فوتو: اشىق دەرەككوز
«وقۋ پروتسەسى 2025 جىلعى 2 قىركۇيەكتە باستالىپ, 2026 جىلعى 25 مامىردا اياقتالادى. ءبىلىم كۇنىنە ارنالعان سالتاناتتى جيىننىڭ ۋاقىتى مەن كۇنى مەكتەپتىڭ پەداگوگيكالىق كەڭەسىنىڭ شەشىمىمەن بەلگىلەنەدى», دەلىنگەن حابارلامادا.
مينيسترلىكتىڭ مالىمەتىنشە, ءبىرىنشى توقسان 8 وقۋ اپتاسىنان تۇرادى. كۇزگى دەمالىس 2025 جىلعى 27 قازاندا باستالىپ, 2 قاراشاعا دەيىن, ياعني 7 كۇنگە جالعاسادى.
ەكىنشى توقساننىڭ ۇزاقتىعى دا 8 اپتاعا تەڭ. قىسقى كانيكۋل 2025 جىلدىڭ 29 جەلتوقسانىنان باستالىپ, 2026 جىلدىڭ 7 قاڭتارىنا دەيىن سوزىلادى. دەمالىس ۇزاقتىعى – 10 كۇن.
سونىمەن قاتار 1-سىنىپ وقۋشىلارىنا ارنالعان قوسىمشا دەمالىس 2026 جىلدىڭ 9–15 اقپانى ارالىعىندا, ياعني 7 كۇن بويى وتەدى.
ال, ءۇشىنشى توقسان 10 اپتاعا سوزىلادى. كوكتەمگى كانيكۋل 2026 جىلدىڭ 19 ناۋرىزىندا باستالىپ, 29 ناۋرىزدى قوسا العانداعى 11 كۇندىك دەمالىس بەرىلەدى.
ءتورتىنشى توقسان 8 اپتانى قامتيدى, وقۋ جىلىنىڭ سوڭعى كۇنى – 2026 جىلدىڭ 25 مامىرى.
