شۆەتسيادا قوعامدىق اشىقتىق اسا جوعارى باعالانادى. بۇل ەلدە تۇرعىندار مەن مەملەكەت اراسىنداعى سەنىم مىقتى. سول سەنىمنىڭ ارقاسىندا قوعامدا بارلىعى ءبىر-بىرىنە جاۋاپ بەرەدى. اسىرەسە مەملەكەتتىك قىزمەتكەرلەر مەن لاۋازىمدى تۇلعالار تابىسى مەن ءومىر سالتى بويىنشا باقىلاۋعا اشىق.
شۆەتسيادا ءاربىر ازامات سالىق قىزمەتىنە بارىپ نەمەسە ونلاين تۇردە باسقا ادامنىڭ سالىق دەكلاراتسياسىن سۇراۋعا قۇقىلى. ياعني, ءسىز باسقا ادامنىڭ جىلدىق تابىسىن, تولەنگەن سالىعىنىڭ مولشەرىن, كەيدە ءتىپتى مۇلكى تۋرالى اقپاراتتى دا بىلە الاسىز. بۇل جۇيە «قۇپيانى بۇزۋ» نەمەسە بىرەۋگە زيان كەلتىرۋ ءۇشىن ەمەس, قوعامداعى ادىلەتتىلىكتى ساقتاۋ ماقساتىندا ەنگىزىلگەن.
شۆەتسيادا بۇل ۇدەرىس جاسىرىن تۇردە جۇرگىزىلمەيدى. ەگەر ءسىز بىرەۋدىڭ تابىسى تۋرالى مالىمەت سۇراتساڭىز, سول ادامعا ارنايى حابارلاما جىبەرىلەدى. حابارلامادا ءسىزدىڭ اتىڭىز بەن قاي كۇنى سۇراتقانىڭىز جازىلادى. بۇل – بىرەۋدىڭ جەكە ومىرىنە رۇقساتسىز ارالاسۋعا جول بەرمەۋدىڭ تەتىگى. ياعني, سۇراۋعا بولادى, بىراق جاۋاپكەرشىلىكپەن عانا.
بۇل جۇيەنىڭ ماقساتى نە؟ شۆەتسيا بۇل اشىقتىقتى قىزعانىش تۋدىرۋ ءۇشىن ەمەس, الەۋمەتتىك ادىلەتتىلىك پەن سەنىمدى نىعايتۋ ءۇشىن قولدانىپ وتىر. ماقسات – ءار ازاماتتىڭ تابىسى مەن قىزمەتتىك لاۋازىمى سايكەس كەلە مە, جوق پا سونى باقىلاۋعا مۇمكىندىك بەرۋ. مىسالى, مەملەكەتتىك قىزمەتكەر ورتاشا جالاقى السا دا, بىرنەشە قىمبات ءۇيى مەن كولىگى بولسا, بۇل زاڭسىز تابىس نەمەسە جەمقورلىق كۇدىگىن تۋعىزۋى مۇمكىن. مۇنداي جاعدايلاردان قوعام اشىق باقىلاۋ ارقىلى قورعانا الادى.
ارينە, ءار ەلدىڭ مادەنيەتى مەن زاڭ جۇيەسى تۇرلىشە. بىراق شۆەتسيا ۇلگىسى باسقا ەلدەرگە دە وي سالارلىق تاجىريبە.
