كاسىپكەرلىكتى دامىتۋ – ەكونوميكانىڭ تۇراقتى ءوسۋىنىڭ ماڭىزدى فاكتورلارىنىڭ ءبىرى. وتكەن جىلدىڭ 4 توقسانىندا ىجو-دەگى شوب ۇلەسى 39,7%-دى قۇرادى. بۇل بۇرناعى جىلدىڭ سايكەس كەزەڭىمەن سالىستىرعاندا 3,2 پايىزدىق تارماققا ارتىق. سەكتوردا جۇمىسپەن قامتىلعاندار سانى 2,2%-عا ارتىپ, 4,4 ملن ادامعا جەتىپ وتىر. شوب سۋبەكتىلەرىنىڭ ءونىم شىعارۋ كولەمى 81 ترلن تەڭگەنى قۇرادى, ال بۇل وتكەن جىلدىڭ وسى كەزەڭىندەگى كورسەتكىشىنەن 19,2%-عا جوعارى دەپ اۋىز تولتىرىپ ايتا الامىز.
«دامۋ» قورىنىڭ قاتىسۋىمەن ىسكە اساتىن كاسىپكەرلىكتى قولداۋدىڭ قولدانىستاعى كەشەندى ءىس-شاراسى شەڭبەرىندە «بيزنەستىڭ جول كارتاسى» مەن «قاراپايىم زاتتار ەكونوميكاسى» باعدارلامالارىنىڭ قۇرالىن بەلسەندى ىسكە اسىرۋ جالعاسىپ جاتىر», دەدى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا ۇلتتىق ەكونوميكا مينيسترلىگى كاسىپكەرلىكتى مەملەكەتتىك قولداۋ جانە قورعاۋ دەپارتامەنتىنىڭ ديرەكتورى دارىن ءابدۋالى.
ول بريفينگتە ەلدەگى شاعىن جانە ورتا بيزنەستى مەملەكەتتىك قولداۋدىڭ نەگىزگى ناتيجەلەرى مەن جاڭا شارالارى تۋرالى ايتا كەلىپ, وتكەن جىلدىڭ قورىتىندىسى بويىنشا كرەديتتەردى سۋبسيديالاۋ ارقىلى جەڭىلدەتىلگەن قارجىلاندىرۋ شارالارىمەن جالپى سوماسى 1 ترلن تەڭگەگە 7 مىڭنان استام بيزنەس-جوبا قامتىلعانىن جەتكىزدى.
وندا كەپىلدىكتەر 310 ملرد تەڭگە سوماسىنا 8 مىڭ جوباعا بەرىلىپتى. ەندى بيىل وسى ماقساتتارعا 275,2 ملرد تەڭگە, ونىڭ قاتارىندا رەسپۋبليكالىق بيۋدجەتتەن 196,4 ملرد تەڭگە جانە جەرگىلىكتى بيۋدجەتتەردەن 78,8 ملرد تەڭگە باعىتتاۋ جوسپارلانىپ وتىر. جوبالاردىڭ دەنى الماتى, استانا, شىمكەنت قالالارىندا ەكەنىن ايتقان ءجون. سونداي-اق الماتى, تۇركىستان جانە اقتوبە وبلىستارىندا ىسكە اسىرىلدى.
سالالار بويىنشا وڭدەۋ ونەركاسىبى, كولىك جانە قويمالاۋ مەن ءبىلىم سالالارى باسىم. قارجىلىق ەمەس قولداۋ شارالارى دا بەلسەندى دامۋدى جالعاستىرۋدا. بىلتىرعى جىلى 15 مىڭ سەرۆيستىك قىزمەت كورسەتىلدى جانە بيزنەستى جۇرگىزۋ بويىنشا 135 مىڭنان استام كونسۋلتاتسيا ۇسىنىلدى.
قولداۋ كاسىپكەرلەرگە قىزمەت كورسەتۋ ورتالىقتارى ارقىلى دا, ونلاين-مامانداندىرىلعان پورتال ارقىلى دا كورسەتىلەدى. قولداۋدىڭ نەعۇرلىم نارىقتىق تەتىكتەرىنە كوشۋ شەڭبەرىندە كەشەندى باعدارلاماعا وزگەرىستەر ەنگىزىلدى. اتاپ ايتقاندا, پورتفەلدىك سۋبسيديالاۋ مەن «دامۋ» قورى بازاسىندا جاڭادان قۇرىلاتىن وڭىرلىك كەپىلدىك قورلارى ارقىلى كەپىلدىك بەرۋ.
قارجىلاندىرۋ تۋرالى شەشىمدەردى قابىلداۋ جونىندەگى وكىلەتتىكتى تىكەلەي ەكىنشى دەڭگەيدەگى بانكتەرگە بەرۋ باستى جاڭالىق بولىپ تابىلادى. بۇل وتىنىمدەردى قاراۋدى جەدەلدەتۋ مەن بيزنەستى قولداۋ تيىمدىلىگىن ارتتىرۋعا مۇمكىندىك بەرەدى.
«شوب سۋبەكتىلەرىنە جىلدىق 12,6% مولشەرلەمەسىمەن جەڭىلدەتىلگەن قارجىلاندىرۋدىڭ جاڭا باعدارلاماسى قوسىمشا ازىرلەنىپ جاتىر. نەسيەلەر قوسا قارجىلاندىرۋ تەتىكتەرىنىڭ قاتىسۋىمەن ەكىنشى دەڭگەيدەگى بانكتەر ارقىلى بەرىلەتىن بولادى. ماكسيمالدى ليميت ءبىر قارىز الۋشىعا نەمەسە بايلانىستى قارىز الۋشىلار توبىنا 7 ملرد تەڭگەگە دەيىن بولادى», دەدى دارىن ءابدۋالى.
مۇنىمەن بىرگە دەپارتامەنت ديرەكتورى مەملەكەت بۇدان بىلاي شاعىن جانە ورتا بيزنەستى قولداۋدى دايەكتى تۇردە كۇشەيتىپ, قارجىلىق جانە قارجىلىق ەمەس قۇرالدارعا قولجەتىمدىلىكتى كەڭەيتىپ, كاسىپكەرلىك بەلسەندىلىك ءۇشىن قولايلى جاعداي تۋعىزاتىنىن اتاپ ءوتتى.
