باستىسى – دۇرىس كاسىبي باعدار
سەنبى كۇنى وبلىس ورتالىعىنداعى گاگارين اتىنداعى ساياباق مەتاللۋرگتەر الاڭىنا اينالعانداي بولدى. «ZAVOD FEST» فەستيۆالىنىڭ پاۆلودار وبلىسىندا ءوتۋى تەگىن ەمەس. «ERG» قۇرامىنا ەنەتىن 60 مىڭ ادامنىڭ
8 مىڭنان استامى ءدال وسى وڭىردەگى ءوندىرىس ورىندارىندا ەڭبەك ەتەدى. كومپانيا ساپىنداعى نەگىزگى كاسىپورىندار دا پاۆلودار وبلىسىندا ورنالاسقان. سول سەبەپتى ءبىرىنشى كەڭ اۋقىمدى فەستيۆال مەتاللۋرگتەر مەن قالا كۇنى اياسىندا پاۆلوداردا ۇيىمداستىرىلدى.
بۇل كۇنى كوپشىلىك ءجيى جينالاتىن ورىن جۇرتشىلىقتى زاۋىت جۇمىسىنىڭ اسەرىنە بولەدى. مۇندا ءتۇرلى الاڭدار ۇيىمداستىرىلىپ, ساياباق ءىشى ەرەكشە بەزەندىرىلىپ, ينتەراكتيۆتى باستامالار ۇيىمداستىرىلدى. بالالار ويىن الاڭىندا اسىر سالسا, وقۋشىلار مەتاللۋرگيا سالاسىنىڭ قىر-سىرىنا قانىقتى. ال كەيبىرى, ءتىپتى, بوس جۇمىس ورىندارى جايلى ءبىلىپ, بولاشاعىن كاسىپورىن جۇمىسىمەن بايلانىستىرۋعا بەل بۋىپ جاتتى. سونداي قىزىقتى الاڭداردىڭ ءبىرى كاسىبي باعدارعا ارنالدى. «ERG» كومپانياسىنىڭ الەۋمەتتىك جوبالار جونىندەگى مەنەدجەرى ولجاس مامىرباەۆ مەتاللۋرگيا سالاسىنداعى ىرگەلى ءوندىرىس ورىندارىنىڭ جاستارعا بەرىپ وتىرعان مۇمكىندىگىنە ايرىقشا توقتالدى. شىنىمەن, كومپانيا باسشىلىعى وسى سالانى جۇرەكپەن قالاپ, ماماندىقتى مەڭگەرۋگە تالپىنىپ, ەڭبەك ەتۋگە قۇلشىنىس تانىتاتىن ستۋدەنتتەرگە اۋىز تولتىرىپ ايتارلىقتاي قولداۋ كورسەتەدى. سولاردىڭ ءبىرى – ەلىمىزدەگى 23 كوللەدج بەن ءۇش جوعارى وقۋ ورنىن بىرىكتىرەتىن اليانس جۇمىسى. اليانس قۇرامىندا پاۆلودار وبلىسىنىڭ 1 ۋنيۆەرسيتەتى مەن 10 كوللەدجى دە بار.
«جاسىراتىنى جوق, بۇگىندە تۇلەكتەردىڭ 70 پايىزى اتا-اناسىنىڭ ءجون سىلتەۋىمەن ماماندىق تاڭدايدى. ال اتا-انالاردىڭ باسىم بولىگى بالالارىنىڭ شاحتەر, مەتاللۋرگ, دانەكەرلەۋشى سىندى اۋىرتپاشىلىعى مول جۇمىستى ەمەس, كەڭسەدە وتىراتىن جەڭىل قىزمەتتى اتقارعانىن قالايدى. كوپتەگەن جاس SMM مامانى, موبيلوگراف سىندى باعىتتار ارقىلى تابىس تاپقاندى قۇپ كورەدى. بىراق ءبىز مەتاللۋرگيا سالاسىندا دا ماڭىزدى ءارى جاۋاپكەرشىلىگى زور, الەۋمەتتىك ليفت قاراستىرىلعان, كاسىبي مانساپ جولىن قۇرۋعا بولاتىن ماماندىقتاردىڭ بارىن كورسەتكىمىز كەلەدى. قازىر ءبىزدىڭ زاۋىتتاردا دا جاڭا تەحنولوگيالار ەنگىزىلىپ, 200-دەن استام ۇدەرىس تسيفرلاندىرىلدى. وسىنداي يگى ىستەردى, جاڭاشىلدىقتاردى كورسەتىپ, تۇلەكتەردىڭ باعىت تاڭداۋىنا جول كورسەتۋدى قالايمىز», دەيدى ولجاس مامىرباەۆ.
بۇل رەتتە ستۋدەنتتەردىڭ قىزىعۋشىلىعىن ارتتىرىپ, بىلىكتىلىگىن جەتىلدىرە ءتۇسۋ ءۇشىن «WorldSkills» حالىقارالىق سايىسىنىڭ نەگىزىندە «ERGSkills» كاسىبي شەبەرلىك بايقاۋى ۇيىمداستىرىلىپ كەلەدى. ءبىرىنشى جىلى بۇل بايقاۋعا 30 ستۋدەنت قاتىسسا, بيىلعى ىرىكتەۋ كەزەڭىندە 12 قۇزىرەتتىلىك ءتۇرى بويىنشا 202 ستۋدەنت باق سىنادى. مۇنىڭ ءوزى ماماندىققا دەگەن قىزىعۋشىلىقتىڭ كورسەتكىشى بولسا كەرەك.
«بايقاۋ جەڭىمپازدارى شەتەلگە بارىپ, حالىقارالىق تاعىلىمدامادان وتەدى. بىلتىر وسىنداي ەكى اپتالىق تاعىلىمداما اياسىندا جاستار قىتايعا اتتانىپ, ءبىلىمىن تولىقتىرۋ مۇمكىندىگىنە يە بولدى. ءتىپتى سونىڭ قورىتىندىسى بويىنشا قىتايلىق ستۋدەنتتەرمەن وتكەن جارىس ناتيجەسىندە مىقتىلىعىن كورسەتتى. ايتالىق, دانەكەرلەۋ تەحنولوگياسى بويىنشا باق سىناعان رايحان ناركەنوۆا وتانداستارىن دا, شەتەلدىك قاتارلاستارىن دا قاپى قالدىردى. جاستاردىڭ وسىنداي جەتىستىكتەرىن كورىپ ءبىز دە قۋانامىز», دەيدى ول.
اتاپ وتەرلىگى, اليانس قۇرىلعان تۇستا «ERG» كومپانياسىنا جوعارى وقۋ ورىندارى مەن كوللەدجدەردىڭ 515 تۇلەگى جۇمىسقا ورنالاسقان ەدى. 2023 جىلى كومپانيالار توبى بىردەن 656 تۇلەكتى جۇمىسقا قابىلدادى. بىلتىر 737 جاس العاشقى ەڭبەك جولىن «ERG» كومپانيالار قۇرامىنا كىرەتىن كاسىپورىنداردا باستادى.
بىلىكتى كادرلار تۋرالى ءسوز قوزعالعاندا پاۆلودار قالاسىنداعى جوعارى ءتۇستى مەتاللۋرگيا كوللەدجىن اتاپ وتپەسكە بولماس. 1968 جىلى پاۆلودار اليۋميني زاۋىتىنا كەرەك مامانداردى دايارلاۋ ۇستاحاناسى رەتىندە اشىلعان ءبىلىم ورداسى بۇگىنگى كۇنگە دەيىن وسى مىندەتتى تولىعىمەن اتقارىپ كەلەدى. وقۋ ورنى العاشقى تۇلەكتەرىنىڭ قولىنا ديپلوم ۇستاتقان ساتتەن قازىرگە دەيىن 15 مىڭنان استام جاس «ERG» كومپانياسىنا كىرەتىن كاسىپورىندارعا جۇمىسقا ورنالاسۋ ارقىلى ۇلكەن ومىرگە قادام باستى. سول تۇستاعى تۇلەكتەر بۇگىندە باسشىلىق قىزمەتتەردى اتقارىپ, تۇتاس ءوندىرىس ىسىنە جەتەكشىلىك ەتسە, قازىرگى جاستار اليۋميني كلاستەرىنىڭ ىشكى جۇمىسىنا ەتەنە ارالاسۋدا.
كوللەدج ديرەكتورىنىڭ مىندەتىن اتقارۋشى ازامات مۇسكەنوۆتىڭ ايتۋىنشا, بۇگىندە ستۋدەنتتەرگە دۋالدى جۇيە بويىنشا ءبىلىم الۋعا بارلىق مۇمكىندىك بار. سونىڭ ناتيجەسىندە جاستار ءبىلىم الا ءجۇرىپ, جۇمىس ىستەي الادى.
ء«بىزدىڭ كوللەدج اليۋميني كلاستەرى ماماندارىنىڭ ۇستاحاناسى اتاۋىن لايىقتى جالعاستىرىپ كەلەدى. قازىر ستۋدەنتتەردى جەتى ماماندىق بويىنشا وقىتىپ, ولاردىڭ مەتاللۋرگيا سالاسىنىڭ مىقتى مامانى بولۋى ءۇشىن بارىمىزدى سالىپ كەلەمىز. وسى ورايدا الەۋمەتتىك سەرىكتەس – «ERG» كومپانيالار توبىنىڭ ءرولىن ەرەكشە اتاپ ءوتۋ كەرەك. دۋالدى وقىتۋ جۇيەسى اياسىندا ءبىزدىڭ ستۋدەنتتەر ءبىر كۇن وقۋ ورنىندا تەوريالىق ءبىلىم السا, قالعان ءتورت كۇندە قايناپ تۇرعان ءوندىرىس ورنىندا ەڭبەك ەتەدى. سول ارقىلى تەوريا مەن تاجىريبەنى ۇشتاستىرادى. باستىسى, كامەلەتتىك جاسقا تولعان ستۋدەنتتەردىڭ كومپانيانىڭ تولىققاندى قىزمەتكەرى اتانۋىنا مۇمكىندىك بار. مۇنداي جاعدايدا تاجىريبەدەن وتكەن كەزدەگىدەي 85 مىڭ تەڭگە ەمەس, ناعىز مامان رەتىندە 250 مىڭ تەڭگەدەن استام ايلىق الادى. ەڭبەككە دەگەن قۇلشىنىسىمەن ەرەكشە كوزگە تۇسكەن دانەكەرلەۋشى, توكار كەي ستۋدەنتتەرىمىزدىڭ جالاقىسى 400 مىڭ تەڭگەگە دەيىن جەتەدى», دەيدى ازامات مۇسكەنوۆ.
كوللەدج ستۋدەنتتەرىنىڭ ورتاشا ەسەپپەن العاندا 30 پايىزى جىل سايىن كومپانيا قاتارىنداعى كاسىپورىندارعا جۇمىسقا ورنالاسادى. ولاردىڭ قاتارىندا پاۆلودار اليۋميني زاۋىتى, قازاقستان ەلەكتروليز زاۋىتى بار. تاياۋدا اقسۋ فەرروقورىتپا زاۋىتىنان دا تاپسىرىس تۇسكەن كورىنەدى. جالپى, وتكەن جىلى وقۋ ورنىن 149 ادام اياقتاپ, ونىڭ ىشىندە 55 جاس كاسىپورىنداردا ەڭبەك جولىن باستادى. بيىل كوللەدجدى 191 تۇلەك ءتامامداپ, ونىڭ 70-ءى «ERG» قىزمەتكەرى اتاندى.
اتقارىلعان ءىس اۋقىمدى
ءتۇرلى قيىندىققا قاراماستان, پاۆلودار وڭىرىندەگى مەتاللۋرگيا سالاسى كەيىنگى ەكى جىلدا وڭ كورسەتكىشتەرگە قول جەتكىزىپ, وندىرىستەگى ءىستى ءبىرشاما ىلگەرىلەتتى. كەيىنگى ۋاقىتتاعى سانكتسيالىق شەكتەۋلەردىڭ سالقىنى «ERG» كومپانيالار توبىنا تيسە دە, كومپانيا تاراپىنان ماڭىزدى ءارى ءىرى جوبالاردى قارجىلاندىرۋ, شيكىزاتتى وڭدەپ, دايىن ءونىم الۋ ءىسى ءبىر ساتكە دە ۇزىلگەن جوق. كەرىسىنشە, قيىندىقتار قايرادى, شارۋانى شيراتتى. سونىڭ ناتيجەسىندە اۋىز تولتىرىپ ايتارلىقتاي بەلەستەردى باعىندىردى. ماسەلەن, «قازاقستان ءاليۋمينيى» اق باس ديرەكتورى ۆلاديمير كراسنويارسكي كاسىپورىنداردىڭ بارلىعى ءونىمنىڭ وزىندىك قۇنىن ازايتقانىن ايتتى. بۇل – تۇراقتى جۇمىستىڭ ارقاسىندا قول جەتكەن كورسەتكىش. سونىمەن قاتار دايىن ءونىم كولەمى ايتارلىقتاي ارتتى. سالىستىرىپ قارار بولساق, 2022 جىلى پاۆلودار اليۋميني زاۋىتى 1 ملن 380 مىڭ توننا ءونىمدى نارىققا شىعارعان ەدى. بيىل 1 ملن 540 مىڭ توننا ءوندىردى. مۇنىمەن شەكتەلىپ قالماي, تىڭ وندىرىستەردى دە قولعا الىپ جاتىر.
«مەملەكەت باسشىسى قاسىم-جومارت توقاەۆ سيرەك كەزدەسەتىن مەتاللداردى يگەرۋگە قاتىستى ناقتى تاپسىرما بەرگەن بولاتىن. ءبىزدىڭ كومپانيانىڭ ءىرى جوبالارىنىڭ ءبىرى ءدال وسى باعىتتا ءوربيدى. پاۆلودارلىق اليۋميني زاۋىتى كەلەسى جىلى جاڭا ءونىم – كالي ءوندىرىسىن قولعا الماق. قازىر ءتيىستى قۇرىلىس جۇمىستارى جۇرگىزىلىپ جاتىر. ءيا, بۇل مەتالل ءتۇرى بۇعان دەيىن دە شىعارىلدى, بىراق ونىڭ تەحنولوگياسى مۇلدە باسقا ەدى. جاڭا جوبا شىعارىندىلاردى دا, شىعىندى دا, ەكولوگيالىق جۇكتەمەنى دە ازايتۋدى كوزدەيدى. بۇرىنعى تەحنولوگيا قىمبات ءارى قاۋىپتى بولاتىن. ەندى ونىڭ ورنىن تىڭ تاسىلمەن جۇمىس ىستەيتىن جاڭا ءوندىرىس الماستىرادى», دەدى ۆلاديمير كراسنويارسكي.
كاسىپورىندا ودان باسقا دا ءىرى جوبالار جۇزەگە اسۋدا. ايتالىق, قويۋلاتۋ جۇيەسى, قىزىل مەتاللدى جۋ ۇردىسىنە قاتىستى جوبالار ازىرلەنۋدە. سول سياقتى بۇرىنعى بەس پەشتىڭ ورنىنا جاڭا ەكى پەش سالۋ ويدا بار. ول جۇمىستى ەداۋىر جەڭىلدەتپەك. ال ەسكى پەشتەر باسقا ماقساتتا پايدالانىلادى. وسىنداي ىرگەلى ىستەردى ىلگەرىلەتۋدە الەمدىك تاجىريبە, شەتەلدىك مامانداردىڭ كۇشى كومەككە كەلەدى. اليۋميني زاۋىتىنداعى مامانداردىڭ وزدەرى دە مىقتى. كاسىپورىن باسشىسى مۇنداعى جۇمىسشىلاردىڭ كەز كەلگەن تىڭ ىسكە ازىرلىگىن, كوزقاراستارى مەن ادىستەرىنىڭ جاڭاشىلدىعىن ەرەكشە اتاپ ءوتتى. جالپى, كاسىپورىندا 8 مىڭنان استام ادام تىنباي ەڭبەك ەتىپ كەلەدى. سونداي بىلىكتى قىزمەتكەرلەردىڭ ءبىرى – جوندەۋ تسەحىنىڭ مامانى تالعات جانتاەۆ. 2020 جىلى اليۋميني زاۋىتىنداعى جۇمىسىن باستاعان ول بەس جىل ارالىعىندا ءونىمدى ەڭبەك ەتىپ, تاياۋدا عانا قۇرمەت تاقتاسىنا ەسىمى جازىلىپ, سۋرەتى ءىلىندى.
«باستاپقىدا زاۋىتقا ەلەكتر-گاز دانەكەرلەۋشى بولىپ جۇمىسقا ورنالاستىم. بۇل كاسىپورىندا ەڭبەك ەتۋگە اعام كەڭەس بەردى. تۇراقتىلىق, قىزمەتتىك ءوسۋ, الەۋمەتتىك قولداۋ – بارلىعى اتالعان زاۋىتتا بارىن ايتتى. شىنىمەن, كاسىپورىن تاراپىنان ەڭبەك ەتۋگە نيەتتى ازاماتتارعا بارلىق جاعداي جاسالعان. ءبىزدىڭ تسەحتىڭ مىندەتى – قانداي دا ءبىر قوندىرعى ىستەن شىعا قالعان جاعدايدا ۋاقىت وزدىرماي جوندەپ, قالپىنا كەلتىرۋ. سەبەبى كاسىپورىنداعى ءوندىرىس ۇزدىكسىز جۇرەدى. ونىڭ ىركىلمەي جۇمىس ىستەۋى ءبىزدىڭ تسەح ماماندارىنا تىكەلەي بايلانىستى. جۇكتەلگەن مىندەتتى ساپالى اتقارۋعا تىرىسامىز. بۇل باعىتتاعى جۇمىسىم ەلەنىپ, تاياۋدا شەبەر مەحانيك اتاندىم. نەگىزگى جۇمىسپەن قاتار, قوعامدىق ىستەرگە دە ارالاسامىز. كادرلىق رەزەرۆ وكىلىمىن. الداعى ۋاقىتتا قىزمەتىمدى ابىرويمەن اتقارىپ, ارىپتەستەر مەن باسشىلىق سەنىمىن اقتاپ, كاسىپورىن ءىسىنىڭ وركەندەۋىنە ۇلەسىمدى قوسسام دەيمىن», دەدى ول.
سونداي-اق كومپانيا جۇمىسشىلارعا جايلى جاعداي جاساۋدى الدىڭعى قاتارعا قوياتىنىن تىلگە تيەك ەتتى. جالاقىنى تۇراقتى ارتتىرۋ, دەمالىس ايماقتارىنا جولداما بەرۋ, ۇزدىك قىزمەتكەرلەرگە كولىك پەن پاتەر كىلتىن تابىستاۋ سىندى يگى ءداستۇر قىزمەتكەرلەردى ىنتالاندىراتىنىنا ايرىقشا ءمان بەردى. ايتا كەتەيىك, بۇگىندە «ERG» كومپانيالارىندا 60 مىڭنان استام ادام ەڭبەك ەتەدى. ونىڭ قاتارىندا 45 مىڭ قىزمەتكەر – جۇمىسشى ماماندىقتار وكىلى. ونىڭ ۇشتەن ءبىر بولىگى – مەتاللۋرگتەر.
پايدالى ءارى قىزىقتى دۋمان
ەندى فەستيۆالدىڭ وزىنە ويىسساق. جوعارىدا اتاپ وتكەنىمىزدەي, كەڭ اۋقىمدى ءىس-شارا قالا تۇرعىندارى مەن قوناقتارىن ءبىر ارناعا توعىستىردى. ولاردىڭ جاس ەرەكشەلىكتەرىنە, قىزىعۋشىلىقتارىنا قاراي بىرنەشە ايماق ۇيىمداستىرىلدى. بالالار مەن ەرەسەكتەر ءتۇرلى ويىندار, كۆەستتەردە بوي سەرگىتىپ دەمالسا, ەندى ءبىرى ءبىلىم الۋ مەن جۇمىسقا ورنالاسۋدىڭ ءتيىمدى تەتىكتەرىن ءبىلدى. جالپى, ءارتۇرلى باعىتقا قاراي ءتورت بىردەي تسەح قاراستىرىلدى. مادەني ايماقتا كەلۋشىلەر ونەرلەرىن ورتاعا سالسا, مانساپتىق تسەحتا بولاشاققا باعدار قۇردى. جاستار كونتەنت جاسايتىن ورتادا الەۋمەتتىك جەلى ءۇشىن ءتۇرلى فوتو, بەينەماتەريالدار جاسادى. ال ويىن ايماعىندا ءار ادام ءوزىن ناعىز مەتاللۋرگ سەزىنىپ كوردى.
فەستيۆالعا «ERG» كورپوراتيۆتىك ۋنيۆەرسيتەتىنىڭ ماماندارى دا قاتىستى. ولار تاۋ-كەن ءىسى مەن قۇرال-جابدىقتى جوندەۋ بويىنشا وزدەرىنىڭ VR-كۋرستارىن تانىستىردى. تالاپكەرلەر مەن ستۋدەنتتەر, جاسوسپىرىمدەر مەن كىشكەنتاي بالالار, الۋان ءتۇرلى مەيماننىڭ ارقايسىسىنا ارنالعان جەكە ايماقتار ويلاستىرىلعان. اركىم كوڭىل قالاۋىنا قاراي, ۇناتقانىنا قاتىسا الدى. بۇلدىرشىندەر جۇمىسشى ماماندىقتارىن «ماماندىقتار قالاسىنداعى» ويىن فورماتى ارقىلى تانىسا, جاسوسپىرىمدەر ارنايى فوتوايماقتاردا وزدەرى كونتەنت جاساپ, قىزمەتتىڭ قىر-سىرىن ءبىلدى. مەيماندارعا ءدامدى تاعامنىڭ ءتۇر-ءتۇرى ۇسىنىلدى.
«وسى ساياباققا بالالار, نەمەرەلەرىممەن ءجيى كەلەمىز. بۇگىن وسىنداي كەرەمەت فەستيۆالدىڭ كۋاگەرى بولعانىما قۋانىشتىمىن. پاۆلودار وبلىسى تۇرعىنىنىڭ ارقايسىسىنىڭ كەمىندە ەكى-ءۇش مەتاللۋرگ تۋىسى, تانىسى بار دەپ ويلايمىن. ءبىزدىڭ اۋلەتتە دە وسى سالا وكىلدەرى بار. ولار ءوندىرىس ورىندارىندا جاۋاپتى دا ماڭىزدى قىزمەتتەردى اتقارىپ ءجۇر. بۇگىنگى ساياباقتاعى كەرەمەت اتموسفەرا ارقىلى ولاردىڭ جۇمىسىنا تەرەڭنەن ۇڭىلگەندەي اسەر الدىق. ناعىز پايدالى ءارى قىزىقتى دۋمان بولدى», دەيدى پاۆلودار قالاسىنىڭ تۇرعىنى زەينەپ راحمەتوۆا.
پاۆلودارلىق وقۋشى ءالينۇر مۇرات كەلەسى جىلى مەتاللۋرگيا كوللەدجىنە وقۋعا تۇسسەم دەگەن نيەتىن جەتكىزدى.
«مەن بيىل 8-سىنىپتى ءتامامدادىم. بۇگىنگى فەستيۆال بارىسىندا جوعارى ءتۇستى مەتاللۋرگيا كوللەدجى ستۋدەنتتەرىنە قاراستىرىلعان مول مۇمكىندىك تۋرالى ءبىلىپ, كەلەسى جىلى وسى وقۋ ورنىندا ءبىلىم السام دەگەن وي تۋىندادى. مۇندا تۇراقتى شاكىرتاقى, جاقسى جالاقى الۋعا بولادى ەكەن. باستىسى, ديپلوم العان سوڭ جۇمىسقا ورنالاسۋ مۇمكىندىگى دە بار. اليۋميني كلاسستەرى ستۋدەنتتەرگە قىزمەت ورنىن ۇسىنادى. وسىنداي وڭتايلى جايتتى قالت جىبەرۋگە بولمايدى دەپ ويلايمىن», دەگەن پىكىرىمەن ءبولىستى ول.
«ERG»-ءدىڭ ەلىمىزدەگى باس ديرەكتورىنىڭ پەرسونال جانە مادەنيەت جونىندەگى ورىنباسارى اناستاسيا كرۋچ كومپانياعا ءوندىرىستىڭ وزەگى سانالاتىن جۇمىسشى ماماندار كەرەك ەكەنىن العا تارتتى. كەڭ اۋقىمدى فەستيۆالدى وتكىزۋدىڭ تۇپكى ماقساتى دا وسى ەدى.
«ZAVOD FEST» فەستيۆالىندە ءوز ىسىنە جان-تانىمەن بەرىلگەن, ونى دامىتۋدى ويلاعان ءار ادامنىڭ تابىسقا جەتەتىنىن كورسەتۋگە تىرىستىق. زاماناۋي ءوندىرىس – تىڭ تەحنولوگيالار, ءوز ماقساتىڭا جەتىپ, ءوزىڭدى دامىتۋ مۇمكىندىكتەرى. قازىرگى زامانعى جۇمىسشى ۇنەمى جاڭا داعدىلاردى مەڭگەرىپ, جاڭا تەحنولوگيالاردى يگەرەتىن, ءوندىرىستى جەتىلدىرۋگە قاتىستى ۇسىنىستار ايتاتىن, وپەراتسيوندىق تيىمدىلىك قۇرالدارىن بەس ساۋساعىنداي بىلەتىن, ەڭ باستىسى – قاۋىپسىز ەڭبەك ەتۋ تالاپتارىن مۇقيات ساقتايتىن بىلىكتى مامان. ءبىز جۇمىس بەرۋشى رەتىندە ءاردايىم قاسىڭىزدا بولىپ, ءسىزدىڭ ءوسىپ-ورلەۋىڭىزگە سەپتەسۋگە دايىنبىز. ءوندىرىستى ترانسفورماتسيالاپ, بولاشاقتىڭ داعدىلارىن دامىتساق دەيمىز», دەدى اناستاسيا كرۋچ.
وتاندىق تانىمال ەسترادا وكىلدەرى – نۇرلان ابدۋللين, «DEQUINE», «DOSE», «ERG» كومپانياسىنىڭ تالانتتى قىزمەتكەرلەرى ونەر كورسەتىپ, فەستيۆالدىڭ ادەمى نۇكتەسىن قويدى. ساياباققا جينالعان جۇرتشىلىق پايدالى اقپارات, قىزىقتى ويىندار, ماماندىق الاڭى مەن تاماشا كونتسەرت ۇيىمداستىرىلعان كەشتەن قيماي-قيماي تارقاستى.
