انگار تيپىندەگى كوپفۋنكتسيونالدى مۇزايدىنىنىڭ اشىلۋ ءراسىمى سالتاناتتى جاعدايدا ءوتتى.
– مەملەكەت باسشىسى بالالاردى سپورتقا باۋلۋعا ءاردايىم ەرەكشە ءمان بەرىپ كەلەدى. سونىڭ ايقىن دالەلى – بۇگىنگى ءىس-شارا. جاڭا مۇزايدىنىندا قىسقى سپورت تۇرلەرىن دامىتۋ ماقساتىندا مانەرلەپ سىرعاناۋدان سپورت شەبەرى الەنا پونكراتوۆا ارنايى سانكت-پەتەربۋرگتەن شاقىرتىلىپ, وسى كەشەندە تۇراقتى جاتتىقتىرۋشىلىق جاساۋعا كەلىسىمشارتقا وتىردى.
ەندى اتا-انالارعا, جاتتىقتىرۋشىلار مەن سپورت ۇيىمدارىنا زور سەنىم ارتىلىپ وتىر. جاس سپورتشىلارىمىز كاسىبي جاتتىقتىرۋشىمەن بىرگە جاڭا بيىكتەردى باعىندىرىپ, جارقىن جەڭىستەرگە جەتەتىنىنە سەنىمىمىز مول. كوك تۋىمىزدى كوككە كوتەرەتىن ناعىز ساڭلاقتار وسى مۇزايدىنىنان شىعا بەرسىن, – دەدى جەرگىلىكتى تۇرعىنداردى تاريحي وقيعامەن قۇتتىقتاعان ماڭعىستاۋ وبلىسىنىڭ اكىمى نۇرداۋلەت قيلىباي.
نىساننىڭ جالپى اۋماعى – 1100 شارشى مەتر, ونىڭ ىشىندە مۇز الاڭى 960 شارشى مەتردى قۇرايدى. مۇزايدىنى ءبىر مەزەتتە 500 ادامدى قابىلداي الادى. سپورتتىق كەشەندە ۇلدار مەن قىزدارعا ارنالعان جۋىنۋ, كيىم اۋىستىرۋ بولمەلەرى, جاتتىقتىرۋشىلار مەن مەديتسينا قىزمەتكەرلەرىنە ارنالعان كابينەتتەر, سونداي-اق اكىمشىلىك بولمەلەر بار. كەشەننىڭ ەكىنشى قاباتىندا بالالار مەن جاسوسپىرىمدەر سپورت مەكتەبىنىڭ تاربيەلەنۋشىلەرىنە ارنالعان زاماناۋي جاتتىعۋ زالى ورنالاسقان. مۇندا 10-18 جاس ارالىعىنداعى العاشقى دايارلىق توپتارى مەن جاس سپورتشىلار كاسىبي جاتتىقتىرۋشىلاردىڭ جەتەكشىلىگىمەن شىنىعادى.
الداعى ۋاقىتتا نىساندا حوككەي, شورت-ترەك, مانەرلەپ سىرعاناۋ جانە كەرلينگ سىندى وليمپيادالىق سپورت تۇرلەرىنەن تەگىن ۇيىرمەلەر جۇمىسىن باستايدى.
جاڭا سپورت كەشەنى – جاڭاوزەندىك جاستاردى سالالىق سپورتقا تارتۋ مەن جارىس جەڭىمپازدارىن ازىرلەۋگە باعىتتالعان ايرىقشا مۇمكىندىك.
ماڭعىستاۋ وبلىسى
