فوتو: اشىق دەرەككوز
م. ەسىمباەۆ پەن جانعاباەۆقا – 7 جىل, قازمۇحانبەتوۆكە 3 جىل باس بوستاندىقتارىنان ايىرۋ جازاسى كەسىلىپ, جازا مەرزىمىنەن وتەگەننەن كەيىن دە مەملەكەتتىك قىزمەتكە ورنالاسۋعا تىيىم سالىندى.
قىلمىستىق ءىس ماتەريالدارىندا جازىلعانداي, وبلىستىق ۆەتەريناريا باسقارماسى باسشىسىنىڭ ورىنباسارى قازمۇحانبەتوۆ قالالىق سانيتارلىق-ەپيدەميولوگيالىق باقىلاۋ بولىمىنە 48 ورىنعا ارنالعان جەكەمەنشىك بالاباقشانىڭ سىيىمدىلىعىن 75 ورىنعا كوبەيتۋگە ءوتىنىش بىلدىرەدى. الايدا بالاباقشانىڭ اۋماعى سانيتارلىق ەرەجەلەردىڭ تالابىنا ساي بولماۋى سەبەبىنەن رۇقسات ەتىلمەيدى. وسى كەزدە ىسكە قالانىڭ باس سانيتار دارىگەرى ەسىمباەۆ ارالاسىپ, مەكەمەنىڭ باس مامانى جانعاباەۆقا قورىتىندىنى وزگەرتۋگە تاپسىرما بەرەدى. جالعان قۇجاتقا ەسىمباەۆ قول قويىپ, ءۇشىنشى تاراپتىڭ كومەگىمەن 300 مىڭ تەڭگە الادى. سوت قورىتىندىسىندا كورسەتىلگەندەي, باس سانيتار قولىنا تۇسكەن پارانىڭ 90 مىڭ تەڭگەسىن جانعاباەقا بەرەدى. اقشا قاراجاتىنىڭ قولدان قولعا ءوتۋى بەينەتۇسىرىلىمدەرمەن دالەلدەندى.
سوتتا قازمۇحانبەتوۆ ءوزىنىڭ كىناسىن تولىق مويىنداسا, ەسىمباەۆ ءىشىنارا عانا كەلىستى, ال جانعاباەۆ ءوزىنىڭ وسى ىسكە قاتىسى جوقتىعىن مالىمدەدى. سوعان قاراماستان بالاباقشانىڭ اۋماعىنا قاتىستى جالعان قۇجات جاساعان باس سانيتار مەن ونىڭ سىبايلاستارىنىڭ قىلمىسى كۋالەردىڭ كورسەتۋىمەن, زاتتاي ايعاقتارمەن دالەلدەندى. كامەلەت جاسىنا جەتپەگەن بالالارىنىڭ بولعانى ءۇشىن جانە كىنالارىن ءىشىنارا مويىنداعان ايىپتالۋشىلار – ەسىمباەۆ پەن قازمۇحانبەتوۆكە سوت جازانى جەڭىلدەتۋ جاعىن ەسكەردى.
سوت ۇكىمى ءالى كۇشىنە ەنگەن جوق.
اقتوبە وبلىسى
