اۋرۋدىڭ تارالۋ گەوگرافياسى كەڭەيىپ كەلەدى. ددسۇ وكىلى ديانا روحاس الۆارەستىڭ مالىمەتىنشە, ۆيرۋس 2025 جىلدىڭ باسىندا ءۇندى مۇحيتى ايماعىندا – رەيۋنون, مايوتتا جانە ماۆريكي ارالدارىندا تىركەلىپ, كەيىن ماداگاسكار, سومالي, كەنيا, وڭتۇستىك-شىعىس ازيا جانە ۇندىستانعا تاراعان. قازىرگى تاڭدا ەۋروپادا دا ىندەت بەلگىلەرى انىقتالىپ وتىر.
«1 مامىردان بەرى فرانتسيادا 800-گە جۋىق اكەلىنگەن جاعداي تىركەلدى. ەلدىڭ وڭتۇستىگىندە ۆيرۋس ەندەميالىق ايماققا بارماي-اق, جەرگىلىكتى جولاق ماسالار ارقىلى تاراعان. مۇنداي جاعداي جاقىندا يتاليادا دا تىركەلدى», دەدى ددسۇ وكىلى.
چيكۋنگۋنيا ۆيرۋسى جوعارى تەمپەراتۋرا, بۋىن اۋرۋى جانە كەي جاعدايدا ۇزاققا سوزىلاتىن اسقىنۋلارمەن سيپاتتالادى. اۋرۋعا قارسى ارنايى ەم جوق. ول كوبىنە Aedes تۇرىندەگى جولاق ماسالار ارقىلى جۇعادى. بۇل ماسالار دەنگە مەن زيكا ۆيرۋستارىن دا تاسىمالدايدى جانە كۇندىز شاعاتىنىمەن ەرەكشەلەنەدى.
ساراپشىلاردىڭ ايتۋىنشا, ەڭ ءتيىمدى الدىن الۋ شارالارى رەپەللەنتتەر قولدانۋ, ۇزىن جەڭدى جانە جابىق كيىم كيۋ.
چيكۋنگۋنيا ۆيرۋسىنىڭ سوڭعى ءىرى ءورشۋى 2004-2005 جىلدارى تىركەلگەن بولاتىن. ول كەزدە اۋرۋ نەگىزىنەن شاعىن ارالدىق اۋماقتاردا تارالىپ, جارتى ميلليونعا جۋىق ادام اۋىرعان.
ددسۇ ىندەتتىڭ جاھاندىق دەنساۋلىققا قاۋىپ توندىرەتىنىن ەسكەرتىپ وتىر. سوندىقتان, ازاماتتار ءوز قاۋىپسىزدىگىنە ءمان بەرىپ, ماسا شاعۋىنان ساقتانۋ شارالارىن كۇشەيتكەنى ءجون.
