سەنات دەپۋتاتى اندرەي لۋكين «iKomek 109» – استانا قالاسى اكىمدىگىنىڭ قالالىق مونيتورينگ جانە ارەكەت ەتۋ ورتالىعىندا بولدى. سەناتوردىڭ ايتۋىنشا, ورتالىقتىڭ قازىرگى قىزمەتى تسيفرلىق سەرۆيستەردىڭ مىندەتىمەن ساي كەلىپ تۇر. ازاماتتاردىڭ ءوتىنىشى لەزدە ەسەپكە الىنىپ, ەلوردانىڭ شۇعىل جانە كوممۋنالدىق قىزمەتتەرىمەن ءوزارا ءىس-قيمىل جەدەل جولعا قويىلعان. وپەراتورلار قالا تۇرعىندارىنىڭ سۇرانىسىنا جاۋاپ بەرۋ جىلدامدىعىن ودان ءارى ارتتىرماق.
«iKomek 109» – جاي عانا كولل-ورتالىق ەمەس, استانا تۇرعىندارى مەن جەرگىلىكتى ءوزىن-ءوزى باسقارۋ ورگاندارى اراسىنداعى جەدەل جانە ءوزارا ساپالى ءىس-قيمىلدى قامتاماسىز ەتەتىن تولىققاندى كەرى بايلانىس جۇيەسى. وسى جىلدىڭ العاشقى جارتىسىندا 90 پايىزدان اسا ءوتىنىش مەرزىمىندە قارالعان. مۇنداي ءتاسىل ەلىمىزدىڭ باسقا وڭىرلەرىندە دە ەنگىزىلۋگە ءتيىس», دەدى ا.لۋكين.
دەپۋتات سونىمەن قاتار نۇرا جانە ەسىل اۋداندارىنىڭ باسشىلىعىمەن جانە اكتيۆىمەن كەزدەسۋلەر وتكىزدى. وندا اۋماقتاردى دامىتۋ, اباتتاندىرۋ, الەۋمەتتىك ينفراقۇرىلىم جانە حالىقپەن كەرى بايلانىس ماسەلەلەرى تالقىلاندى.
ال سەناتورلار سۇلتان دۇيسەمبينوۆ پەن عالياسقار سارىباەۆ جەتىسۋ وبلىسىنداعى قاراتال اۋدانىندا مادەنيەت, سپورت, دەنساۋلىق ساقتاۋ جانە اسكەري شاقىرۋ جۇيەسىن دامىتۋعا بايلانىستى بىرقاتار نەگىزگى نىساندى ارالادى.
دەپۋتاتتار مادەنيەت ۇيىندە مادەني-دەمالىس قىزمەتىن ۇيىمداستىرۋ, جاستاردى شىعارماشىلىق تۇرعىدا دامىتۋ جاعدايىمەن جانە ماتەريالدىق-تەحنيكالىق بازانىڭ جاي-كۇيىمەن تانىستى. ولار سونداي-اق سپورت كەشەنى مەن ۇستەل تەننيسىنە ارنالعان زالدا بولىپ, سەكتسيالاردى قارجىلاندىرۋ, سپورت رەزەرۆى مەن كادر دايارلاۋ ماسەلەلەرىن تالقىلادى. اۋداندىق اۋرۋحانادا مەديتسينا قىزمەتكەرلەرىمەن كەزدەسىپ, عيماراتتى كۇردەلى جوندەۋ, ماماندارمەن جانە جابدىقپەن قامتاماسىز ەتۋ, دياگنوستيكا قىزمەتتەرىنە قول جەتكىزۋ مۇمكىندىكتەرىمەن تانىستى.
«مەديتسينالىق قىزمەت كورسەتۋ اۋىل تۇرعىندارىنا دا ساپالى جانە قولجەتىمدى بولۋى كەرەك. ءار ازامات تۇرعىلىقتى جەرىنە قاراماستان, بىلىكتى مەديتسينالىق كومەكتى ۋاقتىلى جانە ءتيىمدى تۇردە الۋعا قۇقىلى», دەدى س.دۇيسەمبينوۆ.
اسكەرگە شاقىرۋ پۋنكتىندە بولعان دەپۋتاتتار اسكەرگە شاقىرۋ ناۋقانىن ۇيىمداستىرۋ, مەديتسينالىق كوميسسيادان ءوتۋ, سونداي-اق جاستاردى پاتريوتتىق رۋحتا تاربيەلەۋ جانە جالپى حالىقتىڭ اسكەرگە دەگەن سەنىمىن ارتتىرۋ ماسەلەلەرىن ءسوز ەتتى.
«اسكەرگە شاقىرىلۋشى ءبىرىنشى كۇننەن باستاپ ءوز ەلىنە قاجەت ەكەنىن, ءوزىن قولدايتىنىن, قۇرمەت پەن سەنىمدى سەزىنەتىن جۇيە قالىپتاستىرۋىمىز كەرەك. شاقىرۋ ءراسىمى ءاتۇستى نەمەسە سەلقوس وتپەۋى كەرەك, وتانعا قىزمەت ەتۋ سانالى تۇردە بولعانى ءجون. ءدال وسى كەزەڭدە قارۋلى كۇشتەر ينستيتۋتىنا دەگەن سەنىمنىڭ نەگىزى قالانادى, ال ول اسكەري قىزمەتتىڭ بەدەلىن ارتتىرادى», دەدى ع.سارىباەۆ.
سونداي-اق سەنات دەپۋتاتى ايگۇل قاپباروۆانىڭ شىمكەنت قالاسىنا ساپارى جالعاسىپ جاتىر. ول مادەني جانە شىعارماشىلىق سالا قىزمەتكەرلەرىمەن كەزدەستى. قازىر بۇل سالادا قوردالانعان ماسەلە كوپ. كەزدەسۋدە قاتىسۋشىلار سالانى جاڭعىرتۋعا جۇيەلى وزگەرىستەر كەرەك ەكەنىن ايتتى. اتاپ ايتقاندا, تەاتر, مۇراجاي جانە وزگە دە مادەني مەكەمەلەردىڭ بىرىڭعاي شتات كەستەسىنە زاماناۋي جاڭا ماماندىقتاردى ەنگىزۋ قاجەت. سونداي-اق مادەنيەت قىزمەتكەرلەرىنىڭ ەڭبەگىن باعالاۋ مەن ىنتالاندىرۋ رەتىندە قۇرمەتتى اتاقتار جانە ماراپاتتار بەرۋ تەتىگىن قايتا قاراۋ مەن كەڭەيتۋ تۋرالى ۇسىنىستار ايتىلدى.
«مادەني سالانى قولداۋ – ۇلتتىڭ رۋحاني دامۋىنا سالىنعان ينۆەستيتسيا. ءبىز جاس مامانداردىڭ كەلۋىنە جاعداي جاساپ, ونەر سالاسىنداعى كاسىپتەردىڭ كاسىبي ستاندارتتارى مەن بەدەلىن نىعايتۋىمىز كەرەك. بۇل تەك ساباقتاستىقتى ەمەس, قازىرگى وتاندىق مادەنيەتتىڭ دامۋىن دا قامتاماسىز ەتەدى», دەدى ا.قاپباروۆا.
