سەنات دەپۋتاتى رۋسلان رۇستەموۆ قىزىلوردا وبلىسىنداعى جاڭاقورعان اۋدانىنىڭ كوپسالالى اۋرۋحاناسىندا بولىپ, مەكەمە ۇجىمىمەن كەزدەستى. كەزدەسۋدە مەديتسينا قىزمەتكەرلەرىنىڭ قاۋىپسىزدىگى ماسەلەسىنە باسا نازار اۋدارىلدى. سەناتور مەديتسينا قىزمەتكەرلەرىنە زورلىق-زومبىلىق كورسەتكەنى ءۇشىن جازانى قاتاڭداتۋ جونىندەگى پارلامەنت دەپۋتاتتارىنىڭ, دارىگەرلەر قاۋىمى مەن ازاماتتاردىڭ زاڭناماعا وزگەرىستەر ەنگىزۋ تۋرالى ۇسىنىستارىن مەملەكەت باسشىسى قولداعانىن اتاپ ءوتتى.
«دارىگەرلەر قاۋىمى كۇن سايىن ادام ءومىرىن ساقتاپ قالۋعا ايانباي ەڭبەك ەتەدى, ولار قۇرمەت پەن قولداۋعا جانە قورعاۋعا لايىق. ولارعا دەگەن كەز كەلگەن اگرەسسيا بۇكىل قوعامنىڭ توپتاسا ارەكەت ەتۋىن قاجەت ەتەدى. ونداي جاعدايدى «زاڭ جانە ءتارتىپ» قاعيداتى بويىنشا زاڭعا سايكەس قاتاڭ تۇردە جولىن كەسۋ كەرەك. ازاماتتىق قوعامنىڭ پىكىرىن مىندەتتى تۇردە ەسكەرە وتىرىپ, مەديتسينا قىزمەتكەرلەرىن قورعاۋدىڭ قۇقىقتىق تەتىكتەرىن كۇشەيتۋگە باعىتتالعان ۇسىنىستاردى ودان ءارى مۇقيات قاراستىرامىز», دەدى ر.رۇستەموۆ.
دەپۋتاتتار ولگا بۋلاۆكينا مەن شاكارىم بۇقتۇعۇتوۆ شىعىس قازاقستان وبلىسىنداعى شەمونايحا اۋدانىندا بولدى. وندا ولار جىلۋ جىبەرۋ ستانساسى قۇرىلىسىمەن تانىستى. مۇنداعى جاڭعىرتۋ جوباسى قارجى تاپشىلىعىنا تاپ بولىپ, قۇرىلىس مەرزىمىندە اياقتالمايىن دەپ تۇر.
سەناتورلار ءۇبى وزەنى ارقىلى وتەتىن كوپىردىڭ قۇرىلىسىنا دا باردى. مۇندا دا ءتيىستى جوبالىق ساراپتاما بولماي, جۇمىستار كەيىنگە قالدىرىلعان. بۇل اۋدانداعى كولىك قاتىناسىنا كەدەرگى بولىپ وتىر.
دەپۋتاتتار سونداي-اق ء«ۇبى» شەكارالىق وتكەلىنىڭ جاي-كۇيى سىن كوتەرمەي تۇرعانىن ايتادى. نىسانعا كىرمە جول مەن ءتيىستى ينفراقۇرىلىمنىڭ جاعدايى وتە ناشار. سەناتورلار بۇل جاعدايعا الاڭداۋشىلىق ءبىلدىرىپ, ءتيىستى وتىنىشتەردى سالالىق مينيسترلىكتەرگە جىبەرۋ كەرەكتىگىن ەسكەرتتى.
دەپۋتاتتار شىعىس قازاقستان وبلىسى عانا ەمەس, ءسۇت ونىمدەرىن باسقا وڭىرلەرگە دە جەتكىزەتىن «سيۆەر پليۋس» جشس ءسۇت زاۋىتىنىڭ جۇمىسىمەن دە تانىستى. وندا كادرمەن قامتاماسىز ەتۋ جانە ءوندىرىس قۋاتىن ۇلعايتۋدىڭ كەلەشەگى تالقىلاندى. ال قۇراما جەم زاۋىتىندا وبلىستىڭ اۋىل شارۋاشىلىعى سالاسىنىڭ قازىرگى جاي-كۇيى, ساپالى ازىقپەن قامتاماسىز ەتۋ پروبلەمالارى, سونداي-اق اگرارلىق سەكتوردى قولداۋ تالقىلاندى.
ال سەناتور اندرەي لۋكين بيىل قىركۇيەكتە استانادا وتەتىن الەمدىك جانە ءداستۇرلى دىندەر ليدەرلەرىنىڭ VIII سەزىنە دايىندىق اياسىندا ەلوردادا سالىنىپ جاتقان جاڭا عيباداتحانا كەشەنىنىڭ قۇرىلىسىمەن تانىستى. وندا مەملەكەتتىك ورگاندار, ءدىني قىزمەتكەرلەر مەن مەردىگەر ۇيىمداردىڭ وكىلدەرىمەن كەڭەس ءوتتى.
سەناتوردىڭ ايتۋىنشا, بۇل جوبا ءدىني كونفەسسيالار اراسىنداعى ديالوگتى نىعايتۋعا ىقپال ەتەدى. سونداي-اق دىنارالىق جانە مادەنيەتارالىق ىنتىماقتاستىق ورتالىعى رەتىندەگى ەلىمىزدىڭ جاھاندىق ميسسياسىن ىلگەرىلەتۋگە دە ۇلەس قوسادى.
«بۇل كەشەن ساۋلەت ونەرىنىڭ ءزاۋلىم عيماراتى, سونداي-اق حالىقارالىق قوعامداستىق الدىندا ەل بىرلىگى, رۋحاني مۇراسى مەن اشىقتىعىنىڭ بەينەسىنە اينالادى. الەمدىك جانە ءداستۇرلى دىندەر كوشباسشىلارىنىڭ VIII سەزىنە دەيىن جوبا تولىق اياقتالۋعا ءتيىس», دەدى ا.لۋكين.
ساۋلەتتى عيماراتتار كەشەنى قۇرامىندا اۋليەلەر عيباداتحاناسى, سەرگي رادونەجسكي شىركەۋى, سونداي-اق رۋحاني-مادەني جانە اعارتۋ ورتالىعى بار. قازاقستاننىڭ ءدىني جانە مادەني باي مۇراسىن بەينەلەيتىن جاڭا كەشەن ەلورداداعى رۋحاني ماڭىزدى ورىنعا اينالۋعا ءتيىس. ول قايىرىمدىلىق قارجىسىنا سالىنىپ جاتىر.
