فوتو: اشىق دەرەككوز
اتالعان كلينيكا ءداستۇرلى قىتاي جانە باتىس مەديتسيناسىن بىرىكتىرەتىن اۋرۋحانانىڭ بازاسىندا اشىلىپ, امبۋلاتوريالىق قىزمەتتى ەكى اي بۇرىن باستاعان. ول جۇمىسقا بارۋ قاجەتتىلىگى ادامدارعا اۋىر پسيحولوگيالىق جۇكتەمە تۋدىرعاندا كومەك كورسەتۋدى ماقسات ەتەدى.
كلينيكا باسشىسى يۋە ءليميننىڭ ايتۋىنشا, بۇل باستاما اتا-انالار تاراپىنان تۇسكەن سۇراقتان كەيىن پايدا بولعان.
«بۇرىن بالالارىن «مەكتەپكە بارعىسى كەلمەيدى» دەپ اكەلگەن اتا-انالار اراسىندا «ەرەسەكتەرگە ارنالعان, جۇمىسقا بارعىسى كەلمەيتىندەر ءۇشىن دە كلينيكا بار ما؟» دەپ سۇراعاندار بولدى», دەيدى ول.
كلينيكا شارشاۋ, كۇيزەلىس, ەموتسيونالدى تۇراقسىزدىق, جۇمىستىڭ مانسىزدىگى سياقتى پروبلەمالارعا تاپ بولعان ادامدارعا كومەك بەرۋدى كوزدەيدى.
يۋە ءليميننىڭ ايتۋىنشا, بۇل سيمپتومداردىڭ ءتۇپ-توركىنى كوبىنە تەرەڭ پسيحولوگيالىق نەمەسە الەۋمەتتىك سەبەپتەرگە بايلانىستى بولادى. ناۋقاستىڭ جاعدايىن ستيگما تۋدىرماي جەتكىزۋ ءۇشىن مەكەمەنىڭ اتاۋى دا بەيتاراپ ەتىپ قويىلعان.
دياگنوستيكا پروتسەسى ناۋقاستىڭ ەموتسيونالدى جاعدايىن باعالاۋدان باستالادى. سونىمەن قاتار گيپەرتيرەوز سياقتى ورگانيكالىق اۋرۋلارمەن بايلانىستى بەلگىلەردى جوققا شىعارۋ ءۇشىن مەديتسينالىق تەكسەرۋ دە جۇرگىزىلەدى. كەيىن ءار ادامعا جەكە ەمدەۋ جوسپارى ازىرلەنەدى.
يۋە ءليميننىڭ ايتۋىنشا, ازىرگە كلينيكاعا كەلۋشىلەر سانى كوپ ەمەس. دەگەنمەن بۇل باستاما قىتايداعى الەۋمەتتىك جەلىلەردە كەڭىنەن تالقىلانىپ جاتىر. كوپتەگەن قولدانۋشىلار بۇل جاڭالىقتى ءازىل-سىقاقپەن قابىلداعان.
«مۇنداي كلينيكانى ويلاپ تاپقان ادام – ناعىز دانىشپان! بىراق كلينيكادا دارىگەر جوق, ويتكەنى ولار دا جۇمىسقا بارعىسى كەلمەيدى», دەگەن سياقتى پىكىرلەر جەلىدە تاراپ جاتىر.
