كاسىپورىنداعى قۇرىلىس جۇمىسى بيىل مامىردىڭ اياعىندا ءبىتتى. سۋدى تۇشىتۋ, تۇزسىزداندىرۋ جانە مينەرالداندىرۋ تسەحتارى, سورعى ستانساسى, ەكى قوسالقى ستانسا, جوندەۋ-مەحانيكالىق تسەحى, گاراج, قويمالار, زەرتحانا مەن ءورت ءسوندىرۋ بەكەتى, قازاندىق سالىندى. ءاربىر نىسان ءۇشىن ەڭ قاجەتتى نارسە ينجەنەرلىك-كوممۋنيكاتسيالىق ينفراقۇرىلىم دەسەك, زاۋىتقا ۇزىندىعى 80,1 شاقىرىم ەلەكتر بەرۋ جەلىسى, جالپى ۇزىندىعى 201,4 شاقىرىم ەكى تارماقتى ماگيسترالدى سۋ قۇبىرى, 48,1 شاقىرىم گاز قۇبىرى, 40,1 شاقىرىم اۆتوجول سالىنىپ, جوبانىڭ تەڭىز بولىگى بويىنشا تەڭىز تۇبىندەگى ترانشەياعا پوليەتيلەن قۇبىرلارى توسەلدى. كاسىپورىندا الەمنىڭ جەتەكشى ءوندىرۋشى كومپانيالارىنىڭ وزىق تەحنولوگيالارى قولدانىلادى.
ىسكە قوسۋ-باپتاۋ ءىس-شارالارى ءجۇرىپ جاتقان زاۋىتتا الدىمەن تەحنولوگيالىق جابدىقتاردىڭ بۇكىل تسيكلى رەتتەلدى. بۇل – تەڭىز سۋىن تۇشىتۋعا ارنالعان وندىرىستىك جەلى تەكسەرىلەدى جانە جۋىلادى دەگەن ءسوز. 72 ساعاتقا سوزىلاتىن بۇل ۇردىستەن سوڭ سىناق ءىس-شارالارى ءساتتى اياقتالعان كەزدە زاۋىت جۇمىس رەجىمىنە كوشەدى.
زاۋىتتىڭ سۋدى تازارتۋ جانە تۇشىتۋ جۇمىسى كۇردەلى. مامانداردىڭ ايتۋىنشا, الدىمەن زاۋىتتان 730 مەتر قاشىقتىقتا تەڭىز ۇستىندە ورنالاسقان ارنايى سۋ جينايتىن قۇرىلعى ارقىلى تەرەڭدىگى 12 مەترلىك قۇدىققا كەلىپ تۇسكەن تەڭىز سۋى قوندىرعىلاردىڭ كومەگىمەن قۇبىر ارقىلى كاسىپورىنعا جەتەدى. تۇشىتۋ تسەحىندا لايدان تازارتۋعا جانە باسقا زاتتاردى جويۋعا باعىتتالعان بىرقاتار پروتسەدۋرادان وتكەن سۋ وزدىگىنەن تازارتاتىن سۇزگىلەرگە جىبەرىلەدى. وسىدان كەيىن سۋ ۋلترا سۇزگىلەۋ ۇدەرىسىنەن وتەدى.
بۇل ءتاسىل سۋ قۇرامىنداعى ورگانيكالىق زاتتاردى 70–75%-عا دەيىن تومەندەتۋگە جانە بارلىق قوسپانى, سونىڭ ىشىندە باكتەريا, ءبىر جاسۋشالى بالدىر جانە باسقا دا ەلەمەنتتەردى تولىق جويۋعا ىقپال ەتەدى. سونداي-اق كەرى وسموس تەحنولوگياسى سۋ قۇرامىن مينەرالدى قوسپالاردان تازارتىپ, 99,5% تۇشىتۋعا مۇمكىندىك بەرەدى. ال تۇششى سۋدى جوعارى ساپاعا جەتكىزۋ ءۇشىن رەمينەراليزاتسيا پروتسەسى جۇرگىزىلەدى. حلورلانعاننان كەيىن ول سۋ اۋىزسۋ رەزەرۆۋارلارىنا جىبەرىلەدى.
كوپتەن كۇتكەن كەندىرلى سۋ تۇشىتۋ زاۋىتى تولىق جوبالىق قۋاتىنا ەنگەندە وڭىردە اۋىز سۋ ماسەلەسىنە بەلگىلى مولشەردە سەرپىن بەرمەك.
