قازاق تانكيستەرى «تانك بياتلونى» جارىسىنىڭ باستاپقى كەزەڭىن ءساتتى اياقتادى. جالپى ۇزىندىعى 21 شاقىرىمدى قۇرايتىن ءۇش اينالىمدى 26 مينۋت 7 سەكۋندتا ءجۇرىپ وتكەن ولار 13 ەلدىڭ تانكيستەرىنىڭ الدىنا شىقتى. وسىلايشا, قازاقستاندىقتار جەكە جارىستا ەڭ ۇزدىك ناتيجەگە قول جەتكىزدى.
ەرەكشە اتاپ وتەرلىگى, ءبىرىنشى قازاقستاندىق تانك ەكيپاجىن قۇرامىندا باعىتتاۋشى-وپەراتور سەرجانت ەراسىل جۇماعۇلوۆ پەن مەحانيك سەرجانت دۋمان بايجانوۆ بار لەيتەنانت اسىلبەك مۇسىرمانقۇلوۆ باسقاردى. ارينە, مۇنداي ناتيجەگە قول جەتكىزۋ, قاتىسۋشى ەلدەر تانكيستەرىن ارتتا قالدىرۋ ەكيپاج مۇشەلەرىنىڭ اسكەري مىندەتتى مۇلتىكسىز ورىنداۋعا دەگەن جاۋاپكەرشىلىگىندە جانە ارقايسىسىنىڭ ءوز ىسىنە بەرىلگەندىگىندە جاتىر. «ءبىزدىڭ ەكيپاج قوزعالعاننان باستاپ, ارا قاشىقتىقتى باعىندىرۋدا ەركىن بولدى. ءبىز جارىس بارىسىندا سابىرلىلىق ساقتادىق جانە دە بار كۇش-جىگەرىمىزدى جۇمىلدىرا بىلدىك. ارقايسىمىز ءوز مىندەتىمىزدى جاقسى ءتۇسىنىپ, نە ىستەۋ كەرەكتىگىن بىلدىك جانە سول مىندەتتەرىمىزدى مۇلتىكسىز ورىنداپ شىقتىق», – دەدى ەكيپاج كومانديرى اسىلبەك مۇسىرمانقۇلوۆ. قازاقستاندىق تانكيستەردىڭ قول جەتكىزگەن جەتىستىكتەرى «تانك بياتلونى» جارىسىنىڭ كەلەسى كەزەڭىندە دە جالعاسىن تابادى دەگەنگە سەنىم مول. دەيتۇرعانمەن, مەجەگە جەتۋ جولىندا سىناقتىڭ كۇردەلى ەكەندىگىن دە قاپەردەن شىعارماعان ءجون. «ەگەمەن-اقپارات».
