جاتقانىن اڭعارتادى.
ء«بىز ىنتىماقتاستىعىمىزدى جالعاستىرىپ, ءسىزدىڭ ەلىڭىزدە جوعارى ساپالى ءارى ينستيتۋتسيونالدىق تۇرعىدان سەنىمدى ستاتيستيكالىق جۇيەنى دامىتۋداعى ۇمتىلىسىڭىزدى قولداۋعا نيەتتىمىز», دەدى ەىدۇ باس حاتشىسى ماتياس كورمانن.
ەىدۇ شەشىمى 2023–2025 جىلدارعا ارنالعان قازاقستاننىڭ ۇلتتىق ستاتيستيكالىق جۇيەسىنە جۇرگىزىلگەن جان-جاقتى شولۋ ناتيجەسىندە قابىلدانعان. قۇجاتتا ستاتيستيكانى تسيفرلاندىرۋ, زاماناۋي ءادىسنامالاردى ەنگىزۋ جانە پايدالانۋشىلاردىڭ دەرەكتەرگە دەگەن سەنىمىن ارتتىرۋ باعىتىندا ەلدىڭ قول جەتكىزگەن ناتيجەلەرىنە نازار اۋدارىلعان.
«بۇل – قازاقستاننىڭ ستاتيستيكالىق جۇيەسىنە بەرىلگەن ماڭىزدى باعا. ول رەسۋرستاردىڭ جەتكىلىكتىلىگى, قۇپيالىلىقتى ساقتاۋ, تۇراقتى قۇقىقتىق جانە ينستيتۋتسيونالدىق نەگىزدىڭ بولۋى, سونداي-اق جاڭا جانە بالامالى دەرەككوزدەردى پايدالانۋ سياقتى تالاپتارعا ساي كەلەتىنىن راستايدى. قۇجاتتا ستاتيستيكا ساپاسىنىڭ تالداۋ مەن باسقارۋشىلىق شەشىمدەردىڭ ساپاسىنا تىكەلەي اسەر ەتەتىنى اتاپ كورسەتىلگەن. ءبىز وسى مەجەنى ساقتاپ قالۋعا جانە ودان ءارى جەتىلدىرە بەرۋگە نيەتتىمىز», دەدى قر ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ باسشىسى ماقسات تۇرلىباەۆ.
ايتا كەتەيىك, قازاقستاننىڭ اتالعان ۇسىنىمعا قوسىلۋ جۇمىسى سىرتقى ىستەر مينيسترلىگىنىڭ قولداۋىمەن جۇزەگە اسىرىلعان.
