فوتو: ca.kontur.ru
ەندى پاتسيەنتتەر مەدبيكەگە دارىگەردىڭ كومەكشىسى رەتىندە عانا ەمەس, ناۋقاستاردى قابىلدايتىن تولىققاندى مامان رەتىندە جازىلا الادى. قابىلداۋدا الەۋمەتتىك جانە پسيحولوگيالىق تاۋەكەلدەرگە, ونىڭ ىشىندە وسالدىق فاكتورلارىنا, ءومىر ءسۇرۋ جاعدايلارىنا, تاماقتانۋعا, كۇتىمگە جانە باسقا دا قاعيدالارعا قاتىستى ساۋالناما جۇرگىزىلەدى. بۇل پاتسيەنت جاعدايىنىڭ نەگىزدەلگەن بەينەسىن قالىپتاستىرۋعا جانە كەلەسى قادامداردى جاساۋعا مۇمكىندىك بەرەدى. وسىدان كەيىن مەدبيكە دياگنوز قويادى. كلاسسيفيكاتورعا سايكەس مەيىرگەرلىك ارالاسۋدى ورىندايدى. ادق ءۇزىندىسىن, انىقتامالاردى رەسىمدەيدى جانە ديناميكالىق باقىلاۋ جوسپارى بويىنشا ۇسىنىستار بەرەدى. وسىلايشا, مەدبيكەلەردىڭ قۇزىرەتى ارتادى.
سونىمەن, دارىگەرلەر كۇردەلى كلينيكالىق جاعدايلارعا ەرەكشە نازار اۋدارادى دەدىك. وسىنىڭ ارقاسىندا ديناميكالىق باقىلاۋمەن قامتۋ 38%-عا دەيىن وسكەن. ال سوزىلمالى سىرقاتى بار پاتسيەنتتەرگە كوزقاراس بۇرىنعىدان جۇيەلى ءارى ساپالى بولا تۇسكەن. مەديتسينالىق-سانيتاريالىق العاشقى كومەك باعىتىنداعى تاعى ءبىر جاڭالىقتى رەسپۋبليكالىق مەديتسينالىق-سانيتاريالىق العاشقى كومەك ورتالىعىنىڭ ديرەكتورى ايگۇل قاسىموۆا ايتىپ بەردى.
«ەكىنشى جاڭاشىلدىق – «جوسپارلانعان قابىلداۋ» فورماتىن ەنگىزۋ. ول ۋاقىت بويىنشا الدىن-الا انىقتالعان ادىستەرگە قاتىستى. مۇنداي شارا سوزىلمالى اۋرۋلارى بار ناۋقاستاردى بەلسەندى باقىلاۋ جانە وزدىگىنەن ەمدەۋدى ازايتۋ ءۇشىن قابىلداندى. بۇل شۇعىل وتىنىشتەر سانىن قىسقارتۋعا, ەمدەۋگە جاتقىزۋ دەڭگەيىن تومەندەتۋگە جانە حالىقتىڭ باستاپقى بۋىن ماماندارىنا دەگەن سەنىمىن ارتتىرۋعا مۇمكىندىك بەرەدى. ديناميكالىق باقىلاۋدا تۇرعان پاتسيەنتتەر ءۇشىن «وزدىگىنەن جازىلۋ» فۋنكتسياسى ەنگىزىلەدى. ياعني, جەكە قابىلداۋ كەستەلەرى قالىپتاسادى, پاتسيەنتتەر اعىنى رەتتەلەدى», دەدى ا.قاسىموۆا.
بۇدان وزگە, پاتسيەنتتەر ەندى تىركەۋشىنىڭ نەمەسە ۋچاسكەلىك دارىگەردىڭ كومەگىنسىز بەيىندى ماماندارعا جازىلا الادى. ال جوسپارلى ەمدەۋگە جاتقىزۋ الدىندا كونسۋلتاتسيالىق-دياگنوستيكالىق قىزمەتتەر ناتيجەلەرىن قولدانۋ مەرزىمى 10 كۇننەن 1-3 ايعا دەيىن ۇزاردى. دەمەك, ەندى پاتسيەنتتەر بۇرىنعىداي دياگنوستيكادان كەيىن 10 كۇن وتسە, قايتا تەكسەرۋدەن وتپەيدى. وسىلايشا, دارىگەر مەن پاتسيەنتتەردىڭ ۋاقىتى ۇنەمدەلەدى.
