بۇگىندە باسپانا الۋ ءۇشىن جىلدار بويى ءۇي كەزەگىندە تۇرعان ادامدار قالادا عانا ەمەس, اۋىلدىق جەرلەردە دە كوپ. سونداي قولجەتىمدى باسپاناعا قول جەتكىزە الماي جۇرگەن كوپبالالى ءارى جالعىزىلىكتى انانىڭ ءبىرى – سايانگۇل قالقاشوۆا. جارما اۋدانى, قاراتوبە اۋىلدىق وكرۋگى ءادي (وسى اۋىلدا تۋعان مايدانگەر جازۋشى, فيلولوگيا عىلىمدارىنىڭ دوكتورى ءادي ءشارىپوۆتىڭ قۇرمەتىنە قويىلعان اتاۋ) اۋىلىنىڭ تۇرعىنى ەكەن.
كۇمىس القا يەگەرى س.قالقاشوۆانىڭ ايتۋىنشا, ءۇي كەزەگىنە 2000 جىلى تۇرىپتى. تابانى كۇرەكتەي 25 جىل. كەزەگىن شيرەك عاسىر تابان اۋدارماي كۇتكەن انانىڭ التى بالاسى بار, كۇيەۋى 2022 جىلى دۇنيەدەن وتكەن. ءبىر بالاسىنىڭ كورۋ قابىلەتى تومەن, بىراق مۇگەدەكتىگىن ءالى الا الماعان. بۇگىندە بالالاردىڭ ۇلكەن ەكەۋى كامەلەت جاسىنان اسقان. قىزى تۇرمىسقا شىعىپ, ۇلكەن ۇلى اناسى مەن باۋىرلارىنا كومەكتەسەمىن دەپ وقۋىن تاستاپ, جۇمىس ىستەپ كەتكەن.
سونىمەن 25 جىل وتسە دە, ءۇي كەزەگىندە وزگەرىس جوق, كەرىسىنشە كەزەگى شەگەرىلە بەرگەن. ءتىپتى 2021 جىلى, كەيىن 2023 جىلى جەلتوقسان ايىندا كەزەككە تۇرعان. بىراق تىركەگەنى دە ەسەپكە الىنباي, 2024 جىلدىڭ جەلتوقسانىندا كەزەككە قايتا تۇرۋعا ماجبۇرلەگەن كورىنەدى.
– 2024 جىلى جەلتوقساندا ءۇي كەزەگىنە تاعى تۇردىم. قازىر, مىنە, كەزەكتە توقسانىنشىمىن. ماعان اۋدان اكىمىنىڭ ءوزى سول كەزدە ءبىر-ەكى ايدىڭ ىشىندە ءۇي الاسىز دەگەن. الايدا ەكى اي تۇگىلى, التى اي ءوتتى. التى اي ىشىندە اكىمگە تاعى دا ءۇش رەت باردىم. «سىزگە ءۇي جوق ەمەس, بار, الاسىز» دەيدى دە, شىعارىپ سالادى. 9-سىنىپ بىتىرگەن بالام ەكى جىلدان كەيىن 18 جاسقا تولادى. سودان سوڭ كامەلەتكە تولماعان ءۇش بالام عانا قالادى. وندا ماعان تالاپ بويىنشا ءۇي بەرىلمەيدى, – دەيدى س.قالقاشوۆا.
سايانگۇل سەكىلدى قانشاما انانىڭ جىلدار بويى سارىلا كۇتكەن پاتەرىنە كەزەگى ەندى كەلە بەرگەندە, نە جاسى زەينەتكەرلىككە جەتىپ, نە بالالارى كامەلەتكە تولىپ, باسپانا كوزدەن بۇلبۇل ۇشاتىنى جاسىرىن ەمەس.
– قازىر ۇيىمدەگى پەشىم قۇلاپ تۇر. نە كومەكتەسەتىن ادام جوق. جانىمدا وتىرعان تۋىس-تۋعانىم دا جوق. اكەم ومىردەن وزىپ كەتتى, شەشەمىز سەكسەنگە كەلدى. ول كىسىنىڭ وزىنە كومەك كەرەك, – دەپ كوپبالالى انا مۇڭىن شاقتى.
«اۋىلدان نەگە كوشكىلەرىڭىز كەلەدى؟» دەپ سۇرادىم. جالعىزىلىك انا اۋىلدىڭ بولاشاعىنا سەنبەيدى. «ويتكەنى اۋىلدا قازىر ەلۋدەي ءتۇتىن قالعان, مەكتەپتىڭ ءوزى ارەڭ تۇر. ءبىر سىنىپتا ءبىر بالا وقيدى. 9 سىنىپقا دەيىن عانا. نە بايلانىس جوق, جان-جاقپەن سويلەسكىسى كەلەتىن جۇرت وسىلاي جەلى قۋالاپ تاۋدا جۇرەدى», دەيدى.
اباي وبلىسى
