فوتو: قىرمىزى جۇماعاليقىزى
مينيسترلىك تاراتىلعان اقپاراتتىڭ بۇرمالانعانىن اتاپ ءوتتى. ۆەدومستۆونىڭ مالىمدەۋىنشە, مەديتسينالىق قىزمەتتەر ءتاريفى بۇل مەملەكەت بەكىتكەن سوما, ياعني ەمحانالار مەن اۋرۋحانالار سياقتى مەديتسينالىق ۇيىمدارعا ناۋقاستاردى ەمدەگەنى ءۇشىن تولەنەتىن قاراجات. بۇل تولەمدەر مەديتسينالىق ساقتاندىرۋ قورى ارقىلى جۇزەگە اسىرىلادى.
«ماسەلەن, ەگەر ازامات مەديتسينالىق كومەكتى مىندەتتى الەۋمەتتىك مەديتسينالىق ساقتاندىرۋ ء(مامس) جۇيەسى ارقىلى نەمەسە مەملەكەت كەپىلدىك بەرگەن تەگىن مەديتسينالىق كومەك (تمككك) اياسىندا السا, ول ەشقانداي تولەم جاسامايدى. الايدا بۇل قىزمەت ءۇشىن مەديتسينالىق ساقتاندىرۋ قورى مەديتسينالىق ۇيىمعا بەكىتىلگەن تاريف بويىنشا اقى تولەيدى», دەلىنگەن حابارلامادا.
وسىعان بايلانىستى مينيسترلىك ءتاريفتىڭ ارتۋى حالىق ءۇشىن ەمدەلۋ باعاسىنىڭ ءوسۋىن بىلدىرمەيتىنىن ناقتىلادى.
2025 جىلعى 22 شىلدەدە جاريالانعان دەنساۋلىق ساقتاۋ مينيسترلىگىنىڭ ءباسپاسوز حابارلاماسىندا («قوعامدىق كەڭەستە مەديتسينالىق ساقتاندىرۋ جۇيەسىندەگى نەگىزگى وزگەرىستەر تالقىلاندى») 2026 جىلدان باستاپ توعىز نەگىزگى باعىت بويىنشا تاريفتەردى كوتەرۋ جوسپارلانىپ وتىرعانى ايتىلعان. بۇل تاريفتەر 2020 جىلدان بەرى قايتا قارالماعان جانە قازىرگى كەزدە مەديتسينالىق قىزمەتتەردىڭ ناقتى وزىندىك قۇنىن تولىق جاپپايدى.
حابارلامادا تاريفتەردى وزەكتەندىرۋ ستاتسيونارلىق سەكتورداعى سوزىلمالى قارجىلاندىرۋ تاپشىلىعىن جويۋ جانە مەديتسينالىق قىزمەتتەردىڭ ناقتى قۇنىن وتەۋ ماقساتىندا جۇرگىزىلىپ جاتقانى اتاپ ءوتىلدى. سونداي-اق بۇل شارالار مەديتسينالىق كومەكتىڭ ساپاسى مەن قولجەتىمدىلىگىن ارتتىرۋ جانە مەديتسينا قىزمەتكەرلەرىنىڭ ەڭبەگىن ءادىل باعالاۋ باعىتىندا قولعا الىنعان جۇيەلى جۇمىستاردىڭ ءبىر بولىگى ەكەنى كورسەتىلگەن.
مينيسترلىك اتاپ وتكەندەي, ازاماتتار ءۇشىن تمككك مەن ءمامس پاكەتتەرىنە كىرەتىن بارلىق قىزمەتتەر بۇرىنعىشا تەگىن بولىپ قالا بەرەدى.
