«مەملەكەت باسشىسى ۇكىمەت الدىنا ءومىر ساپاسىن جاقسارتۋ, حالىقتىڭ ءالجۋاز توپتارىن قورعاۋ جانە الەۋمەتتىك ينفراقۇرىلىمدى قالىپتاستىرۋ جونىندە تاپسىرمالار بەرگەن بولاتىن. بۇل باعىتتا كەشەندى جۇمىس اتقارىلىپ جاتىر. بۇگىندە مەملەكەت ءوزىنىڭ الەۋمەتتىك مىندەتتەمەلەرىن تولىق ورىنداۋدا. بيۋدجەتتىڭ جارتىسىنان كوبى وسى سالاعا جۇمسالادى. سونىڭ ىشىندە بىرنەشە ساناتقا توقتالا كەتسەم. جىل باسىنان بەرى 1,2 ملن بالاسى بار وتباسىنىڭ جاردەماقىلارى 6,5%-عا ارتتى. وعان رەسپۋبليكالىق بيۋدجەتتەن 870 ملرد تەنگە ءبولىندى. ول 2024 جىلمەن سالىستىرعاندا شامامەن 17%-عا كوپ», دەدى ەرمەك كوشەرباەۆ.
ۆيتسە-پرەمەردىڭ ايتۋىنشا, اتاۋلى الەۋمەتتىك كومەك 245 مىڭ ادامعا 16,2 ملرد تەڭگە كولەمىندە تولەنىپ جاتىر. مەملەكەت باسشىسى مۇمكىندىگى شەكتەۋلى جانە قارت ادامداردى قولداۋعا ۇكىمەتتىڭ الدىنا ەرەكشە نازار ءبولۋ تۋرالى مىندەت قويعان بولاتىن. جىل باسىنان بەرى زەينەتاقى تولەمدەرى 8,5%-عا ارتتىرىلدى. زەينەتاقىنىڭ ورتاشا مولشەرى 180 مىڭ تەڭگەنى قۇرايدى. بۇل ماقساتقا 4 ترلن تەڭگە جۇمسالۋدا.
«جالاقىنى ارتتىرۋ – حالىقتى كوپ تولعاندىراتىن ماسەلە. ەلىمىزدەگى ورتاشا جالاقى مولشەرى ءوسىپ, قازىر 423 مىڭ تەڭگەنى قۇرايدى. ەڭ تومەنگى جالاقى مولشەرىنىڭ ءوسۋى 600 مىڭ ازاماتتىق قىزمەتشىنىڭ ەڭبەكاقىسىنىڭ وسۋىنە ىقپال ەتتى. جارتى جىلدىڭ قورىتىندىسى بويىنشا 250 مىڭ ادام جۇمىسپەن قامتىلدى. بۇل باعىتتا تسيفرلىق پلاتفورما ەنگىزىلۋدە. نەگىزگى ماقسات – ناقتى كومەككە مۇقتاج وتباسىلاردى قولداۋ. بۇل مەملەكەت باسشىسىنىڭ تىكەلەي تاپسىرماسى», دەدى پرەمەر-ءمينيستردىڭ ورىنباسارى.
ۆيتسە-پرەمەر وڭىرلەردە زاماناۋي اۋرۋحانالاردىڭ قۇرىلىسى جانە مەديتسينالىق مەكەمەلەردى جاڭعىرتۋ جۇمىستارى جۇرگىزىلىپ جاتقانىن اتاپ ءوتتى. جىل سايىن انا مەن بالا ءولىمى تومەندەپ, ءدارى-دارمەكپەن قامتاماسىز ەتۋ جاقسارىپ كەلەدى.
«پرەزيدەنتتىڭ «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى تاپسىرماسىنا سايكەس 500-دەن استام نىساننىڭ قۇرىلىسى اياقتالدى. جىل سوڭىنا دەيىن تاعى 140-تان استام اۋىلدىق امبۋلاتوريا مەن مەديتسينالىق پۋنكتتەر ىسكە قوسىلادى. وڭىرلەرگە ساپار بارىسىندا وسى نىسانداردىڭ قۇرىلىس بارىسىمەن, سونداي-اق ولاردىڭ مەديتسينالىق كادرلارمەن قامتاماسىز ەتىلۋىمەن تانىسقانىمدى اتاپ وتكىم كەلەدى. جالپى, ۇلتتىق جوبانىڭ ناتيجەسىندە اۋىلداعى مەديتسينالىق كومەكتىڭ قولجەتىمدىلىگى ارتىپ كەلەدى», دەدى ەرمەك كوشەرباەۆ.
ول سونداي-اق كەيىنگى ۋاقىتتا دارىگەرلەر مەن مەدبيكەلەرگە قاتىستى زورلىق-زومبىلىق جاعدايلارى ولاردىڭ كاسىبي مىندەتتەرىن ورىنداۋ كەزىندە جيىلەپ كەتكەنىن ايتتى. قازىر مەملەكەت باسشىسىنىڭ تاپسىرماسى بويىنشا دەپۋتاتتىق كورپۋسپەن بىرلەسىپ وسىنداي ارەكەتتەر ءۇشىن قىلمىستىق جاۋاپتىلىقتى قاتاڭداتۋ بويىنشا زاڭنامالىق تۇزەتۋلەر پاكەتى ازىرلەندى.
سونىمەن قاتار ۆيتسە-پرەمەر جىل باسىنان بەرى ەلىمىز بويىنشا 13 مىڭ ورىندىق 172 بالاباقشا اشىلعانىن حابارلادى. سونىڭ ناتيجەسىندە بالاباقشاعا كەزەك ازايعان. مەملەكەت باسشىسىنىڭ تاپسىرماسىنا سايكەس 1,7 ملن وقۋشى تەگىن ىستىق تاماق ىشەدى. ولاردىڭ ىشىندە الەۋمەتتىك وسال توپتاردان 99 مىڭ بالا بار. ولاردى قولداۋعا 18,4 ملرد تەڭگە ءبولىندى. تاماقتانۋدىڭ جاڭا ستاندارتى ەنگىزىلدى: كوكونىستەر كوپ, قانت از, زياندى تاعامدار الىنىپ تاستالدى. «ۇلتتىق قور – بالالارعا» باعدارلاماسى بويىنشا 6,8 ملن بالاعا اقشالاي قاراجات اۋدارىلدى. ولار ونى بولاشاقتا ءبىلىم مەن تۇرعىن ۇيگە پايدالانا الادى. مەكتەپتەردىڭ قۇرىلىسى مەن قايتا جاڭعىرتۋ جۇمىستارى جالعاسۋدا. كەيىنگى ەكى جىلدا 388 مىڭ ورىندىق 274 جاڭا مەكتەپ اشىلدى. ونىڭ ىشىندە «جايلى مەكتەپ» ۇلتتىق جوباسى اياسىندا 115 مەكتەپ بار. تاعى 177 مەكتەپتىڭ قۇرىلىسى ءجۇرىپ جاتىر.
«پرەزيدەنتتىڭ نۇسقاۋىنا سايكەس 245 مەكتەپتى كەشەندى جاڭارتۋ جۇرگىزىلۋدە. بۇل جالپى ءبىلىم بەرەتىن مەكتەپتەردىڭ ستاندارتتارىن جايلى مەكتەپتەرگە جاقىنداتۋعا مۇمكىندىك بەرەدى. ناتيجەسىندە, 95 مىڭنان استام وقۋشىنىڭ وقۋ جاعدايى جاقسارۋدا», دەدى ەرمەك كوشەرباەۆ.
ستۋدەنتتىك ستيپەنديا مەن كوللەدجدەردى قارجىلاندىرۋ ەكى ەسە ءوستى. بيىل جوو-عا ءتۇسۋ ءۇشىن ماگيستراتۋرا مەن دوكتورانتۋرانى قوسا العاندا 93 مىڭ گرانت بولىنەدى. جەتەكشى شەتەلدىك ۋنيۆەرسيتەتتەردىڭ 24 فيليالى اشىلدى. جاڭا جاتاقحانالاردىڭ ىسكە قوسىلۋىنىڭ ناتيجەسىندە ورىن تاپشىلىعى 72%-عا قىسقاردى. ناتيجەسىندە, قازىرگى ۋاقىتتا بۇل ماسەلە شەشىلىپ كەلەدى. بۇل جۇمىستار جالعاسىن تابادى.
پرەمەر-ءمينيستردىڭ ورىنباسارى بيىل 5 ساۋىقتىرۋ ورتالىقتارى اشىلعانىن ايتتى.
«بالالاردىڭ جازعى دەمالىسى مەن ساۋىقتىرۋى بويىنشا بيىل 10 مىڭنان استام مەكتەپ جانىنداعى لاگەر مەن 220 قالادان تىس جازعى ساۋىقتىرۋ ورتالىقتارى قىزمەت كورسەتۋدە. ناتيجەسىندە, 3,4 ملن بالانى قامتىدىق. ءوزىم وڭىرلەرگە ىسساپارعا شىققاندا وسى لاگەرلەرگە ارنايى سوعىپ, بالالاردىڭ دەمالۋ جاعدايى مەن تاماقتانۋىنىڭ قاۋىپسىزدىگىن تەكسەرىپ ءجۇرمىن. بيىل 5 ساۋىقتىرۋ ورتالىقتارى اشىلدى. جىل سوڭىنا دەيىن قوسىمشا تاعى 27 ورتالىق ىسكە قوسىلادى. مۇنىڭ ساپاسىن ارتتىرۋ ماقساتىندا كەلەسى جىلدان باستاپ بۇل قىزمەت ليتسەنزيالانادى», دەدى.
بيىل – اباي قۇنانباي ۇلىنىڭ 180 جىلدىعى. قازىر ەلىمىزدە بىرقاتار ءىس-شارا وتكىزىلۋدە. نەگىزگى ءىس-شارالار تامىز-قىركۇيەك ايلارىنا جوسپارلانعان. وعان وڭىرلەر ۇلكەن دايىندىق جۇمىستارىن جۇرگىزىپ جاتىر. باستى ماقساتىمىز – ابايدىڭ مۇراسىن قۇرمەتتەپ, ۇرپاق ساناسىنا ءسىڭىرۋ. بۇل سالادا زاماننىڭ اعىمىنا ساي كرەاتيۆتى يندۋستريانىڭ دامۋىنا كوڭىل بولىنۋدە. وڭىرلەردە 16 كرەاتيۆتىك ورتالىق اشىلدى. ولارعا سالىق جەڭىلدىكتەرى ەنگىزىلگەن. ءبىلىم بەرۋ باعدارلامالارى ىسكە قوسىلعان. مۇنىڭ تۇپكى ماقساتى – دارىندى جاستاردى ىزدەپ, تابۋ. ولاردىڭ جوبالارىن قولداپ, ينۆەستورلاردى تارتۋ. ودان سوڭ وتاندىق كرەاتيۆتىك ونىمدەردى حالىقارالىق نارىققا شىعارۋ.
پرەمەر-ءمينيستردىڭ ورىنباسارى ەرمەك كوشەرباەۆ 5,5 مىڭ جاس جاڭا ءۇي العانىن اتاپ ءوتتى. «سونداي-اق جاستاردى قولداۋ ماقساتىندا دا كەشەندى شارالار جۇزەگە اسىرىلۋدا. ونىڭ ىشىندە نەگىزگى ماسەلە – جاستاردى تۇرعىن ۇيمەن قامتاماسىز ەتۋ. «ناۋرىز» جانە «وتاۋ» تۇرعىن ءۇي باعدارلامالارىنا بيۋدجەتتەن 220 ملرد تەڭگە ءبولىندى. ناتيجەسىندە, 5,5 مىڭ جاس جاڭا ءۇي الدى», دەدى ەرمەك كوشەرباەۆ.
سونىمەن قاتار پرەمەر-ءمينيستردىڭ ورىنباسارى بيىل جۇمىسشى جاستاردى دەمەۋ ءۇشىن «ناۋرىز جۇمىسكەر» بانك ءونىمى ىسكە قوسىلعانىن اتاپ ءوتتى. وبلىستاردا جاس ماماندارعا ارنالعان وڭىرلىك يپوتەكالىق باعدارلامالار جاستارعا ۇلكەن مۇمكىندىك بەرۋدە. ۇكىمەت بۇل جۇمىستاردى ءارى قاراي جۇيەلى تۇردە جالعاستىرادى.
