قازىر اۋىل اۋماعىندا بارلىعى 25 جەر قويناۋىن پايدالانۋشى تىركەلگەن بولسا, ونىڭ ىشىندە 20 كاسىپورىن كەلىسىمشارت نەگىزىندە, 5 كاسىپورىن ليتسەنزيا نەگىزىندە جۇمىس ىستەپ جاتىر.
ماڭعىستاۋ وبلىسى اكىمدىگى ءباسپاسوز قىزمەتىنىڭ حابارلاۋىنشا, بۇل ماڭىزدى ماسەلە قۇزىرلى ورىندار نازارىندا. ناقتىراق ايتساق, بىرنەشە جىل بويى شەتپەلىك تۇرعىندار اۋىل ماڭىنداعى كارەردەگى جارىلىس جۇمىستارىنىڭ دۇمپۋىنەن, شاڭ-توزاڭنان, اۋىر كولىكتەردىڭ قوزعالىسىنان تۋىندايتىن ەكولوگيالىق, ماتەريالدىق ماسەلەلەرگە شاعىمدانىپ كەلەدى.
ماڭعىستاۋ وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسى بيىلعى جارتىجىلدىقتا كارەرلەردىڭ جۇمىسىن باقىلاۋ ماقساتىندا ارنايى سىناما جۇرگىزدى. تەكسەرۋ بارىسىندا 16 نۇكتەدەن الىنعان 66 سىنامانىڭ بارلىعى ەكولوگيالىق نورمالارعا سايكەس كەلگەن. سونىمەن قاتار باسقارما تاراپىنان 2023–2024 جىلدار ارالىعىندا شەتپە اۋىلى ماڭىنداعى قيىرشىق تاس وندىرەتىن كەشەندەرگە جوسپارلى مونيتورينگ جۇرگىزىلدى. ناتيجەسىندە, كەلىسىمشارتتىق مىندەتتەمەلەرىن ورىنداماعان 7 كارەر مەن ەكولوگيالىق زاڭناما تالاپتارىن بۇزعان 11 كارەر انىقتالدى. اتالعان كاسىپورىندارعا 2025 جىلعى شىلدە ايىندا رەسمي ەسكەرتۋ حاتتارى جولدانىپ, ءۇش اي ىشىندە انىقتالعان بۇزۋشىلىقتاردى جويۋ تالابى قويىلدى. زاڭ تالابىنا سايكەس ءۇش اي مەرزىم ىشىندە جەر قويناۋىن پايدالانۋشىلار كەلىسىمشارتتىڭ, ليتسەنزيانىڭ بۇزىلعان تالاپتارىن قالپىنا كەلتىرمەگەن جاعدايدا, جەر قويناۋىن پايدالانۋعا بەرىلگەن ليتسەنزيالار قايتارىلىپ, كەلىسىمشارتتارى بىرجاقتى تارتىپپەن مەرزىمىنەن بۇرىن توقتاتىلادى.
مۇنى ماڭعىستاۋ وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى ءسابيت دۇيسەكەنوۆ تە راستادى.
– شەتپە اۋىلى ماڭىنداعى كارەرلەردىڭ قىزمەتىن تۇراقتى باقىلاۋ ماقساتىندا ماڭعىستاۋ وبلىسى اكىمىنىڭ وكىمىمەن ارنايى جۇمىس توبى قۇرىلدى. ونىڭ قۇرامىنا قۇقىق قورعاۋ ورگاندارى, ۋاكىلەتتى مەملەكەتتىك ورگاندار مەن جەرگىلىكتى اتقارۋشى ورگاندار كىرەدى. بۇل جۇمىس توبى جەر قويناۋىن پايدالانۋشىلاردىڭ قىزمەتىنىڭ زاڭ تالاپتارىنا ساي بولۋىن قاداعالاماق. ەگەر بۇزۋشىلىقتار جويىلماسا, ءتيىستى شارالار قابىلدانىپ, زاڭعا سايكەس كارەرلەرگە شەكتەۋلەر ەنگىزىلەدى, – دەدى س.دۇيسەكەنوۆ.
وسى كورسەتىلگەن جەر قويناۋىن پايدالانۋشىلار تاراپىنان زاڭسىز ءوندىرۋ جۇمىستارىن جۇرگىزگەندىگى انىقتالعان جاعدايدا 110 000 000 تەڭگە ايىپپۇل وندىرىلەدى دەپ جوسپارلانىپ وتىر.
ماڭعىستاۋ وبلىسى
