قۋانىشتى حاباردى ەستي سالا ستريتليفتينگتەن الەمنىڭ جەتى دۇركىن, قول كۇرەسىنەن الەمنىڭ بەس دۇركىن, كىر تاسىن كوتەرۋ سپورتىنان الەم چەمپيونى, كىر سپورتى مەن قول كۇرەسىنەن دۇنيەجۇزىلىك فەدەراتسيانى ۇزاق جىل باسقارعان مۇقان اعزاموۆپەن حابارلاسقان ەدىك.
– ستريتليفتينگ – جىلدام قارقىنمەن ءوسىپ كەلە جاتقان سپورت ءتۇرى. قازىر الەمنىڭ جۇزگە تارتا ەلى وسى سپورت تۇرىمەن شۇعىلدانادى. بۇل جولى 17 مەملەكەتتەن 560 ساڭلاق سپورتشى جۇلدەلەردى ساراپقا سالدى. ەپتىلىك, جوعارى شەبەرلىك, سپورتتىڭ بىرنەشە ءتۇرىن توپتاستىرعان سايىس ەلىمىزدە دە دامىپ كەلەدى. ءبىر جىل بۇرىن ءۇندى ەلىنىڭ حايداراباد قالاسىندا وتكەن الەم چەمپيوناتىنان جەتى التىن, ەكى كۇمىس, ءبىر قولا مەدال الىپ, كوماندالىق ەسەپتە ءۇشىنشى ورىنعا يە بولعان ەدىك. بۇل جولى نەبارى جەتى ساڭلاق بارىپ, بەسەۋىمىز الەم چەمپيونى بولىپ ورالدىق. اتاپ ايتار بولسام, باۋىرىم ەرىك (وسىمەن ءتورتىنشى رەت), نەمەرەم دىنمۇحامەد 14-16 جاستاعى جاسوسپىرىمدەر اراسىندا, مەن ارداگەرلەر اراسىندا, يۆان مالكوۆ پەن ۆلاديمير جايناقوۆ التىننان القا تاقتىق, – دەپ مالىمدەدى مۇقان ساعيدوللا ۇلى.
م.اعزاموۆ ۇزاق جىلدان بەرى ۇلان اۋدانىنا قاراستى ايىرتاۋ اۋىلىندا تۇرادى. تەحنيكا عىلىمدارىنىڭ كانديداتى, پروفەسسور, اۋىل شارۋاشىلىعىنىڭ مايتالمان مامانى, كەزىندە وننان استام راتسيوناليزاتورلىق جاڭالىقتاردى وندىرىسكە ەنگىزگەن, جيىرمادان استام ونەرتابىستىق پاتەنتى بار. مۇقان ساعيدوللا ۇلىنىڭ شەگىرتكەنى جويۋعا ارنالعان قوندىرعىسىن ءوڭىردىڭ شارۋا قوجالىقتارى كەڭىنەن پايدالانعان. سارسەن امانجولوۆ اتىنداعى شىعىس قازاقستان ۋنيۆەرسيتەتىندە جاس كادرلارعا ءوز تاجىريبەسىن ۇيرەتىپ, ءدارىس وقيدى. ۇزاق جىل كىر سپورتى مەن قول كۇرەسىنەن دۇنيەجۇزىلىك فەدەراتسيانىڭ ۆيتسە-پرەزيدەنتى, پرەزيدەنتى بولدى. الەم چەمپيوناتتارى مەن ازيا بىرىنشىلىكتەرىندە كىر سپورتى مەن قول كۇرەسىنەن ون ەكى رەت جۇلدەگەر, جەتى رەت چەمپيون اتاندى.
اعزاموۆتار – سپورتشىلار اۋلەتى. وتكەن جىلى مۇقان ساعيدوللا ۇلىنىڭ باۋىرى ەرىك اعزاموۆتىڭ ۇلى جان ستريتليفتينگتەن ازيا فەدەراتسياسىنىڭ پرەزيدەنتى, ۇلى ءجۇرسىن دۇنيەجۇزىلىك فەدەراتسيانىڭ ۆيتسە-پرەزيدەنتى بولىپ سايلاندى. ەكى وليمپيادا ويىندارىنا قاتىسقان, قازاق كۇرەسىنەن تۇيە بالۋان رۋسلان سەيىلحانوۆتىڭ ەسىمى سپورت سۇيەر قاۋىمعا جاقسى تانىس. رۋسلاننىڭ ۇلى سايات تا بولاشاعىنان ءۇمىت كۇتەتىن جاس. ۇستاز, پروفەسسور, جاڭاشىل عالىم مۇقان اعزاموۆتىڭ بەرگەنىنەن بەرەرى كوپ. ەلىمىزدىڭ اتاق-داڭقىن بۇكىل الەمگە تانىتىپ جۇرگەن سپورتشىلار اۋلەتىنىڭ شىعار بيىگى ءالى الدا.
وڭداسىن ەلۋباي,
قازاقستاننىڭ قۇرمەتتى سپورت قىزمەتكەرى
شىعىس قازاقستان وبلىسى,
ۇلان اۋدانى
