اۋىل شارۋاشىلىعى ساناعىنا كىمدەر قاتىسۋى كەرەك

وسى ۋاقىت ارالىعىندا بارلىق قاتىسۋشى sanaq.gov.kz سايتىندا ونلاين فورماتتا ساناقتان وتە الادى. سايتتا اۋىل شارۋاشىلىعى وندىرۋشىلەرى مەن ءۇي شارۋاشىلىقتارىنا ارنالعان ەكى ءتۇرلى ساۋالناما پاراعى بولادى.

ۇلتتىق ستاتيستيكا بيۋروسىنىڭ مالىمەتىنشە, وسىمدىك شارۋاشىلىعى, مال شارۋاشىلىعى نەمەسە بالىق شارۋاشىلىعىمەن اينالىساتىن زاڭدى تۇلعالار, جەكە كاسىپكەرلەر مەن شارۋا (فەرمەر) قوجالىقتارى 2-اشك/شفق ساناق پاراعىن تولتىرۋى ءتيىس. بۇل ساۋالنامادا توعىز بولىمنەن تۇراتىن 29 سۇراق قامتىلعان. وندا جەر ۋچاسكەلەرىنىڭ كولەمى, ولاردىڭ قالاي پايدالانىلىپ جاتقانى, سۋارۋ تاسىلدەرى, جەردىڭ مەنشىككە نەمەسە جالعا الىنعانى تۋرالى مالىمەتتەر كورسەتىلۋى كەرەك.
سونداي-اق ساۋالنامادا شارۋاشىلىقتاعى مال, قۇس, بالىق سانى, قولدانىلاتىن تەحنيكا, قۇرال-جابدىقتار, قويمالار, ساقتاۋ ورىندارى مەن باسقا دا قاجەتتى نىساندار تۋرالى اقپارات سۇرالادى. قاتىسۋشىلار تىڭايتقىشتاردى, وسىمدىكتەردى قورعاۋ قۇرالدارىن قولدانۋ, ورگانيكالىق ءونىم ءوندىرۋ, اۋىل شارۋاشىلىعى ونىمدەرىن وتكىزۋ, سونداي-اق جۇمىسشىلاردىڭ سانى مەن ولاردىڭ سيپاتتاماسى جونىندە دە مالىمەت بەرەدى.

باقشا ەگەتىن نەمەسە مال مەن قۇس ۇستايتىن ءۇي شارۋاشىلىقتارى دا ساناققا قاتىسادى. ولار ءۇشىن 3-جقش ساۋالناما پاراعى قاراستىرىلعان. بۇل ساۋالنامادا قانداي داقىلدار وسىرىلەتىنى, قانشا مال مەن قۇس ۇستايتىنى, جايىلىمداردى قولداناتىنى, مال ۇستاۋعا ارنالعان قۇرىلىستاردىڭ بار-جوعى, سونداي-اق ءونىمنىڭ ساتىلاتىنى نەمەسە جەكە تۇتىنۋعا پايدالانىلاتىنى تۋرالى مالىمەت بەرىلەدى. ءۇي شارۋاشىلىقتارىنا ارنالعان ساۋالناما 8 بولىمنەن جانە 22 سۇراقتان تۇرادى.

بيۋرو بارلىق ۇسىنىلاتىن اقپاراتتىڭ قۇپيالىلىعىن ساقتاپ, دەرەكتەر «مەملەكەتتىك ستاتيستيكا تۋرالى» زاڭىمەن قورعالاتىنىن جانە سالىق نەمەسە باسقا مەملەكەتتىك ورگاندارعا بەرىلمەيتىنىن مالىمدەدى.

ساناق اياسىندا ەلىمىز بويىنشا شامامەن 300 مىڭ اۋىل شارۋاشىلىعى ۇيىمىن جانە 2 ملن ءۇي شارۋاشىلىعىن قامتۋ جوسپارلانعان. 

ءبىرىنشى كەزەڭنەن كەيىن ساۋالنامانى تولتىرماعانداردىڭ ءتىزىمىن جاساۋ ءۇشىن 20 كۇن ىشىندە مالىمەتتەر وڭدەلەدى.
20 قىركۇيەكتەن 20 قازان 30 كۇن ارالىعىندا, ساناق قىزمەتكەرلەرى جەكە اڭگىمەلەسۋ ءادىسى جانە پلانشەتتەردى قولدانۋ ارقىلى ساناق جۇرگىزەدى. 

ايتا كەتەيىك, بۇعان دەيىن ەلىمىزدە اۋىل شارۋاشىلىعى ساناعى 2006-2007 جىلدارى وتكەن بولاتىن.