سۋرەت: ult.kz
قازاقستاندا جاستاردى قولداۋدىڭ جۇيەلى باعدارلاماسى جۇزەگە اسىرىلىپ جاتىر. ول 2029 جىلعا دەيىنگى مەملەكەتتىك جاستار ساياساتى تۇجىرىمداماسىنا نەگىزدەلگەن. بۇل تۇجىرىمدامانىڭ باستى ەرەكشەلىگى – جاستار ءۇشىن جۇمىس ىستەۋ ەمەس, جاستارمەن بىرگە تەڭ دارەجەدە قىزمەت ەتۋ. قۇجات قازىرگى زامانعى سىن-قاتەرلەر مەن جاڭا بۋىننىڭ سۇرانىستارىنا ساي بەيىمدەلگەن.
«قازاقستان جاستارى – 2024» ۇلتتىق بايانداماسىنا سايكەس, جاستاردىڭ باستى سۇرانىستارىنىڭ ءبىرى – باسپانامەن قامتاماسىز ەتۋ. وسىعان جاۋاپ رەتىندە مەملەكەت باسشىسىنىڭ تاپسىرماسىمەن «ناۋرىز» جانە «وتاۋ» جەڭىلدەتىلگەن تۇرعىن ءۇي باعدارلامالارى ىسكە قوسىلدى. بۇل باستامالارعا 219,8 ملرد تەڭگە ءبولىندى. قازىردىڭ وزىندە 35 جاسقا دەيىنگى 5,4 مىڭنان اسا ازامات مەملەكەتتىك قولداۋعا يە بولدى.
«Jas Kenes Syilygy» اتتى بەدەلدى جاستار سىيلىعىنا ءوتىنىم قابىلداۋ باستالدى. سونىمەن قاتار «تاۋەلسىزدىك ۇرپاقتارى» گرانتى مەن «دارىن» مەملەكەتتىك جاستار سىيلىعى سياقتى دارىندى ءارى بەلسەندى جاستاردى قولداۋعا باعىتتالعان ماڭىزدى باعدارلامالار جۇزەگە اسىرىلىپ كەلەدى.
جارتىجىلدىقتاعى ماڭىزدى وقيعالاردىڭ ءبىرى – الماتى قالاسىنىڭ ورتالىق ازيا ەلدەرى بويىنشا 2025 جىلعى جاستار استاناسى اتانۋى. بۇل – قالانىڭ جاستار ساياساتىن دامىتۋعا قوسقان ۇلەسىنىڭ حالىقارالىق دەڭگەيدە باعالانۋى. سونداي-اق شانحاي ىنتىماقتاستىق ۇيىمىنا مۇشە ەلدەردىڭ جاس كوشباسشىلارى مەن تالانتتارىنىڭ كەزدەسۋى وتپەك. بۇل ءىس-شارا جاستار اراسىندا تاجىريبە الماسۋ مەن ىنتىماقتاستىقتى نىعايتۋدىڭ الاڭىنا اينالادى.
2024-2026 جىلدارعا ارنالعان رەسپۋبليكالىق جاستار ۇيىمدارىمەن ىنتىماقتاستىق جونىندەگى جول كارتاسى اياسىندا بىرقاتار ءىرى ءىس-شارا ءوتتى. اتاپ ايتساق, ASK Camp فورۋمى, «jas power talks», سونداي-اق «جايدارمان» رەسپۋبليكالىق ويىندارى ۇيىمداستىرىلدى.
«جاسىل ەل» جاستار ەڭبەك جاساقتارىنىڭ جاڭا ماۋسىمى باستالدى. ونىڭ سالتاناتتى اشىلۋى اقتوبە قالاسىندا ءوتتى. 2025 جىلى 35 مىڭنان اسا جاس وتانداسىمىزدى ماۋسىمدىق جۇمىسپەن قامتۋ جوسپارلانعان, ال ءبىرىنشى جارتىجىلدىقتا 14 مىڭ جاس ۋاقىتشا جۇمىسقا ورنالاستى.
