ەلىمىزدە سپورتتى قارجىلاندىرۋدىڭ جاڭا تاسىلدەرى ەنگىزىلىپ جاتىر

وڭىرلىك سپورت باسقارمالارى مەن ۇلتتىق سپورت فەدەراتسيالارىنا بيۋدجەت قاراجاتىن ۇنەمدەپ, قارجىلاندىرۋدىڭ قايتالانۋىن بولدىرماۋ ءۇشىن «1 ءوڭىر – 1 كلۋب – 1 سپورت ءتۇرى» قاعيداتىن ۇستانۋ ۇسىنىلدى. بۇل تۋرالى بۇگىن تۋريزم جانە سپورت ءمينيسترىنىڭ ورىنباسارى سەرىك جاراسباەۆ تۋريزم جانە سپورت ءمينيسترى ەربول مىرزابوسىنوۆتىڭ توراعالىعىمەن وتكەن وڭىرلىك باسقارمالاردىڭ, ۆەدومستۆولىق باعىنىستى ۇيىمداردىڭ, سپورت فەدەراتسيالارى باسشىلارىمەن وتكەن كەڭەس بارىسىندا مالىمدەدى.

بيىل ماۋسىمدا كۇشىنە ەنگەن «دەنە شىنىقتىرۋ جانە سپورت تۋرالى» زاڭعا سايكەس, كوماندالىق سپورت تۇرلەرى بويىنشا كاسىبي كلۋبتاردى قارجىلاندىرۋعا شەكتەۋ ەنگىزىلدى. بۇل – قارجىنىڭ اشىق ءارى ءتيىمدى جۇمسالۋىن قامتاماسىز ەتىپ, كلۋبتاردى بالاما قارجى كوزدەرىن تارتۋعا باعىتتالعان ماڭىزدى قادام.

سونداي-اق زاڭ بويىنشا شەتەلدىك سپورتشىلاردى ۇستاۋعا جانە ولارعا ەڭبەكاقى تولەۋگە بيۋدجەت پەن كۆازيمەملەكەتتىك سەكتوردىڭ قاراجاتىن پايدالانۋ تىيىم سالىندى. بۇل شەشىم جەرگىلىكتى كادرلاردى قولداۋعا, وتاندىق سپورتشىلاردىڭ باسەكەگە قابىلەتتىلىگىن ارتتىرۋعا جانە ۇلتتىق سپورت مەكتەپتەرىن دامىتۋعا باعىتتالعان.

جاڭارتىلعان زاڭ اياسىندا سپورتتى ستراتەگيالىق تۇرعىدان دامىتۋعا باعىتتالعان بىرقاتار ماڭىزدى نورمالار ەنگىزىلدى.

باسىم سپورت تۇرلەرى ايقىندالدى

مينيسترلىك وليمپيادا, پاراليمپيادا, سۋردليمپيادا, ازيا جانە ازيا پارا ويىندارىنداعى ۇلتتىق قۇرامالاردىڭ ناتيجەلەرىن ەسكەرە وتىرىپ, 60-تان استام باسىم سپورت ءتۇرىنىڭ ءتىزىمىن بەكىتتى.

11 ۇلتتىق سپورت ءتۇرى باسىم سپورت تۇرلەرى قاتارىنا ەنگىزىلدى

بيىلدان باستاپ ۇلتتىق سپورت تۇرلەرى دە وليمپيادالىق باعىتتارمەن قاتار ماقساتتى قارجىلاندىرۋعا جانە جوعارى جەتىستىكتەر سپورتى رەتىندە جۇيەلى دامۋعا مۇمكىندىك الادى.

«مۇگەدەكتىگى بار سپورتشىنى سۇيەمەلدەۋشى» ۇعىمى زاڭمەن بەكىتىلدى

زاڭنامادا العاش رەت ءى توپتاعى مۇگەدەكتىگى بار سپورتشىنى الىپ جۇرەتىن تۇلعا ۇعىمى ەنگىزىلدى. بۇل نورما ولاردىڭ جاتتىعۋ مەن جارىستارعا تەڭ قول جەتكىزۋىن قامتاماسىز ەتىپ, سپورتتاعى ينكليۋزيۆتىلىكتى ارتتىرۋدى كوزدەيدى.

سپورت ۇيىمدارى باسشىلارى ءۇشىن روتاتسيا جۇيەسى ەنگىزىلدى

ەندى سپورت ۇيىمدارىنىڭ باسشىلارى 5 جىل مەرزىمگە تاعايىندالادى. كادر تاپشىلىعى بار وڭىرلەردە روتاتسيا وبلىس ىشىندەگى كورشىلەس اۋداندار اراسىندا جۇزەگە اسىرىلادى.

قابىلدانعان شارالار – وتاندىق سپورتتى تۇراقتى ءارى ءتيىمدى مودەل بويىنشا دامىتۋعا باعىتتالعان كەشەندى رەفورمانىڭ ءبىر بولىگى. تۋريزم جانە سپورت مينيسترلىگى زاڭدا كوزدەلگەن نورمالاردى مەملەكەتتىك ساياسات اياسىندا ىسكە اسىرىپ, ولاردىڭ ورىندالۋىن بارلىق دەڭگەيدە قامتاماسىز ەتەدى.