قارجىلىق مونيتورينگ اگەنتتىگىنىڭ الماتى قالاسى بويىنشا دەپارتامەنتى جۇرگىزگەن تەرگەۋ بارىسىندا «Group of the Companies TDA» جاۋاپكەرشىلىگى شەكتەۋلى سەرىكتەستىگىنىڭ مەملەكەتتىك ۋاكىلەتتى ەكونوميكالىق وپەراتور مارتەبەسىنە يە بولا وتىرىپ, بۇل سەنىمدى تەرىس ماقساتتا پايدالانعانى انىقتالعان. كومپانيا قىتايدان 100-دەن استام كونتەينەردى كەدەندىك راسىمدەۋسىز, ياعني كونتراباندالىق جولمەن ەلىمىزگە ەنگىزگەن.
وسى قىلمىستىق تىزبەكتى شىن مانىندە جۇيەلى ۇيىمداستىرىلعان ەكونوميكالىق سحەما دەۋگە بولادى. سەبەبى, تەرگەۋ ناتيجەسىندە اتالعان كومپانيانىڭ باقىلاۋىنداعى ون شاقتى سەرىكتەستىك مەكەمە ارقىلى جالعان شوت-فاكتۋرالار جازىلىپ, مەملەكەتتىك بيۋدجەتكە سالىقتان جالتارۋ جولىمەن 10 ميلليارد تەڭگە كولەمىندە زالال كەلتىرىلگەنى دالەلدەنگەن.
مەملەكەتتىك مۇددە مەن ۇلتتىق ەكونوميكانىڭ نەگىزى سانالاتىن سالىق جۇيەسىنە جاسالعان مۇنداي شابۋىلدىڭ زاردابى ءبىر عانا ستاتيستيكالىق كورسەتكىشپەن شەكتەلمەيدى. بۇل — ءادىل باسەكەلەستىككە, كاسىپكەرلىك ورتاعا, ءتىپتى تۇتىنۋشىلاردىڭ قاۋىپسىزدىگىنە دە تىكەلەي نۇقسان كەلتىرەتىن ارەكەت.
سوتقا دەيىنگى تەرگەۋ امالدارى بارىسىندا 643 ميلليون تەڭگە ءوندىرىلىپ, ايىپتىلاردىڭ 1,3 ميلليارد تەڭگە تۇراتىن تاۋارلارىنا جانە 300 ميلليون تەڭگە كولەمىندەگى مۇلكىنە – ونىڭ ىشىندە جەر تەلىمدەرى, اۆتوكولىكتەر, باگگيلار مەن جىلجىمالى شاتىرلار سەكىلدى اكتيۆتەرگە – شەكتەۋ قويىلعان. بۇل مەملەكەتتىڭ زاڭ الدىندا ەشكىمنىڭ دە ارتىقشىلىعى جوق دەگەن قاعيدانى ۇستاناتىنىن كورسەتەدى.
سوت ۇكىمىمەن كىنالى تۇلعالار 1 جىل 4 ايدان 4 جىل 6 ايعا دەيىنگى مەرزىمگە باس بوستاندىعىنان ايىرىلدى. سونىمەن قاتار, ولاردىڭ مۇلكى تاركىلەنەتىن بولدى. ىسكە قاتىسى بار ءبىر ازاماتقا حالىقارالىق ىزدەۋ جاريالانعانى بۇل قىلمىستىڭ اۋقىمى مەن كۇردەلىلىگىن ايعاقتايدى.
ءبىر قىزىعى, بۇل ىستەن كەيىن كومپانيامەن ارىپتەستىك ورناتقان 47 كاسىپورىن ءوز ەركىمەن ەسەپ ايىرىسۋدى توقتاتىپ, مەملەكەت قازىناسىنا 240 ميلليون تەڭگە سالىق تولەگەن. بۇل – وزگە بيزنەس وكىلدەرى ءۇشىن ەلەۋلى ەسكەرتۋ, ءارى مەملەكەتتىڭ فيسكالدىق باقىلاۋىنىڭ ناتيجەلىلىگىن بىلدىرەدى.
