ۇلت رۋحانياتىنىڭ كورنەكتى تۇلعاسى, تۇركى دۇنيەسىنىڭ ماقتاۋلى پەرزەنتى, فيلولوگيا عىلىمدارىنىڭ دوكتورى, تاريح عىلىمدارىنىڭ كانديداتى, پروفەسسور, اتاتۇرىك اتىنداعى تۇرىك تاريح قۇرىمىنىڭ تولىق مۇشەسى قارجاۋباي سارتقوجا ۇلىنىڭ ءۇش بىردەي كىتابىنىڭ تۇساۋكەسەر ءراسىمى ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە ءوتتى.
كەلەلى كەڭەسكە ءماجىلىس دەپۋتاتتارى, بەلگىلى عالىمدار مەن قوعام قايراتكەرلەرى قاتىستى. العاشقى بولىپ ءسوز العان ۋنيۆەرسيتەت رەكتورى ەرلان سىدىقوۆ سۇبەلى ەڭبەكتەردىڭ عۇمىرى الدا ەكەنىن اتاپ ءوتتى.
«اعامىزدىڭ كول-كوسىر ەڭبەكتەرىن ۇرپاققا تۇسىندىرە بىلسەك, ەكىنشى شىعارماشىلىق عۇمىرى باياندى بولادى دەپ ويلايمىن. تاربيە, تاعىلىم, شەجىرەلى جولىن ءارى قاراي شاكىرتتەرى جالعاستىرا بەرسىن. ءسىز بەن ءبىز تۇرعاندا عالىمنىڭ اۋقىمدى مۇرالارى جاندانا بەرەرى انىق. سوندىقتان دا الدىمىزداعى كىتاپتاردىڭ تۇساۋىن كەسەيىك. اق جول بولسىن, كىتاپتىڭ وقىرماندارى كوپ بولسىن», دەدى ول.
قارجاۋباي سارتقوجا ۇلى – شىعارماشىلىق ومىرىندە قوعامدىق قىزمەتتەر اتقارا ءجۇرىپ, ادەبي تاقىرىپتارعا دا بەلسەنە قالام تارتقان قايراتكەر. تۇساۋى كەسىلگەن «قوش بول, اپا» كىتابىنا ءومىر مەن ءولىم, ساعىنىش پەن سىر, تۇرمىس پەن تاعدىر استاسقان ادەبي شىعارمالار ەنگىزىلگەن. ال «تاستان تامىر ىزدەگەن عۇلاما» كىتابىندا عالىمنىڭ عىلىمي-شىعارماشىلىق كەلبەتىن, تۇركى دۇنيەسىنە سىڭىرگەن ەڭبەگىن كەڭىنەن اشاتىن الەمدىك ءارى وتاندىق عالىمدار مەن قالامگەرلەردىڭ جۇرەكجاردى ماقالالارى, ەستەلىكتەرى مەن لەبىزدەرى توپتاستىرىلعان. ءۇشىنشى كىتاپ – «پودزەمنىي ماۆزولەي درەۆنەتيۋركسكوي ەپوحي شوروون بۋمباگار (مايحان ۋل) ۆ تسەنترالنوي مونگولي» اتتى مونوگرافيا.
ءىس-شارادا بەلگىلى عالىم, سەرىك نەگيموۆ قارجاۋباي سارتقوجا ۇلىنىڭ ەل رۋحانياتىنداعى ورنى تۋرالى ايتتى.
«ۇلت پاتريوتى, دالا قازاعى, تۇركىتانۋشى, جازۋشى قارجاۋباي سارتقوجا ۇلى كوگىلدىر ەكران الدىندا قيىن كۇندەردە «مەن ءتىلىم ءۇشىن ولەم!» دەپ كۇندەي كۇركىرەپ ايتقان ەدى. سول ءسوز حالىقتىڭ جۇرەگىندە جاتتالىپ قالدى. قارجەكەڭنىڭ ەڭبەگى – مەملەكەتىمىزدىڭ يگىلىگى, بايلىعى, داۋلەتى, ۇلتتىق تاريحي سانامىزدى جۇيەلەندىرەتىن عاجايىپ ءبىر قازىنا», دەدى پروفەسسور.
جيىندا ج.مالىبەك ۇلى, ب.اياعان, د.قامزابەك ۇلى, م.ابسەمەت, ت.سادىقوۆ, س.راحمەت ۇلى, ت.ب. زيالىلار عالىم مۇراسىنىڭ ءمان-ماڭىزى تۋرالى وي قوزعادى. شارانى عالىم, جازۋشى تۇرسىنحان زاكەن ۇلى جۇرگىزىپ وتىردى. ەڭ ءتالىمدى تۇسى, تۇساۋكەسەرگە ق.سارتقوجا ۇلىنىڭ عىلىمي اۋلەتى ءبىر كىسىدەي اتسالىستى.
